ପଟ୍ଟାମୁଣ୍ଡାଇ, ୭ା୧୨ (କଳ୍ପତରୁ ନାୟକ): ବାହାଘର ପାଇଁ ବନ୍ଧୁବାନ୍ଧବ ଆସି ଘରେ ପହଞ୍ଚତ୍ ସାରିଥିଲେ। ବରକୁ ନେଇ ବରଯାତ୍ରୀ କନ୍ୟାଘରକୁ ଯିବାକୁ ପ୍ରସ୍ତୁତ ହେଉଥିଲେ। ଏଥିପାଇଁ ପ୍ରସ୍ତୁତ ହେଉଥିବା ବେଳେ ଏକ ଅଭାବନୀୟ ଘଟଣା ବହୁ ଓଲଟପାଲଟ କରିଦେଇଥିଲା। ବରଯାତ୍ରୀଙ୍କ ଗାଡ଼ିରେ ପକାଯିବା ପାଇଁ ଆସିଥିବା ପେଟ୍ରୋଲରେ ହଠାତ୍ ନିଅଁା ଲାଗିବା ଓ ଏଥିରେ ଜଣେ ୩ ବର୍ଷର ଶିଶୁ ଜୀବନ୍ତ ଦଗ୍ଧ ହେବା ଘଟଣା ବିବାହ ଉତ୍ସବକୁ ଲୁହରେ ଭିଜାଇ ଦେଇଥିଲା। କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ଗ୍ରାମାଞ୍ଚଳ ଥାନା ଅନ୍ତର୍ଗତ ବଡ଼ପଡ଼ା ଗ୍ରାମରେ ଗୁରୁବାର ଏହି ଦୁଃଖଦ ଘଟଣା ଘଟିଛି। ସେହି ନିଆଁରେ ଅନ୍ୟ ୩ ଜଣ ଗୁରୁତର ହୋଇଛନ୍ତି। ୨ ବଖରା ଘର ସହ ଟେଣ୍ଟ ମଧ୍ୟ ଜଳିଯାଇଛି। ଏଭଳି ଘଟଣା ପରେ ପରିବାର ପକ୍ଷରୁ ବିବାହକୁ ବାତିଲ କରି ଦିଆଯାଇଛି। କାନ୍ଦ ବୋବାଳିରେ ଗଁା ଫାଟି ପଡୁଥିବା ବେଳେ ବଡ଼ପଡ଼ା ଗ୍ରାମରେ ଶୋକାକୁଳ ପରିବେଶ ସୃଷ୍ଟି ହୋଇଛି।
ସୂଚନା ଅନୁଯାୟୀ, ବଡ଼ପଡ଼ା ଗ୍ରାମର ରତ୍ନାକର ମଳିକଙ୍କ ବଡ଼ପୁଅ ଜାଗେଶ୍ୱରଙ୍କ ଚଉଦକୁଲାଟ ଅଞ୍ଚଳରେ ବିବାହ ପାଇଁ ଗୁରୁବାର ତିଥି ଧାର୍ଯ୍ୟ ହୋଇଥିଲା। ସମସ୍ତ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚତ୍ଥିଲା। ବରଯାତ୍ରୀ ବାଇକ୍ରେ ଯିବା ପାଇଁ ବର ଘର ପକ୍ଷରୁ ଏକ ପ୍ଲାଷ୍ଟିକ ଜାରରେ ପେଟ୍ରୋଲ ଆଣି ଘରେ ରଖାଯାଇଥିଲା। ବରଯାତ୍ରୀ କନ୍ୟାଘର ଅଭିମୁଖେ ଯିବା ପାଇଁ ପ୍ରସ୍ତୁତ ହୋଇ ସାରିଥିଲେ। ବର ଓ ବରଯାତ୍ରୀ କନ୍ୟାଘର ଅଭିମୁଖେ ବାହାରିବାର ୧୦ ମିନିଟ୍ ପୂର୍ବରୁ ଅଗ୍ନିକାଣ୍ଡ ଘଟିଗଲା। ପେଟ୍ରୋଲକୁ ଲାଗି ଏକ ହେଁସ ରଖାଯାଇଥିଲା। ତାହା ଉପରେ ବିଦ୍ୟୁତ୍ ତାର ଯାଇଥିଲା। ବିଦ୍ୟୁତ୍ ଶର୍ଟ ସର୍କିଟ ଯୋଗୁ ନିଅଁା ଝୁଲ ପଡ଼ି ରଖାଯାଇଥିବା