ନୂଆଦିଲ୍ଲୀ,୧୫ା୧୨: କେନ୍ଦ୍ର ସରକାର ଗତ ୩ ଆର୍ଥିକ ବର୍ଷରେ ପେଟ୍ରୋଲ ଏବଂ ଡିଜେଲରୁ ଟିକସ ଆକାରରେ ୮.୦୨ ଲକ୍ଷ କୋଟି ଟଙ୍କା ପାଇଛନ୍ତି। କେବଳ ୨୦୨୦-୨୧ ଆର୍ଥିକ ବର୍ଷରେ ୩.୭୧ ଲକ୍ଷ କୋଟି ଟଙ୍କା ଆଦାୟ କରାଯାଇଥିତ୍ବା ଅର୍ଥମନ୍ତ୍ରୀ ନିର୍ମଳା ସୀତାରମନ ମଙ୍ଗଳବାର ରାଜ୍ୟ ସଭାରେ ଉତ୍ତର ଦେଇଛନ୍ତି। ଉପରୋକ୍ତ ସମୟ ମଧ୍ୟରେ ପେଟ୍ରୋଲ ଏବଂ ଡିଜେଲ ଉପରେ ସୀମା ଶୁଳ୍କ କେତେ ବୃଦ୍ଧି ପାଇଛି ଏବଂ ବିଭିନ୍ନ ଟିକସ ମାଧ୍ୟମରେ କେତେ ରାଜସ୍ବ ସଂଗ୍ରହ ହୋଇଛି ସେନେଇ ପ୍ରଶ୍ନ ହୋଇଥିଲା। ଏହାର ଲିଖିତ ଉତ୍ତର ଦେଇ ସୀତାରମନ ଦର୍ଶାଇଛନ୍ତି ଯେ, ୨୦୧୮ ଅକ୍ଟୋବର ୫ରେ ପେଟ୍ରୋଲ ଲିଟର ପିଛା ସୀମା ଶୁଳ୍କ ୧୯.୪୮ଟଙ୍କା ଥିଲା। ତାହା ୨୦୨୧ ନଭେମ୍ବର ୪ ସୁଦ୍ଧା ୨୭.୯ ଟଙ୍କାକୁ ବୃଦ୍ଧିପାଇଛି। ସେହିପରି ସମାନ ସମୟ ମଧ୍ୟରେ ଡିଜେଲ ଲିଟର ପିଛା ସୀମା ଶୁଳ୍କ ୧୫.୩୩ ଟଙ୍କାରୁ ୨୧.୮ ଟଙ୍କାକୁ ବୃଦ୍ଧିପାଇଛି। ହେଲେ ୨୦୧୮ ଅକ୍ଟୋବର ୫ ତୁଳନାରେ ୨୦୧୯ ଜୁଲାଇ ୬ରେ ପେଟ୍ରୋଲ ଏବଂ ଡିଜେଲର ସୀମାଶୁଳ୍କ ଯଥାକ୍ରମେ ୧୭.୯୮ ଟଙ୍କା ଓ ୧୩.୮୩କୁ ହ୍ରାସ ପାଇଥିଲା। ଏହାପରେ ୨୦୨୧ ଫେବୃୟାରୀ ୨ ସୁଦ୍ଧା ସୀମାଶୁଳ୍କ ଯଥାକ୍ରମେ ୩୨.୯୮ ଟଙ୍କା ଏବଂ ୩୧.୮୩ ଟଙ୍କାକୁ ବୃଦ୍ଧିପାଇଥିବାବେଳେ ଗତ ନଭେମ୍ବର ୪ରେ ୨୭.୯ ଟଙ୍କା(ପେଟ୍ରୋଲ) ଏବଂ ୨୧.୮ ଟଙ୍କା (ଡିଜେଲ)କୁ ହ୍ରାସ ପାଇଥିଲା। ସୀତାରମନଙ୍କ ସୂଚନା ଅନୁଯାୟୀ ପେଟ୍ରୋଲ ଏବଂ ଡିଜେଲରୁ ଟିକସ ଭାବେ ୨୦୧୮-୧୯ରେ ୨ ଲକ୍ଷ ୧୦ ହଜାର ୨୮୨ କୋଟି, ୨୦୧୯-୨୦ରେ ୨ ଲକ୍ଷ ୧୯ ହଜାର ୭୫୦ କୋଟି ଏବଂ ୨୦୨୦-୨୧ରେ ୩ ଲକ୍ଷ ୭୧ ହଜାର ୯୦୮ କୋଟି କେନ୍ଦ୍ର ସରକାର ସଂଗ୍ରହ କରିଛନ୍ତି। ଗତ ଦୀପାବଳି ପୂର୍ବରୁ ଅର୍ଥାତ୍ ନଭେମ୍ବର ୪ରେ ସରକାର ପେଟ୍ରୋଲ ଏବଂ ଡିଜେଲ ଉପରୁ ଯଥାକ୍ରମେ ୫ ଟଙ୍କା ଓ ୧୦ ଟଙ୍କାର ସୀମାଶୁଳ୍କ ହ୍ରାସ କରିଥିଲେ। ଏହାପରେ କେତେକ ରାଜ୍ୟ ସରକାର ୨ ଇନ୍ଧନ ଉପରୁ ଭାଟ୍ କମାଇଥିଲେ।