ନୂଆଦିଲ୍ଲୀ, ୨୪।୧୨ (ପି.ଟି.):କରୋନା ଭୂତାଣୁର ଓମିକ୍ରନ୍ ଭାରିଆଣ୍ଟ ସଂକ୍ରମଣ ଭାରତରେ ବଢ଼ିବାରେ ଲାଗିଛି। ସଂକ୍ରମଣରୁ ଲୋକଙ୍କୁ ସୁରକ୍ଷା ଦେବା ଲାଗି ନିର୍ବାଚନ ହେବାକୁ ଥିବା ରାଜ୍ୟଗୁଡ଼ିକରେ କୋଭିଡ୍ ଟିକାକରଣ ବଢ଼ାଇବା ପାଇଁ କେନ୍ଦ୍ର ସରକାର ପରାମର୍ଶ ଦେଇଛନ୍ତି। ଉତ୍ତରପ୍ରଦେଶ, ପଞ୍ଜାବ, ଉତ୍ତରାଖଣ୍ଡ, ଗୋଆ ଆଦି ରାଜ୍ୟରେ ଆସନ୍ତାବର୍ଷ ଆରମ୍ଭରେ ବିଧାନସଭା ନିର୍ବାଚନ ହେବାକୁ ଥିବାବେଳେ ଏବେଠାରୁ ପ୍ରଚାର ପୂରା ଦମ୍ରେ ଆରମ୍ଭ ହୋଇଗଲାଣି। ବିଭିନ୍ନ ସ୍ଥାନରେ ହେଉଥିବା ରାଲିରେ ହଜାର ହଜାର ଲୋକଙ୍କ ସମାବେଶ ହେଉଛି। ଏହ ସମାବେଶଗୁଡ଼ିକ କରୋନା ଭୂତାଣୁ ସଂକ୍ରମଣ ହଟ୍ସ୍ପଟ୍ ପାଲଟିପାରେ ବୋଲି ଆଶଙ୍କା କରାଯାଉଛି। ତେଣୁ ସମ୍ପୃକ୍ତ ରାଜ୍ୟଗୁଡ଼ିକରେ ଟିକାକରଣ ବଢ଼ାଇବା ସହ ଅଧିକ ସତର୍କତା ଅବଲମ୍ବନ କରିବା ଲାଗି କେନ୍ଦ୍ର ପକ୍ଷରୁ ପରାମର୍ଶ ଦିଆଯାଇଛି। ଖ୍ରୀଷ୍ଟମାସ୍ ଏବଂ ନୂଆବର୍ଷ ପୂର୍ବରୁ ସ୍ଥାନୀୟ ସ୍ତରରେ କଟକଣା ଲଗାଇବା ସମ୍ପର୍କରେ ବିଚାର କରିବା ଲାଗି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ କୁହାଯାଇଛି। କୋଭିଡ୍ ଏବଂ ଓମିକ୍ରନ୍ ସଂକ୍ରମଣର ମୁକାବିଲା ଲାଗି କେନ୍ଦ୍ର ସ୍ବାସ୍ଥ୍ୟ ସଚିବ ରାଜେଶ ଭୂଷଣ ଭିଡିଓ କନ୍ଫରେନ୍ସ ଜରିଆରେ ରାଜ୍ୟଗୁଡ଼ିକର ଜନସ୍ବାସ୍ଥ୍ୟ ପ୍ରସ୍ତୁତିର ସମୀକ୍ଷା କରିବା ସହ ଟିକାକରଣ ଅଗ୍ରଗତି ସମ୍ପର୍କରେ ବୁଝିଥିଲେ। ରାଜ୍ୟଗୁଡ଼ିକ କୋଭିଡ୍ ମୁକାବିଲା ଉଦ୍ୟମରୁ ଓହରି ନ ଯାଇ ପ୍ରସ୍ତୁତ ହୋଇ ରହିବାକୁ ଭୂଷଣ ପରାମର୍ଶ ଦେଇଛନ୍ତି।
