ପୁରୀ ଅଫିସ, ୧୧।୭: ମହାପ୍ରଭୁ ଶ୍ରୀଜଗନ୍ନାଥଙ୍କ ପାଇଁ ଜଣେ ଭକ୍ତ କର୍ନାଟକ ଜିଲାର ମହୀଶୂରରୁ ୧୦ଫୁଟ ଧୂପକାଠି ଆଣିଛନ୍ତି। ସେ ଭକ୍ତ ହେଉଛନ୍ତି ଠାକୁରମୁଣ୍ଡାସ୍ଥିତ ଆଶ୍ରମରେ ଥିବା ଭୈରବାନନ୍ଦ ସରସ୍ବତୀ ମହାରାଜ। ସେ କିଛିବର୍ଷ ହେବ ମହାପ୍ରଭୁଙ୍କ ନିକଟରେ ଧୂପକାଠି ସେବା କରି ଆସୁଛନ୍ତି। ୧୯୯୬ ମସିହା ନବକଳେବରଠାରୁ ପ୍ରତ୍ୟେକ ବର୍ଷ ଭୈରବ ବାବା ନିଜ ଅନୁଗାମୀମାନଙ୍କ ସହ ରଥଯାତ୍ରାକୁ ପୁରୀ ଆସି ମହାପ୍ରଭୁଙ୍କୁ ଉଦ୍ଦେଶ୍ୟରେ ୧୦ ଫୁଟ୍ର ଧୂପ ଜାଳି ସେବା କରିଥାନ୍ତି। ପ୍ରତିବର୍ଷ ଶ୍ରୀଗୁଣ୍ଡିଚା ଏବଂ ବାହୁଡ଼ାରେ ମହାପ୍ରଭୁଙ୍କ ପହଣ୍ଡୀଠାରୁ ଆରମ୍ଭ କରି ରଥଟଣା ସମୟରେ ବାବା ଭୈରବା ନନ୍ଦ ୧୦ କିମ୍ବା ୧୫ ଫୁଟ୍ର ଧୂପ କାଠି ପ୍ରଜ୍ଜ୍ୱଳନ କରି ମହାପ୍ରଭୁଙ୍କ ଉର୍ଦ୍ଦେଶ୍ୟରେ ପ୍ରାର୍ଥନା କରିଥାନ୍ତି। ସେ ପ୍ରତିବର୍ଷ କର୍ନାଟକ ମହୀଶୂରଠାରୁ ଏହି ଧୂପ କାଠି ଆଣିଥାନ୍ତି। ଧୂପକାଠିର ମୂଲ୍ୟ ପ୍ରାୟ ୫ ହଜାର ବୋଲି ବାବା ଭୈରବା ନନ୍ଦ କହିଛନ୍ତି। କିଛିବର୍ଷ ହେବ ୧୫ ଫୁଟ୍ ଉଚ୍ଚର ଧୂପକାଠି ଆଣୁଥିବା ବେଳେ ଚଳିତବର୍ଷ କଟକଣା ପାଇଁ ୧୦ ଫୁଟର ଧୂପକାଠି କମ୍ପାନୀ ପକ୍ଷରୁ ଦିଆଯାଇଥିବା ସୂଚନା ଦେଇଛନ୍ତି। ଧୂପକାଠିଟି ୪୮ରୁ ୭୨ ଘଣ୍ଟା ପର୍ଯ୍ୟନ୍ତ ଜଳିଥାଏ। ଚଳିତବର୍ଷ ବାବାଙ୍କୁ ଶ୍ରୀମନ୍ଦିର ପ୍ରଶାସନ ପକ୍ଷରୁ ପାସ୍ ଯୋଗାଇ ଦିଆଯାଇ ନ ଥିବାରୁ ମହାପ୍ରଭୁଙ୍କ ନିକଟରେ ଧୂପ ସେବା କିପରି କରିବେ ବୋଲି ଭୈରବା ନନ୍ଦ ଆଶଙ୍କା କରିଛନ୍ତି।