ଭୁବନେଶ୍ୱର,୧୯ା୭(ବ୍ୟୁରୋ):ଚଳିତ ଆର୍ଥିକ ବର୍ଷ ୨୦୨୨-୨୩ ମେ’ ସୁଦ୍ଧା ନିଜସ୍ବ ରାଜସ୍ବ ବାବଦକୁ ୧୫, ୯୮୯ କୋଟି ୮୭ ଲକ୍ଷ ଟଙ୍କା ସଂଗ୍ରହ କରାଯାଇଛି। ସେଥିରୁ ନିଜସ୍ବ ଟିକସ ବାବଦକୁ ୬,୬୬୩ କୋଟି ୫୮ ଲକ୍ଷ, ନିଜସ୍ବ ଅଣଟିକସ ରାଜସ୍ବ ବାବଦକୁ ୯, ୩୨୬ କୋଟି ୨୯ ଲକ୍ଷ ଆଦାୟ କରାଯାଇଛି। ଗତ ଆର୍ଥିକ ବର୍ଷର ଏହି ସମୟ ସୁଦ୍ଧା ଯଥାକ୍ରମେ ୨୪.୩୩ ଏବଂ ୫୧.୯୯ ପ୍ରତିଶତ ଅଧିକ। ସୋମବାର ପ୍ରଶ୍ନକାଳରେ ବିଜେଡି ସଭ୍ୟ ଭୂପିନ୍ଦର ସିଂଙ୍କ ମୂଳ ପ୍ରଶ୍ନରେ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ଏହା କହିଛନ୍ତି। ମନ୍ତ୍ରୀ କହିଛନ୍ତି ଯେ ଖଣି ରାଜସ୍ବ ୨୦୨୦-୨୧ରେ ୧୩,୭୯୧ କୋଟି ୭୨ ଲକ୍ଷ ଆଦାୟ ହୋଇଛି। ୨୦୨୧-୨୨ ଆର୍ଥିକ ବର୍ଷରେ ୧୩,୭୦୦ କୋଟି ରାଜସ୍ବ ଆଦାୟ ଲକ୍ଷ୍ୟ ରଖାଯାଇଥିବା ବେଳେ ୪୮,୬୪୨ କୋଟି ୨ ଲକ୍ଷ ସଂଗ୍ରହ କରାଯାଇଛି। ଯାହାକି ଧାର୍ଯ୍ୟ ଲକ୍ଷ୍ୟର ୩୫୫.୫ ପ୍ରତିଶତ। ସେହିପରି ଅବକାରୀ ରାଜସ୍ବ ୨୦୨୦-୨୧ରେ ୫୦୫୩ କୋଟି ୬ ଲକ୍ଷ ଟଙ୍କା ସଂଗ୍ରହ କରାଯାଇଥିବା ବେଳେ ଏ ବାବଦରେ ମୋଟ ୫୫୨୭ କୋଟି ୬୦ ଲକ୍ଷ ଟଙ୍କା ପ୍ରାପ୍ତ ହୋଇଛି ବୋଲି ମନ୍ତ୍ରୀ କହିଛନ୍ତି। ମୂଳ ପ୍ରଶ୍ନକର୍ତ୍ତା ପୁଣି ପଚାରିଲେ, ଗତ ୧୦ ବର୍ଷ ହେଲା କୋଇଲା ରୟାଲଟି ବାବଦରେ ରାଜ୍ୟ ସରକାର କେଉଁ ସଂସ୍ଥାରୁ କେତେ ପାଇଛନ୍ତି। ମନ୍ତ୍ରୀ କହିଲେ, ରାଜ୍ୟକୁ ବର୍ଦ୍ଧିତ କୋଇଲା ରୟାଲଟି ମିଳୁ ନାହିଁ। ଭାଜପା ସଭ୍ୟ ମୋହନ ମାଝି ପଚାରିଲେ, ରାଜ୍ୟର ନିଜସ୍ବ ଆୟ ବୃଦ୍ଧି ପାଇଁ କି ବ୍ୟବସ୍ଥା ରହିଛି। ରାଜ୍ୟର କେତେ ଅଭିବୃଦ୍ଧି ହୋଇଛି। ମନ୍ତ୍ରୀ କହିଲେ, ରାଜ୍ୟର ଅଭିବୃଦ୍ଧି ଗତ ୧୦ ବର୍ଷରେ ୭ ପ୍ରତିଶତ ହୋଇ ଆସିଥିଲା। ଚଳିତ ବର୍ଷ ୮ରୁ ୮.୫% ଲକ୍ଷ୍ୟଧାର୍ଯ୍ୟ କରାଯାଇଛି। କଂଗ୍ରେସ ସଭ୍ୟ ସୁରେଶ କୁମାର ରାଉତରାୟ କେନ୍ଦ୍ର ସରକାରଙ୍କ ଉପରେ ପଡ଼ି ରହିଥିବା ରାଜ୍ୟର ୯୦ ହଜାର କୋଟି ଟିକସକୁ ଆଦାୟ କରିବାକୁ କି ପଦକ୍ଷେପ ନିଆଯାଇଛି ବୋଲି ପ୍ରଶ୍ନ କରିଥିଲେ। ସେହିପରି ବିଜେଡି ସଭ୍ୟ ମନୋହର ରନ୍ଧାରୀ ଜିଏସ୍ଟି ବାବଦକୁ କେନ୍ଦ୍ର ସରକାର କେତେ ଦେବାକୁ ବାକି ରହିଛି ବୋଲି ପଚାରିଥିଲେ। ମନ୍ତ୍ରୀ କହିଲେ, ୨୦୨୧-୨୨ରେ ୫,୫୨୭ କୋଟି ଜିଏସ୍ଟି ବାବଦରେ ଓଡ଼ିଶାକୁ ମିଳିଛି। ଚଳିତ ବର୍ଷ ଏ ପର୍ଯ୍ୟନ୍ତ ୬୪୯୬ କୋଟି ଟଙ୍କା ମିଳିଛି। ବକେୟା ଅର୍ଥ ପାଇବା ଲାଗି ରାଜ୍ୟ ସରକାର ଅଲ୍ ଇଣ୍ଡିଆ ଫାଇନାନ୍ସ କମିଶନ ନିକଟରେ ଦାବି କରିଛନ୍ତି।