ସମ୍ବଲପୁର, ୪। ୮(ବ୍ୟୁରୋ) ମୌସୁମୀ ବର୍ଷା ଠିକ୍ ସମୟରେ ଆସିଥିଲେ ମଧ୍ୟ ଧୋକା ଦେଇଛି। ଓଡ଼ିଶାର ବିଭିନ୍ନ ଜିଲାରେ ଅଦ୍ୟାବଧି ବର୍ଷା ପରିମାଣ ସ୍ବାଭାବିକ ହୋଇନାହିଁ। ପଡୋଶୀ ରାଜ୍ୟ ଛତିଶଗଡ଼ରେ ମଧ୍ୟ ଜୁଲାଇ ମାସରେ ବର୍ଷା ସ୍ବାଭାବିକ ହୋଇ ନ ଥିବା ଜଣାପଡିଛି। ତେଣୁ ହୀରାକୁଦ ଜଳ ଭଣ୍ଡାରକୁ ଜୁନ୍ ମାସରେ ହାରାହାରି ୦.୮୯୩ ମିଲିୟନ ଏକର ଫୁଟ ଜଳ ପ୍ରବେଶ କରିବାର ଥିବାବେଳେ ୨.୨୬୩ ମିଲିୟନ ଏକର ଫୁଟ ପ୍ରବେଶ କରିଥିଲା। ସେହିପରି ଜୁଲାଇ ମାସରେ ୫.୪୧୯ ମିଲିୟନ ଏକର ଫୁଟ ଜଳ ପ୍ରବେଶ କରିବାକୁ ଥିବାବେଳେ ୪.୧୬୩ ମିଲିୟନ ଏକର ଫୁଟ ପ୍ରବେଶ କରିଛି। ହୀରାକୁଦ ଡ୍ୟାମ୍କୁ ଜୁନ୍ରେ ଜଳ ପ୍ରବେଶ ବଢ଼ିଥିବା ବେଳେ ଜୁଲାଇରେ କମିଛି। ହେଲେ ବିଗତ ବର୍ଷ ତୁଳନାରେ ସୋମବାର ସୁଦ୍ଧା ହୀରାକୁଦ ଡ୍ୟାମ୍ରେ ଜଳସ୍ତର ସ୍ବାଭାବିକ ରହିଛି। ଉଭୟ ମାସକୁ ମିଶାଇଲେ ମୋଟ ୬.୪୨୬ ମିଲିୟନ ଏକର ଫୁଟ ଜଳ ଡ୍ୟାମ୍କୁ ଆସିଥିବା ହୀରାକୁଦ ଡ୍ୟାମ୍ କର୍ତ୍ତୃପକ୍ଷ ସୂଚନା ଦେଇଛନ୍ତି। ଅନ୍ୟପକ୍ଷେ ହୀରାକୁଦ ଜଳଭଣ୍ଡାରର ସ୍ଥିତି ଉପର ମୁଣ୍ଡ ଛତିଶଗଡ ରାଜ୍ୟ ବର୍ଷା ଉପରେ ମୁଖ୍ୟତଃ ନିର୍ଭର କରିଥାଏ। ଛତିଶଗଡ ଜଳସେଚନ ବିଭାଗ ସହ ସମନ୍ବୟ ରଖି ହୀରାକୁଦ ଜଳ ଭଣ୍ଡାରରୁ ଜଳ ନିଷ୍କାସନ କରାଯାଇଥାଏ। ଛତିଶଗଡରେ କମ୍ ବର୍ଷା ହେବାରୁ ଏବେ କମ୍ ଗେଟରେ ଜଳ ନିଷ୍କାସନ କରାଯାଉଛି। ହେଲେ ଜଳ ଭଣ୍ଡାରର ରୁଲ କର୍ଭ ଅନୁସାରେ ଜଳସ୍ତର ରହିଛି। ଏହି ଅନୁସାରେ ଜୁନ୍ ମାସରେ ସର୍ବନିମ୍ନ ୫୯୦ରୁ ୫୯୫, ଜୁଲାଇ ୧ ତାରିଖରେ ସର୍ବନିମ୍ନ ୫୯୦ରୁ ୬୦୦, ଜୁଲାଇ ୨୧ରେ ୬୦୦ରୁ ୬୧୦, ଅଗଷ୍ଟ ୧୧ ତାରିଖରେ ୬୦୫ରୁ ୬୫୧ ଫୁଟ ଜଳସ୍ତର ରହିବାର ନିୟମ ରହିଛି। କିନ୍ତୁ ସୋମବାର ରିପୋର୍ଟ ଅନୁସାରେ ଡ୍ୟାମ୍ର ଜଳସ୍ତର ୬୦୫.