ସାକ୍ରାମେଣ୍ଟୋ,୧।୩: ଚର୍ଚ୍ଚରେ ୩ ଛୁଆଙ୍କୁ ଗୁଳି କରି ହତ୍ୟା କରିବା ପରେ ଆତ୍ମହତ୍ୟା କରିଛନ୍ତି ବାପା। କାଲିଫର୍ନିଆର ସାକ୍ରାମେଣ୍ଟୋଠାରେ ଘଟିଥିବା ଏହି ଗୁଳିକାଣ୍ଡରେ ୫ ଜଣଙ୍କ ମୃତ୍ୟୁ ହୋଇଛି।
ପ୍ରାଣ ହରାଇଥିବା ୫ମ ବ୍ୟକ୍ତି ମୃତ ପରିବାର ସହ କେଉଁ ଭଳି ପରିଚିତ, ତାହା ଜଣାପଡ଼ିନାହିଁ। ଘରୋଇ କଳହ ଯୋଗୁ ହତ୍ୟାକାଣ୍ଡ ଘଟିଛି। ମୃତକଙ୍କ ମଧ୍ୟରେ ୩ ନାବାଳକ ଥିଲେ। ସେମାନଙ୍କ ବୟସ ୧୫ ବର୍ଷରୁ କମ୍ ଥିଲା ବୋଲି ସାକ୍ରାମେଣ୍ଟୋ କାଉଣ୍ଟି ଶେରିଫ ଅଫିସର ସର୍ଜଣ୍ଟ ରଡ୍ ଗ୍ରାସମ୍ୟାନ କହିଛନ୍ତି।
“ଅପରାହ୍ନ ୫ଟା ୭ରେ ଚର୍ଚ୍ଚରେ ଗୁଳିକାଣ୍ଡ ଘଟିଥିବା ଖବର ମିଳିଥିଲା। ତଦନ୍ତ ପରେ ବୟସ୍କ ପୁରୁଷ ତାଙ୍କର ୧୫ ବର୍ଷରୁ କମ୍ ୩ ଛୁଆଙ୍କୁ ଗୁଳି କରି ହତ୍ୟା କରିଥିବା ଜଣାପଡ଼ିଛି। ଏହି ଗୁଳିକାଣ୍ଡରେ ଅନ୍ୟ କେହି ସମ୍ପୃକ୍ତ ନାହାନ୍ତି। ଯେଉଁ ପର୍ଯ୍ୟନ୍ତ ମୁଁ ଦେଖି ପାରୁଛି, ଏହା ଏକ ଘରୋଇ କଳହ ଜନିତ ଘଟଣା” ବୋଲି ଗ୍ରାସମ୍ୟାନ କହିଛନ୍ତି।