ଚଢ଼େଇଧରା, ୪।୪(ଡି.ଏନ.ଏ.): ଧର୍ମଶାଳା ବ୍ଲକର ବରଡା, ଲୁଣିବେର, ବିଛାଖଣ୍ଡି ଓ ରାହାଡପୁରଠାରେ ଥିବା ଏକାଧିକ କ୍ରସର ଉପରେ ସୋମବାର ଆୟକର ବିଭାଗ ତରଫରୁ ଚଢାଉ କରାଯାଇଛି। ସକାଳୁ ଆରମ୍ଭ ହୋଇଥିବା ଚଢାଉରେ ବହୁ ସଂଖ୍ୟକ କର୍ମଚାରୀ ସାମିଲ ହୋଇଥିଲେ। ବରଡା ମୌଜାରେ ରହିଥିବା ଅମିତ କ୍ରସର, ଉତ୍କଳ କ୍ରସର, ମୁଦୁଲି କ୍ରସର ଓ ଏକ ତେଲ ଟାଙ୍କି ଉପରେ ଚଢାଉ ହୋଇଥିବା ସୂଚନା ମିଳିଛି। ତେବେ ଏ ସଂକ୍ରାନ୍ତରେ ସବିଶେଷ ସୂଚନା ମିଳିନାହିଁ। ଚଢାଉରେ ସାମିଲ ଥିବା ଅଧିକାରୀମାନେ କିଛି କହିବାକୁ ମନା କରିଛନ୍ତି। ତେବେ ଏହା ଆୟକର ବିଭାଗର ଚଢାଉ ବୋଲି କହିଛନ୍ତି। ଚଢାଉ ସମୟରେ ଏକାଧିକ କମ୍ପ୍ୟୁଟରର ହାର୍ଡ ଡିକ୍ସ ଜବତ କରିଥିବା ସୁଚନା ମିଳିଛି। ଏଭଳି ଚଢାଉ ୨୦୨୨ ଜୁଲାଇ ୧୬ରେ ହୋଇଥିଲେ ମଧ୍ୟ ଅଦ୍ୟାବଧି କୌଣସି ତଥ୍ୟ ମିଳିପାରି ନାହିଁ। ଅନ୍ୟପକ୍ଷେ ବହୁ ବଡ କ୍ରସର ଏହି ଚଢାଉରୁ ବାଦ ପଡିଛି। ବରଡା ମୌଜାରେ ଥିବା ମା ଓ ଚଣ୍ଡୀ କ୍ରସରରେ ଚଢାଉ କରାଯାଇ ନାହିଁ। ଏହି ଚଢାଉ ସଂକ୍ରାନ୍ତରେ ଖବର ପ୍ରଚାରିତ ହେବା ପରେ ଧର୍ମଶାଳା ଅଞ୍ଚଳରେ ଚାଲିଥିବା କ୍ରସରଗୁଡିକରେ ତାଲା ଝୁଲୁଥିବା ଦେଖିବାକୁ ମିଳିଛି।