୨୭ ଫୁଟ ରହିଛି। ୨୦୧୯ ଅଗଷ୍ଟ ୩ ତାରିଖରେ ମଧ୍ୟ ଜଳସ୍ତର ୬୦୭.୧୫ ଫୁଟ୍ ରହିଥିଲା। ଅନ୍ୟପଟେ ପ୍ରତିବର୍ଷ ବର୍ଷା ପୂର୍ବରୁ ଛତିଶଗଡ ଓ ଓଡ଼ିଶା ମଧ୍ୟରେ ଜଳ ପରିଚାଳନା ବୈଠକ ଅନୁଷ୍ଠିତ ହୋଇଥାଏ। ତେବେ ଏଯାଏ ଉଭୟ ରାଜ୍ୟ ମଧ୍ୟରେ ଏହି ବୈଠକ ଅନୁଷ୍ଠିତ ହୋଇନ ଥିବା ଜଣାପଡିଛି। ଜୁଲାଇ ଶେଷ ସପ୍ତାହରେ ବନ୍ଧ ସୁରକ୍ଷା କମିଟିକୁ ଏ ଦିଗରେ ପଦକ୍ଷେପ ନେବାକୁ ସରକାରଙ୍କ ପକ୍ଷରୁ ଚିଠି କରାଯାଇଥିଲା। ସୂଚନାଯୋଗ୍ୟ, ହୀରାକୁଦ ଜଳଭଣ୍ଡାରର ସର୍ବନିମ୍ନ ୫୯୦ ଓ ସର୍ବାଧିକ ୬୩୦ ଫୁଟ ଜଳସ୍ତର ରହିବା କ୍ଷମତା ରହିଛି। ଜଳଭଣ୍ଡାରରେ ପ୍ରତିବର୍ଷ ୨୪.୧୯୯ ମିଲିୟନ ଏକର ଫୁଟ ଜଳ ରହିଥାଏ। ଏଥିରେ ବର୍ଷ ତମାମ ବୁର୍ଲା ପାୱାର ହାଉସ, ଚିପିଲିମା ପାୱାର ହାଉସ, ଚାଷ ଓ କମ୍ପାନୀକୁ ଜଳ ଯୋଗାଇ ଦିଆଯାଇଥାଏ। ଜୁନ ମାସରେ ଜଳଭଣ୍ଡାରରୁ ୧.୮୧୧, ଜୁଲାଇରେ ୩.୦୭୮ ମିଲିୟନ ଏକର ଜଳ ନିଷ୍କାସନ ହୋଇଛି। ସେଥିମଧ୍ୟରୁ ଜୁନ ମାସରେ ପାୱାର ଜେନେରେଟ୍ ପାଇଁ ୦.୭୯୪ ମିଲିୟନ ଏକର ଫୁଟ, ଜୁଲାଇରେ ୦.୮୦୯ ମିଲିୟନ ଏକର ଫୁଟ ନିଷ୍କାସିତ ହୋଇଛି। ସେହିପରି କୃଷି କାର୍ଯ୍ୟ ପାଇଁ ଜୁନ ମାସରେ ଶାସନ ଓ ବରଗଡ କେନାଲରେ ୦.୦୨୮, ଜୁଲାଇ ମାସରେ ୦.୨୫୧ ମିଲିୟନ ଏକର ଫୁଟ ପାଣି ଛଡାଯାଇଛି। ଜୁନରେ ୦.୦୪୫ ଓ ଜୁଲାଇରେ ୦.୦୨୦ ମିଲିୟନ ଏକର ଫୁଟ ଜଳ ଖରାରେ ବାଷ୍ପୀଭୂତ ହୋଇଥିବା ହୀରାକୁଦ ଜଳଭଣ୍ଡାର କର୍ତ୍ତୃପକ୍ଷ ସୂଚନା ଦେଇଛନ୍ତି।