ଭବାନୀପାଟଣା,୬ା୩(ସ୍ବ.ପ୍ର.): ବେଦାନ୍ତ ଲିମିଟେଡ୍ରେ ଘଟିଛି ଅଘଟଣ। ବକ୍ସାଇଟ୍ ବୋଝେଇ ଓ ଖଲାସ କରିବା ପାଇଁ ଓଏସ୍ଏଲ କମ୍ପାନୀ ନିୟୋଜିତ ଥିବାବେଳେ ଏହା ଅଧୀନରେ ଥିବା ରାୟଗଡ଼ା ଜିଲା ମୁନିଗୁଡ଼ାର ଜନୈକ ବ୍ୟକ୍ତିଙ୍କ ହାଇଓ୍ବା ଟ୍ରକ୍ ଏଥିରେ ଭଡ଼ାରେ ଲାଗିଥିଲା। ଶନିବାର ବିଳମ୍ବିତ ରାତିରେ ବକ୍ସାଇଟ୍ ବୋଝେଇ କରି କମ୍ପାନୀର ବକ୍ସାଇଟ ୟାର୍ଡକୁ ଯାଉଥିବାବେଳେ ରାସ୍ତାର ଏକ ଖାଲରେ ପଡ଼ି ଏହି ହାଇଓ୍ବାଟି ଓଲଟି ପଡ଼ିଥିଲା। ଏହି ସମୟରେ ରାସ୍ତାକଡ଼ରେ ପାଣି ପିଇବାକୁ ଯାଇ ଠିଆ ହୋଇଥିବା ଏଲ୍ ଆଣ୍ଡ ଟି କମ୍ପାନୀର ଦୁଇଜଣ ଶ୍ରମିକ ଝାଡ଼ଖଣ୍ଡ ରାଜ୍ୟ ବୋକାରୋ ଅଞ୍ଚଳର ଅଭିମନ୍ୟୁ ଜେନା ଓ ମୁକେଶ ଟୁଡୁଙ୍କ ଉପରେ ହାଇଓ୍ବାଟି ଓଲଟି ପଡ଼ିବାରୁ ଘଟଣାସ୍ଥଳରେ ହିଁ ଚାପି ହୋଇ ଉଭୟ ଶ୍ରମିକଙ୍କ ମୃତ୍ୟୁ ଘଟିଥିଲା। ତେବେ ସକାଳ ଯାଏ ଏହି ଘଟଣାକୁ ଚାପିଦେବାକୁ ଉଦ୍ୟମ କରାଯାଇଥିବାବେଳେ ଶେଷରେ ଶ୍ରମିକ ଅଶାନ୍ତି ବଢ଼ିବା ଆଶଙ୍କା କରି ମୃତ ଶରୀରକୁ ଲାଞ୍ଜିଗଡ଼ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଅଣାଯାଇଛି। ସେଠାରେ ଡାକ୍ତର ଉଭୟ ଶ୍ରମିକଙ୍କୁ ମୃତ ଘୋଷଣା କରିବା ପରେ କମ୍ପାନୀ ପକ୍ଷରୁ ତରବରିଆ ଭାବେ ମୃତଦେହ ବ୍ୟବଚ୍ଛେଦ କରିବାକୁ ଉଦ୍ୟମ କରାଯାଉଥିବା ଜଣାପଡ଼ିଛି। ଏ ନେଇ ଲାଞ୍ଜିଗଡ଼ ପୋଲିସ ପକ୍ଷରୁ ଏକ ମାମଲା ରୁଜୁ କରି ଦୁର୍ଘଟଣା ଘଟାଇଥିବା ହାଇଓ୍ବାକୁ ଜବତ କରାଯାଇଥିବା ଲାଞ୍ଜିଗଡ଼ ଥାନାଧିକାରୀ ସତ୍ୟାନନ୍ଦ ପାତ୍ର ସୂଚନା ଦେଇଛନ୍ତି। ଅପରପକ୍ଷରେ ଦୁର୍ଘଟଣା ଘଟାଇଥିବା ଟ୍ରକର ମାଲିକ ଓ ମାସିକ ଭଡ଼ାରେ ଲଗାଇଥିବା ଓଏସ୍ଏଲ କମ୍ପାନୀ ତଥା ଶ୍ରମିକମାନଙ୍କ ନିଯୁକ୍ତିଦାତା ଏଲ୍ଆଣ୍ଡଟି କମ୍ପାନୀ ଶ୍ରମିକ ମୃତ୍ୟୁ ଘଟଣାକୁ ଅତ୍ୟନ୍ତ ହାଲକା ଭାବେ ନେଇଥିବାରୁ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ସେହିପରି ଲାଞ୍ଜିଗଡ଼ ଅଞ୍ଚଳରେ ଶ୍ରମିକ ସୁରକ୍ଷା ନେଇ କାର୍ଯ୍ୟରତ ବିଭିନ୍ନ ସଂଗଠନର ନିଷ୍କ୍ରିୟତାକୁ ନେଇ ଏକ ବିରାଟ ପ୍ରଶ୍ନବାଚୀ ସୃଷ୍ଟି ହୋଇଛି।