ହେଁସ ଉପରେ ପଡ଼ି ପେଟ୍ରୋଲରେ ଲାଗି ଯାଇଥିଲା। ନିମିଷକେ ଏହି ନିଅଁା ଘରର ଚାରି ଆଡେ ବ୍ୟାପୀ ଯାଇଥିଲା। ଘରେ ବନ୍ଧୁ ବାନ୍ଧବ, ସ୍ତ୍ରୀ, ପିଲା, ଭର୍ତ୍ତି ହୋଇ ରହିଥିଲେ। ନିଆଁ ମଧ୍ୟରୁ ପଦାକୁ ବାହାରି ଆସିବା ପାଇଁ ହୋହଲ୍ଲା ହୋଇଥିଲା। ଠେଲା ପେଲାରେ ଯିଏ ଯେମିତି ପାରିଲେ ପଦାକୁ ଦୌଡ଼ି ପଳାଇ ଆସିଥିଲେ। ହେଲେ ପିଉସୀ ଘରକୁ ବିବାହ ଉତ୍ସବରେ ଯୋଗ ଦେବାକୁ ଯାଇଥିବା ପଟ୍ଟାମୁଣ୍ଡାଇ ପୌରାଞ୍ଚଳର ଅନ୍ତର୍ଗତ ମାଟିଆ ଗ୍ରାମର ଅରବିନ୍ଦ ମଳିକ (ପପୁ)ଙ୍କ ପୁଅ ଗୁଗୁଲ (୩) ଘର ଭିତର ନିଆଁରୁ ବାହାରି ପାରି ନ ଥିଲେ। ଫଳରେ ଗୁଗୁଲୁ ଜୀବନ୍ତ ଦଗ୍ଧ ହୋଇଯାଇଥିଲେ। ପୁତୁରା ଗୁଗୁଲକୁ ବଞ୍ଚାଇବାକୁ ଯାଇ ଦାଦା ଶିପୁ ମଳିକ(୧୪) ଗୁରୁତର ଆହତ ହୋଇଛନ୍ତି। ମୃତ ଓ ଆହତଙ୍କୁ ଉଦ୍ଧାର କରାଯାଇ ପ୍ରଥମେ ପଟ୍ଟାମୁଣ୍ଡାଇ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ସେଠାରେ ଶିଶୁ ପୁତ୍ର ଗୁଗୁଲକୁ ଡାକ୍ତର ମୃତ ଘୋଷଣା କରିଥିଲେ। ଅବସ୍ଥା ସଙ୍କଟାପନ୍ନ ହେବାରୁ ଶିପୁଙ୍କୁ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଅନ୍ୟପକ୍ଷେ ଏହି ଅଗ୍ନିକାଣ୍ଡରେ ବଡ଼ପଡ଼ା ଗ୍ରାମର ତ୍ରିନାଥ ମଳିକ(୪୦) ଓ ତିଗିରିଆ ଗ୍ରାମର ତପନ ମଳିକ (୪୨) ମଧ୍ୟ ଆହତ ହୋଇଛନ୍ତି। ଆହତମାନଙ୍କୁ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟକୁ ପଠାଯାଇଛି। ବିଦ୍ୟୁତ୍ ଶର୍ଟ ସର୍କିଟ ଯୋଗୁ ଅଗ୍ନିକାଣ୍ଡ ଘଟିଥିବା କେତେଜଣ କହୁଥିବା ବେଳେ ବରଯାତ୍ରାଙ୍କ ବାଇକ୍ରେ ପେଟ୍ରୋଲ ଭରିବା ସମୟରେ ସିଗାରେଟ୍ ନିଅଁାରୁ ଅଗ୍ନିକାଣ୍ଡ ଘଟିଥିବା କୁହାଯାଉଛି। ହେଲେ ଅଗ୍ନିକାଣ୍ଡ ପ୍ରକୃତ କାରଣ ଜଣାପଡ଼ିନାହିଁ। ଘଟଣାସ୍ଥଳରେ ଗ୍ରାମାଞ୍ଚଳ ଥାନା ଆଇଆଇସି ପଦ୍ମାଳୟା ପ୍ରଧାନ ପହଞ୍ଚତ୍ ଘଟଣାର ତଦନ୍ତ ଆରମ୍ଭ କରିଛନ୍ତି।