ସମାଜର ବରିଷ୍ଠ ନାଗରିକମାନଙ୍କ ଯତ୍ନ ନେବା ଲାଗି ଅନେକ ପଦକ୍ଷେପ ନିଆଯାଉଥିବା ବେଳେ ସେମାନଙ୍କ ମାନସିକସ୍ଥିତି ତଥା ଏକାନ୍ତପଣ ଦୂର କରିବା ଏବେ ଏକ ଆହ୍ବାନ ଭାବେ ଉଭା ହୋଇଛି। ତେବେ ଏଭଳି ସମସ୍ୟା ଦୂର କରିବା ପାଇଁ ହରିୟାଣାର ଏମ୍.ପି. ଦୀପୁ ଓ ରାହୁଲ ଗୁପ୍ତାଙ୍କ ପ୍ରୟାସ ପ୍ରଶଂସନୀୟ। ସେମାନେ ସିନିୟର ଓ୍ବାଲର୍ଡ ସଂସ୍ଥା ଗଠନ କରି ବରିଷ୍ଠ ନାଗରିକମାନଙ୍କୁ ସାରା ବିଶ୍ୱ ଭ୍ରମଣ କରାଉଛନ୍ତି। ୨୦୧୫ରେ ସେମାନେ ସିନିୟର ଓ୍ବାଲର୍ଡ ଗଠନ କରିଥିଲେ। ଏହା ମାଧ୍ୟମରେ ଏବେ ସୁଦ୍ଧା ୫,୦୦୦ ବରିଷ୍ଠ ନାଗରିକଙ୍କୁ ବିଶ୍ୱ ଭ୍ରମଣ ସୁବିଧା ଯୋଗାଇ ଦେଇସାରିଲେଣି। ଅର୍ଥାତ୍ ପିଲାମାନେ ବାହାରେ ରହୁଥିବାରୁ ସେମାନଙ୍କ ସ୍ନେହ ଶ୍ରଦ୍ଧାରୁ ବଞ୍ଚିତ ବରିଷ୍ଠ ନାଗରିକମାନେ ଏହି ଯାତ୍ରାରେ ଯାଉଛନ୍ତି। ଯାତ୍ରା ସମୟରେ ସେମାନଙ୍କ ସ୍ବାସ୍ଥ୍ୟର ଯତ୍ନ ନିଆଯିବା ସହ ମନୋରଞ୍ଜନ ଲାଗି ନାଚ, ଗୀତ ଆଦିର ବ୍ୟବସ୍ଥା କରିଛନ୍ତି। ସେମାନଙ୍କୁ ପ୍ରାୟତଃ ଚିକିତ୍ସାଳୟର ପାଖାପାଖି ହୋଟେଲରେ ରଖାଇବାର ବ୍ୟବସ୍ଥା କରାଯାଉଛି। ଆମେରିକା, ଇଂଲଣ୍ଡ, ଶ୍ରୀଲଙ୍କା, ଭୁଟ୍ଟାନ, ଭିଏତ୍ନାମ, ଥାଇଲାଣ୍ଡ, ସିଙ୍ଗାପୁର, କେନିଆ, ଦୁବାଇ, ଅଷ୍ଟ୍ରେଲିଆ ଆଦି ଦେଶକୁ ବରିଷ୍ଠ ନାଗରିକମାନଙ୍କୁ ଭ୍ରମଣରେ ନିଆଯିବା ସହ ଭାରତର ବିଭିନ୍ନ ରାଜ୍ୟର ଆକର୍ଷଣୀୟ ପର୍ଯ୍ୟଟନସ୍ଥଳୀକୁ ବୁଲାଇ ନିଆଯାଉଛି। ବରିଷ୍ଠ ନାଗରିକମାନଙ୍କର ବୟସ ୫୫-୯୫ ମଧ୍ୟରେ ରହୁଛି।