ଭୁବନେଶ୍ୱର,୨୯ା୪(ବ୍ୟୁରୋ): ରାଜ୍ୟ ସରକାର ସ୍ପେଶାଲିଷ୍ଟ ଏବଂ ସୁପରସ୍ପେଶାଲିଷ୍ଟ ଡାକ୍ତରଙ୍କୁ ଆକୃଷ୍ଟ କରିବାକୁ ପ୍ରୋତ୍ସାହନ ରାଶି (ଇନ୍ସେନ୍ଟିଭ) ପ୍ରଦାନ କରିବାକୁ ନିଷ୍ପତ୍ତି ନେଇଛନ୍ତି। ଯେଉଁ ଡାକ୍ତରମାନଙ୍କ ଡିପ୍ଲୋମେଟ୍ ଅଫ୍ ନ୍ୟାଶନାଲ (ଡିଏନ୍ବି) ସ୍ପେଶାଲିଷ୍ଟ ଏବଂ ସୁପରସ୍ପେଶାଲିଷ୍ଟ ଡିଗ୍ରୀ ଥିବ ସେମାନଙ୍କୁ ନ୍ୟାଶନାଲ ମେଡିକାଲ କମିଶନ ଆକ୍ଟ-୨୦୧୯ର ପାରା ୩୭(୨) ଅନୁଯାୟୀ ପ୍ରତ୍ୟେକ ମାସରେ ଦରମା ସହିତ ପ୍ରୋତ୍ସାହନ ରାଶି ପ୍ରଦାନ କରାଯିବ। ସ୍ପେଶାଲିଷ୍ଟମାନଙ୍କୁ ୨୦ ହଜାର ଏବଂ ସୁପରସ୍ପେଶାଲିଷ୍ଟମାନଙ୍କୁ ମାସିକ ଦରମା ସହିତ ୩୦ ହଜାର ଟଙ୍କା ଇନ୍ସେନ୍ଟିଭ ଦିଆଯିବ। ଏ ନେଇ ଶୁକ୍ରବାର ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ କରାଯାଇଛି। ସୂଚନାଯୋଗ୍ୟ, ପୂର୍ବରୁ ଓଡ଼ିଶା ସ୍ବାସ୍ଥ୍ୟ ସେବା କ୍ୟାଡର ପୋଷ୍ଟ ଗ୍ରାଜୁଏଟ ଏମ୍ଡି/ଏମ୍ଏସ୍ ଏବଂ ଡିଏମ୍/ଏମ୍ସିଏଚ୍ ସ୍ପେଶାଲାଇଜେଶନ ଡିଗ୍ରୀ ଥିବା ଡାକ୍ତରମାନଙ୍କୁ ମଧ୍ୟ ଉକ୍ତ ପ୍ରୋତ୍ସାହନ ରାଶି ଦିଆଯାଉଛି। ଏହି ପ୍ରୋତ୍ସାହନ ଫଳରେ ରାଜ୍ୟରେ ସ୍ପେଶାଲାଇଜେଶନ ଡାକ୍ତରଙ୍କ ସଂଖ୍ୟା ବଢ଼ିବା ସହ ସ୍ବାସ୍ଥ୍ୟସେବାରେ ଉନ୍ନତି ଆସିବ ବୋଲି ବିଜ୍ଞପ୍ତିରେ କୁହାଯାଇଛି।