ଭୁବନେଶ୍ୱର,୨୯ା୭(ବ୍ୟୁରୋ): ଆତ୍ମହତ୍ୟାଜନିତ ମୃତ୍ୟୁ ଏବେ ଚିନ୍ତା ବଢ଼ାଇଛି। ଗତ କିଛିବର୍ଷ ହେବ ବିଶେଷକରି କରୋନା କାଳରେ ରାଜଧାନୀରେ ଆତ୍ମହତ୍ୟା ଘଟଣା ବୃଦ୍ଧି ପାଇବାରେ ଲାଗିଛି। ପାରିବାରିକ କଳହ ହେଉ କିମ୍ବା ବ୍ୟକ୍ତିଗତ ସମସ୍ୟା, ମାନସିକ ଭାରସାମ୍ୟ ହରାଇ ଅନେକ ଲୋକ ଆତ୍ମହତ୍ୟା ଭଳି ରାସ୍ତାକୁ ଆପଣାଉଛନ୍ତି। ତେବେ କୋଭିଡ୍ ମହାମାରୀ ଲୋକଙ୍କ ଜୀବନ ଜୀବିକାରେ ବିପର୍ଯ୍ୟୟ ଘଟାଇଥିବାବେଳେ ଅଧିକାଂଶ ଲୋକ ଅର୍ଥାଭାବରୁ ମାନସିକ ଚାପରେ ରହୁଛନ୍ତି। ମୁଖ୍ୟତଃ ଲକ୍ଡାଉନ ସମୟରେ ରୋଜଗାର ହରାଇବା, ଚାକିରିରୁ ବିତାଡିତ ହେବା, ମାନସିକ ଚାପ ଆଦି ଅନେକ କାରଣ ରାଜଧାନୀବାସୀଙ୍କ ମନରେ ଆମହତ୍ୟା ପ୍ରବଣତା ବଢ଼ାଇ ଦେଇଥିବା ଜଣାପଡିଛି। ଏ ସଂକ୍ରାନ୍ତ ଏକ ରିପୋର୍ଟ ପ୍ରକାଶ ଆଧାରରେ ଡିସିପି ଉମାଶଙ୍କର ଦାଶ କହିଛନ୍ତି, ୨୦୨୦ରେ ସହରରୁ ମୋଟ ୩୧୦ଜଣ ଆତ୍ମହତ୍ୟା କରିଥିବାବେଳେ ଚଳିତବର୍ଷ ଜୁନ୍ ପର୍ଯ୍ୟନ୍ତ ୧୫୧ଜଣ ଆତ୍ମହତ୍ୟା କରିଛନ୍ତି। ଗତବର୍ଷ ଜାନୁୟାରୀରୁ ଜୁନ୍ ମଧ୍ୟରେ ୧୪୨ଜଣ ଆତ୍ମହତ୍ୟା କରିଥିବାବେଳେ ଚଳିତବର୍ଷ ଏହି ସଂଖ୍ୟାରେ ବୃ୍ଦ୍ଧି ଘଟିଛି। ଗତ ଦୁଇମାସରେ ୩୮ଜଣ ଆତ୍ମହତ୍ୟା କରିଛନ୍ତି। ଏମାନଙ୍କ ମଧ୍ୟରେ ମେ’ରେ ୧୬ଜଣ ଓ ଜୁନ୍ରେ ୨୨ଜଣ ଆଖି ବୁଜିଛନ୍ତି। ତେବେ କରୋନାର ପ୍ରଥମ ଲହରରେ ଆତ୍ମହତ୍ୟା ସଂଖ୍ୟା ଅଧିକ ରହିଥିଲା। ୨୦୨୦ ମେ’ରେ ୧୮ଜଣ ଓ ଜୁନ୍ରେ ୩୧ଜଣ ଆତ୍ମହତ୍ୟା କରିଥିଲେ। ତେବେ ୨୦୧୯ରେ ୨୨୦ଜଣ ଆତ୍ମହତ୍ୟା କରିଛନ୍ତି। ସେତେବେଳେ ମାନସିକ ବିସାଦ କାରଣରୁ ଆତ୍ମହତ୍ୟା ପ୍ରବଣ ଦେଖାଯାଉଥିବା ଜଣାପଡ଼ିଛି। ତେବେ ଆତ୍ମହତ୍ୟା କରିଥିବା ଲୋକଙ୍କ ମଧ୍ୟରୁ ଅଧିକାଂଶ ୩୦ରୁ ୪୦ବର୍ଷ ବୟସର। ଅଧିକାଂଶ ବିଷ ପିଇ ଓ ରଶି ଲଗାଇ ଆତ୍ମହତ୍ୟା କରିଛନ୍ତି। ପାରିବାରି କଳହ, ରୋଜଗାର