ଦିବ୍ରୁଗଡ଼,୨।୭: ଦେଶର ଉତ୍ତର-ପୂର୍ବ ରାଜ୍ୟ ଆସାମରେ ଗତ କିଛି ଦିନରୁ ପ୍ରବଳ ବର୍ଷା ଯୋଗୁ ଅନେକ ସହରରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। ୨୬ଟି ଜିଲାରେ ୩୧.୫୪ ଲକ୍ଷରୁ ଅଧିକ ଲୋକ ବନ୍ୟା ପ୍ରଭାବିତ ହୋଇଥିବା ବେଳେ ବର୍ତ୍ତମାନ ସୁଦ୍ଧା ବନ୍ୟା ଯୋଗୁ ୧୭୩ଜଣଙ୍କ ମୃତ୍ୟୁ ହୋଇଛି। ବନ୍ୟା ପରିସ୍ଥିତିର ମୁକାବିଲା ପାଇଁ ସେନା ଏବଂ ପାରାମିଲିଟାରୀ ଫୋର୍ସ ରିଲିଫ ଏବଂ ଉଦ୍ଧାର କାର୍ଯ୍ୟରେ ନିୟୋଜିତ ହୋଇଛନ୍ତି। ଇତିମଧ୍ୟରେ ଲଗାତାର ବର୍ଷା ଯୋଗୁ ଆସାମର ଦିବ୍ରୁଗଡରେ ଥିବା ସିଆରପିଏଫ୍ କ୍ୟାମ୍ପରେ ବନ୍ୟାପାଣି ପଶିଯାଇଥିବା ଦେଖିବାକୁ ମିଳିଛି। ସୁଚନା ମୁତାବକ, ଗୁରୁବାର ରାତିରେ ଲଗାତାର ବର୍ଷା ଯୋଗୁ ଦିବ୍ରୁଗଡ ସହରର ୧୭୧ ବାଟାଲିୟନର ସିଆରପିଏଫ୍ ବ୍ୟାରେଜ ଏବଂ ବ୍ୟାଟାଲିୟନର କାର୍ଯ୍ୟାଳୟରେ ପାଣି ଭର୍ତ୍ତି ହୋଇଯାଇଥିଲା। ଆଗାମୀ ୩ରୁ ୪ ଦିନ ପର୍ଯ୍ୟନ୍ତ ପ୍ରବଳ ବର୍ଷା ହେବାର ପୂର୍ବାନୁମାନ ହେତୁ ସମସ୍ତଙ୍କୁ ସତର୍କତା ଦୃଷ୍ଟିରୁ ଯବାନଙ୍କୁ ଶୁକ୍ରବାର କ୍ୟାମ୍ପ ଛାଡି ଅନ୍ୟତ୍ର ଯିବାକୁ ପଡ଼ିଛି ବୋଲି ସିଆରପିଏଫ୍ ୧୭୧ ବାଟାଲିଅନର ଇନ୍ସପେକ୍ଟର ଅରବିନ୍ଦ କୁମାର ତିୱାରୀ ସୂଚନା ଦେଇଛନ୍ତି।