ନୂଆଦିଲ୍ଲୀ,୧୦।୭: ଜାତୀୟ ବିଲ୍ଡିଂ ନିର୍ମାଣ କର୍ପୋରେଶନ (ଏନ୍ବିସିସି)ର ପୂର୍ବତନ ସିଜିଏମ୍ ଡି.କେ.ମିତ୍ତଲଙ୍କ ଘରେ ଶନିବାର ଆୟକର ବିଭାଗ ଚଢ଼ାଉ କରିଛି। ଏପରିକି ଚଢ଼ାଉ ସମୟରେ ତାଙ୍କ ଘରୁ ନଗଦ କୋଟି କୋଟି ଟଙ୍କା, ଅଳଙ୍କାର, ଏବଂ ଅନ୍ୟାନ୍ୟ ଦସ୍ତାବିଜ ମଧ୍ୟ ମିଳିଥିବା ସୂଚନା ମିଳିଛି। ମିତ୍ତଲଙ୍କ ଘରୁ ବିଭାଗ ଏତେ ପରିମାଣର ଟଙ୍କା ଜବତ କରିଛି ଯେ ଏହାକୁ ଗଣିବା ପାଇଁ ୨ଟି ଟଙ୍କା ଗଣିବା ମେଶିନ ମଗାଯାଇଛି। ଜାତୀୟ ଗଣମାଧ୍ୟମର ସୂଚନା ମୁତାବକ ମିତ୍ତଲଙ୍କ ଘରୁ ରାତି ୮ ଘଟିକା ମଧ୍ୟରେ ୨କୋଟିରୁ ଅଧିକ ଟଙ୍କା ମିଳିସାରିଲାଣି। ସେହିପରି ତାଙ୍କ ଘରୁ ଅଧିକ ପରିମାଣରେ ସୁନା ଅଳଙ୍କାର ଓ ଅନ୍ୟାନ୍ୟ ସାମଗ୍ରୀ ମଧ୍ୟ ଜବତ କରାଯାଇଛି। କୁହାଯାଉଛି କି ପୂର୍ବତନ ସିଜିଏମ୍ଙ୍କ ଘରୁ ମିଳିଥିବା ଟଙ୍କା ଓ ଅଳଙ୍କାର ବାବଦରେ ସମ୍ପୂର୍ଣ୍ଣ ବିବରଣୀ ବିଭାଗ ପକ୍ଷରୁ ପ୍ରକାଶ କରାଯାଇନାହିଁ ।
