ଭାରତରେ ୨୦୦୦ ଟଙ୍କିଆ ନୋଟ ଏବେ ବ୍ୟାଙ୍କରେ ଫେରାଇବା ପ୍ରକ୍ରିୟା ଜାରି ରହିଛି। ତେବେ ଏହା ମଧ୍ୟରେ ଏକ ନିଆରା ଖବର ସାମ୍ନାକୁ ଆସିଛି। ଜଣେ ଭକ୍ତ ହିମାଚଳ ପ୍ରଦେଶର ମା’ଜ୍ୱାଳାମୁଖୀ ମନ୍ଦିରରେ ୪୦୦ଟି ୨୦୦୦ ଟଙ୍କିଆ ନୋଟ ଅର୍ଥାତ୍ ୮ଲକ୍ଷ ଟଙ୍କା ଦାନ କରିଛନ୍ତି। ବର୍ତ୍ତମାନ ଏହି ପରିମାଣର ଦାନ ଚର୍ଚ୍ଚାର ବିଷୟ ପାଲଟିଛି। ମନ୍ଦିରର ଆକବରଙ୍କ ଛତା ନିକଟରେ ରଖାଯାଇଥିବା ଦାନବାକ୍ସରେ ଏହି ରାଶି ଦାନ କରାଯାଇଥିଲା। ମନ୍ଦିରର ଜୁନିୟର ଇଞ୍ଜିନିୟର ସୁରେଶ କୁମାର କହିଛନ୍ତି, ଅନେକ ଭକ୍ତ ମା’ଙ୍କ ପାଖକୁ ଆସନ୍ତି। କିଏ କିଏ ପ୍ରାୟତଃ ମା’ଙ୍କ ପାଦତଳେ ଏପରି ଭେଟି ଚଢ଼ାଇ ଥାନ୍ତି। କିନ୍ତୁ ଦାନ ବାକ୍ସରେ ଏତେ ପରିମାଣର ଟଙ୍କା ଦାନ କରାଯିବା ସମସ୍ତଙ୍କୁ ବିସ୍ମିତ କରିଛି। ଏଥି ସହିତ ଜ୍ୱାଳାମୁଖୀ ମ୍ୟୁନିସିପାଲିଟି କାଉନ୍ସିଲ୍ର ଅଧ୍ୟକ୍ଷ ଧର୍ମେନ୍ଦ୍ର ଶର୍ମା କହିଛନ୍ତି, ସେପ୍ଟେମ୍ବର ମଧ୍ୟରେ ବ୍ୟାଙ୍କରେ ୨୦୦୦ ଟଙ୍କିଆ ନୋଟସବୁ ବଦଳାଯିବା ପରେ ତାହାକୁ ମନ୍ଦିରରେ ଭକ୍ତଙ୍କ ସୁବିଧା ପାଇଁ ଖର୍ଚ୍ଚ କରାଯିବ। ଏପରି ପରିସ୍ଥିତିରେ ଯଦି ମନ୍ଦିର ଦାନ ବାକ୍ସରେ ୨୦୦୦ ଟଙ୍କିଆ ନୋଟ ଜମା ହୁଏ, ତେବେ ନିଶ୍ଚିତ ଭାବରେ ଏହାଦ୍ୱାରା ମନ୍ଦିରର ବିକାଶ ହେବ।