ହରାଇବା ବାଦ୍ ଦେଲେ କରୋନା କାଳରେ ଦୀର୍ଘଦିନ ଧରି ବନ୍ଦୀ ହୋଇ ରହିବାର ଚାପ, ଇଏମ୍ଆଇ ଋଣଭାର ଲୋକଙ୍କୁ ଆତ୍ମହତ୍ୟା କରିବାକୁ ବାଧ୍ୟକରୁଥିବା ମନସ୍ତତ୍ତ୍ୱବିତ୍ମାନେ ମତ ଦେଇଛନ୍ତି। କୌଣସି ବ୍ୟକ୍ତି ଗଭୀର ମାନସିକ ଚାପରେ ଥିବା ଜଣାପଡ଼ିଲେ ସେମାନଙ୍କୁ ମାନସିକସ୍ତରରେ ସହାୟତା ଦେବା ସହ କାଉନସେଲିଂ କରିବା ଦରକାର। ଏହାଦ୍ୱାରା ତାଙ୍କ ମନରେ ଥିବା ଚାପ ହ୍ରାସ ହେବ ବୋଲି ସେମାନେ କହିଛନ୍ତି।
ନଦୀକୁ ଡେଇଁ ଯୁବତୀଙ୍କ ଆତ୍ମହତ୍ୟା ଉଦ୍ୟମ
ମଞ୍ଚେଶ୍ୱର ଥାନା ଅନ୍ତର୍ଗତ କୁଆଖାଇ ବ୍ରିଜ୍ ଉପରୁ ବୁଧବାର ନଦୀକୁ ଡେଇଁ ଜଣେ ଯୁବତୀ ଆତ୍ମହତ୍ୟା ଉଦ୍ୟମ କରିଛନ୍ତି। ସ୍ଥାନୀୟ ଲୋକେ ତାଙ୍କୁ ଧରିପକାଇବାରୁ ସେ ବଞ୍ଚତ୍ୟାଇଛନ୍ତି। ପୋଲିସ ଘଟଣାସ୍ଥଳରେ ପହଞ୍ଚତ୍ ଯୁବତୀଙ୍କୁ ଉଦ୍ଧାର କରି ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରିଛି। ସମ୍ପୃକ୍ତ ଯୁବତୀଙ୍କ ବୟସ ୧୮ ହୋଇଥିବାବେଳେ ସେ ଶହୀଦନଗର ଥାନା ନିକୋପାର୍କ ନିକଟ ଲକ୍ଷ୍ମୀନାରାୟଣ ବସ୍ତିରେ ରହୁଥିବା ଜଣାପଡିଛି। ପୋଲିସ ସୂଚନାନୁଯାୟୀ ଯୁବତୀଙ୍କ ବାପାଙ୍କ ମୃତ୍ୟୁ ହୋଇଯାଇଥିବା ବେଳେ ସେ ଏକମାତ୍ର ଭାଇଙ୍କ ପାଖରେ ରହୁଥିଲେ। ତେବେ ଯୁବତୀ ଜଣକ ତାଙ୍କ ଭାଇଙ୍କୁ ଟଙ୍କା ମାଗିବାରୁ ଅନେକ ସମୟରେ ପରିବାରରେ ଝଗଡା ହେଉଥିଲା। ଭାଇଙ୍କ ଆର୍ଥିକ ଆବସ୍ଥା ସ୍ବଚ୍ଛଳ ନଥିବାରୁ ଭାଇ ଟଙ୍କା ଦେବା ପାଇଁ ଅରାଜି ହେଉଥିଲେ। ତେଣୁ ଯୁବତୀ ଜଣକ ପରିବାର ଲେକଙ୍କ ସହ ଝଗଡା କରି ଆତ୍ମହତ୍ୟା କରିବାକୁ ନିଷ୍ପତ୍ତି ନେଇଥିଲେ। ମଧ୍ୟାନ୍ନ ୧୨ଟା ସମୟରେ ଘରୁ ପଳେଇ ଆସି ହଂପାଳ ନିକଟ କୁଆଖାଇ ବ୍ରିଜ୍ ଉପରୁ ଡେଇଁ ଜୀବନ ହାରିବାକୁ ଚାହିଁଥିଲେ। ସେହି ସମୟରେ ସ୍ଥାନୀୟ ଲୋକମାନେ ତାଙ୍କୁ ଉଦ୍ଧାର କରି ପୋଲସିକୁ ଖବର ଦେଇଥିଲେ।
