ସ୍କୁଲରେ ଶିକ୍ଷାଦାନ ସହ ସେଠାରେ ଏକ ମିନି ଜଙ୍ଗଲ କରି ପରିବେଶ ସୁରକ୍ଷାର ବାର୍ତ୍ତା ଦେଇଛନ୍ତି କେରଳର ଶିକ୍ଷକ ରଫି ରାମନାଥ। ଆଲପୁଝା ଜିଲାର ବିଜ୍ଞାନ ବିଳାସିନୀ ଉଚ୍ଚ ପ୍ରାଥମିକ ବିଦ୍ୟାଳୟରେ ସେ ଶିକ୍ଷକ ଅଛନ୍ତି। ସେ ଏହି ସ୍କୁଲରେ ନିଜ ଉଦ୍ୟମରେ କରିଥିବା ମିନି ଜଙ୍ଗଲରେ ୧୧୨ କିସମର ୪୫୦ ଗଛ ଲଗାଇଛନ୍ତି। ସେ ମଧ୍ୟ ସ୍କୁଲ ପରିସରରେ ୧୫୦ ପ୍ରକାର ଓଷଧୀୟ ଗଛଥିବା ବଗିଚା କରିଛନ୍ତି। ଏଥିପାଇଁ ବନ ବିଭାଗ ତାଙ୍କୁ ୫୦ ପ୍ରକାର ଗଛ ଯୋଗାଇ ଦେଇଛି। ସ୍କୁଲରେ ସଫଳତାର ସହ ଜଙ୍ଗଲ ଓ ବଗିଚା କରିବା ପରେ ରଫି ଅନ୍ୟ ସ୍କୁଲ, ସରକାରୀ ଅଫିସ ଏବଂ ଧର୍ମସ୍ଥଳୀଗୁଡ଼ିକରେ ଫଳ ବଗିଚା, ପ୍ରଜାପତି ବଗିଚା ଏବଂ ନକ୍ଷତ୍ର ବନ (ବିଭିନ୍ନ ନକ୍ଷତ୍ର ନାମରେ) କରୁଛନ୍ତି। ଏଥିପାଇଁ ସେ ସ୍କୁଲ ସମୟ ପରେ ନିୟମିତ ଭାବେ ସମୟ ଦେଉଛନ୍ତି। ବନ ବିଭାଗ ସହଯୋଗ ଓ ଲୋକଙ୍କ ଅନୁଦାନରେ ସେ ଏଭଳି କାର୍ଯ୍ୟ କରୁଛନ୍ତି।
