ଦସ୍ୟୁ ରତ୍ନାକର ବାଲ୍ମୀକି ହେବା ଭଳି କର୍ନାଟକର ଥୋମାସ ରାଜଙ୍କ ଜୀବନରେ ପରିବର୍ତ୍ତନ ଆସିଛି। ସେ ଅପରାଧ ଦୁନିଆରୁ ବାହାରି ଅସହାୟଙ୍କ ଆଶା ପାଲଟିଛନ୍ତି। ଏବେ ସୁଦ୍ଧା ଥୋମାସ ୧୯,୦୦୦ ଅସହାୟ ବ୍ୟକ୍ତିଙ୍କୁ ରାସ୍ତାରୁ ଉଦ୍ଧାର କରିଛନ୍ତି। ବେଙ୍ଗାଲୁରୁରେ ‘ହୋମ୍ ଅଫ୍ ହୋପ’ ସଂସ୍ଥା ଗଠନ କରି ସେଠାରେ ୭୫୦ରୁ ଊର୍ଦ୍ଧ୍ୱ ଗୃହହୀନ ଏବଂ ଅସହାୟଙ୍କୁ ରଖିଛନ୍ତି। ଏହି ସେବା ଲାଗି ଲୋକେ ଥୋମାସଙ୍କୁ ‘ଅଟୋ ରାଜା’ ବୋଲି ସମ୍ବୋଧନ କରୁଛନ୍ତି। ଥୋମାସ ୧୬ ବର୍ଷ ବୟସରେ ଅପରାଧ କାର୍ଯ୍ୟକଳାପରେ ଲିପ୍ତ ରହି ଜେଲ୍ ଦଣ୍ଡ ଭୋଗିଥିଲେ। ଜେଲ୍ରେ ଥିବା ସମୟରେ ତାଙ୍କ ମାନସିକତାରେ ପରିବର୍ତ୍ତନ ଆସିଥିଲା। ପରେ ଜେଲରୁ ମୁକୁଳି ବେଙ୍ଗାଲୁରୁ ଆସି ଅଟୋଚଳାଇ ରୋଜଗାର କଲେ। ଅଟୋଚଳାଇବା ସମୟରେ ସେ ରାସ୍ତକଡ଼ର ନିରାଶ୍ରୟ ଲୋକଙ୍କୁ ଉଦ୍ଧାର କରିବା ଆରମ୍ଭ କରିଥିଲେ। ଏପରି କି ୧୩ ଜଣ ଲୋକକୁ ତାଙ୍କ ଭଡ଼ାଘରେ ରଖିତ୍ଥିଲେ। ପରେ ହୋମ ଅଫ ହୋପ ପ୍ରତିଷ୍ଠା କରିଥିତ୍ଲେ। ଏ ପର୍ଯ୍ୟନ୍ତ ଅଟୋରାଜା ୧୯,୦୦୦ ଲୋକଙ୍କୁ ଉଦ୍ଧାର କରିସାରିଲେଣି। ଏଠାରେ ତାଙ୍କ ଯାତ୍ରା ଶେଷ ହୋଇନାହିଁ ଓ ଆଗକୁ ଏଭଳି ଲୋକମାନଙ୍କ ପାଇଁ ଅନେକ କିଛି କରିବାର ସ୍ବପ୍ନ ରହିଛି ବୋଲି କହନ୍ତି ଥୋମାସ।