ଅମିତ କୁମାର ସାମଲ
ଅନୁଗୋଳ ଅଫିସ, ୨୧ା୧୨: ଆଗକୁ ବଢ଼ିବ ଅନୁଗୋଳ କ୍ରିକେଟ। ପଞ୍ଚାୟତସ୍ତରରୁ ଖୋଜାଯିବେ ଉପଯୁକ୍ତ ପ୍ରତିଭା। ଅଭିଜ୍ଞତା ବଢ଼ାଇବାକୁ ନିୟମିତ ହେବ ବଡ଼ ପ୍ରତିଯୋଗିତାର ଆୟୋଜନ। ଟର୍ଫ ପିଚ୍, ସ୍ବତନ୍ତ୍ର କିଟ୍, ପ୍ରଶିକ୍ଷଣ, ପ୍ରୋତ୍ସାହନ ବଳରେ ରାଜ୍ୟ ଓ ଦେଶକୁ ପ୍ରତିନିଧିତ୍ୱ କରିପାରୁଥିବା ଭଳି ଗଢ଼ାଯିବେ ଖେଳାଳି। ଏ ଦିଗରେ ସ୍ବତନ୍ତ୍ର ଯୋଜନା ପ୍ରସ୍ତୁତ କରୁଛି ଅନୁଗୋଳ ଜିଲା କ୍ରିକେଟ୍ ଆସୋସିଏଶନ (ଏଡିସିଏ)। ବୁଧବାରଠାରୁ ସହରର କଦମ ପଡ଼ିଆରେ ଆରମ୍ଭ ହେବାକୁ ଯାଉଥିବା ସର୍ବଭାରତୀୟ ଅନୁଗୋଳ କ୍ରିକେଟ୍ କପ୍ ହିଁ ହେବ ଏହାର ପ୍ରାରମ୍ଭିକ ପଦକ୍ଷେପ।
୧୯୯୮ରେ ଓଡ଼ିଶା କ୍ରିକେଟ୍ ଆସୋସିଏଶନ୍ (ଓସିଏ) ପକ୍ଷରୁ ଅନୁଗୋଳରେ କରାଯାଇଥିଲା କଳାହାଣ୍ଡି କପ୍ ଆୟୋଜନ। ୨୦୦୦ ମସିହାରେ ମିଳିଥିଲା ରଣଜୀ ମ୍ୟାଚ। ହେଲେ ଏହାପରଠାରୁ ଓସିଏ ପକ୍ଷରୁ ଆଉ ବଡ଼ ମ୍ୟାଚର ଆୟୋଜନ ହୋଇନାହିଁ ଏଠାରେ। ହେଲେ ୨୫ ବର୍ଷ ପୂର୍ତ୍ତି ପାଳିବାକୁ ଯାଉଥିବା ଏଡିସିଏ ଏବେ ନୂଆ ପ୍ରତିଭାବାନଙ୍କ ସନ୍ଧାନରେ ରହିଛି। ଜିଲାରୁ ଅଧିକରୁ ଅଧିକ ଖେଳାଳି କିପରି ସୃଷ୍ଟି ହୋଇପାରିବେ, ସେ ଦିଗରେ ମନୋନିବେଶ କରିଛି। ଦୀର୍ଘବର୍ଷ ପରେ ସର୍ବଭାରତୀୟ ଅନୁଗୋଳ କ୍ରିକେଟ୍ କପ୍ର ଆୟୋଜନ କରାଯାଇଛି। ଟି-୨୦ ଫର୍ମାଟ୍ରେ ୨୧ରୁ ୨୫ ତାରିଖ ଯାଏ ଚାଲିବାକୁ ଥିବା ଏହି ପ୍ରତିଯୋଗିତା ଜିଲାର କ୍ରିକେଟ୍ ଖେଳାଳି ଓ କ୍ରୀଡ଼ାପ୍ରେମୀଙ୍କ ମଧ୍ୟରେ ଯେପରି ନୂଆ ଉତ୍ସାହ ଭରିଦେବ, ସେ ନେଇ ସ୍ବତନ୍ତ୍ର ବ୍ୟବସ୍ଥା କରାଯାଇଛି। ଏପରି କି ପ୍ରତିଯୋଗିତାର ଉଦ୍ଯାପନୀ ଉତ୍ସବରେ ଭାରତୀୟ କ୍ରିକେଟ୍ ଦଳର ପୂର୍ବତନ ଓପନର ଗୌତମ ଗମ୍ଭୀରଙ୍କୁ ଆମନ୍ତ୍ରଣ କରାଯିବାର କାର୍ଯ୍ୟସୂଚୀ ରଖାଯାଇଛି। ପୂର୍ବାପେକ୍ଷା ଜିଲା କ୍ରିକେଟ୍ ଭିତ୍ତିଭୂମି ବଳିଷ୍ଠ ହୋଇଥିଲେ ବି ପିଲାମାନେ ଟେନିସ ବଲ ମୋହରେ ପଡ଼ିଛନ୍ତି। ଫଳରେ ସେମାନେ ଡ୍ୟୁଜ୍ ବଲ ପ୍ଲାଟଫର୍ମ ପାଇପାରୁ ନାହାନ୍ତି। ଟେନିସ ବଲ୍ ଛାଡ଼ି ପିଲାମାନେ କିପରି ଡ୍ୟୁଜ୍ ବଲ୍ ପ୍ରତି ଆକୃଷ୍ଟ ହେବେ ସେଥିପାଇଁ ସ୍ବତନ୍ତ୍ର ଉପାୟ ଖୋଜାଯାଇଛି। ଆଗାମୀ ଦିନରେ ଜିଲାରେ କ୍ରିକେଟ୍ ଏକାଡେମୀ ଗଢ଼ାଯିବାର ଲକ୍ଷ୍ୟ ରଖାଯାଇଥିବାରୁ ଏଠାରେ ପ୍ରଶିକ୍ଷଣ ପ୍ରଦାନ କରି ପିଲାଙ୍କୁ ପ୍ରଥମେ ରଣଜୀ ମ୍ୟାଚ ପାଇଁ ପ୍ରସ୍ତୁତ କରାଯିବ। ଏଥିସହ ସେମାନେ ଦେଶ ପାଇଁ କିଭଳି ପ୍ରତିନିଧିତ୍ୱ କରିବେ ସେ ନେଇ କାର୍ଯ୍ୟ ଆରମ୍ଭ ହେବ ବୋଲି ସଂଘ ପକ୍ଷରୁ କୁହାଯାଇଛି।