ନୂଆଦିଲ୍ଲୀ,୨୧।୧୨: ଗତ କିଛି ବର୍ଷ ମଧ୍ୟରେ ଭାରତୀୟ କମ୍ପାନୀଗୁଡିକର ସ୍ବଦେଶୀ ବ୍ରାଣ୍ଡର ଚାହିଦା ବୃଦ୍ଧି ପାଇବାରେ ଲାଗିଛି। ବିଶେଷ କରି ଇ-ମାର୍କେଟ୍ ଜରିଆରେ କାରବାର କରୁଥିବା ଇଲେକ୍ଟ୍ରୋନିକ୍ସ କମ୍ପାନୀ ଗୁଡିକ ଧୀରେ ଧୀରେ ଇଲେକ୍ଟ୍ରୋନିକ ବଜାରରେ ପ୍ରଭାବ ବିସ୍ତାର କରୁଛନ୍ତି। ଏପରିକି ବିଶ୍ୱର ତୃତୀୟ ବୃହତ୍ ଅର୍ଥନୀତିର ଦେଶ ଭାରତ ଇ-ବଜାରକୁ ଆୟତ୍ତ କରିବା ନେଇ ଯେଉଁ ସ୍ବପ୍ନ ଦେଖିଥିଲା ତାକୁ ଦେଶର କିଛି ପ୍ରମୁଖ ସ୍ବଦେଶୀ ବ୍ରାଣ୍ଡ ସାକାର କରିବା ଦିଗରେ କାର୍ଯ୍ୟ କରୁଛନ୍ତି। ବର୍ତ୍ତମାନ ଭାରତୀୟ ଇ-ଉପକରଣ ବଜାରରେ ୫୫%ର ବଜାର କାରବାର ଦେଶୀ କମ୍ପାନୀଗୁଡ଼ିକର ରହିଛି। ଏପରିକି ଇ-ମାର୍କେଟରେ ଗୋଇନ୍ଦା ତଥ୍ୟ ସଂଗ୍ରହ କରୁଥିବା ଘରୋଇ ସଂସ୍ଥା ଆଇଡିସି ଇଣ୍ଡିଆ ପକ୍ଷରୁ ନିକଟରେ ଏକ ବିସ୍ତୃତ ରିପୋର୍ଟ ପ୍ରକାଶ ପାଇଥିଲା। ବିଶେଷକରି ଇ-ଉପକରଣ ମଧ୍ୟରେ ପିନ୍ଧିବା, ଶୁଣିବା ଓ ପାୱାର ଉପକରଣ ଭଳି ଅନେକ କିଛି ଉତ୍ପାଦ ସାମିଲ ରହିଛି। ସେହିଭଳି ପିନ୍ଧିବାଯୋଗ୍ୟ ଇ-ଉପକରଣର ନୂଆ ନୂଆ ସୁବିଧା ଯୁକ୍ତ ଉତ୍ପାଦନ, ବିଭିନ୍ନ ଲୋଭନୀୟ ଅଫର ଓ ଅପେକ୍ଷାକୃତ ଶସ୍ତା ନୀତି ଯୋଗୁ ସମ୍ପୃକ୍ତ ବ୍ରାଣ୍ଡ୍ଗୁଡ଼ିକ ବଜାରରେ ଆଶାଠାରୁ ଭଲ କାରବାର କରିବାର ସକ୍ଷମ ହୋଇପାରିଛି। ଏପରିକି ବିଶ୍ୱ ଅର୍ଥନୈତିକ ମାନ୍ଦାବସ୍ଥା ଭୟର ମୋବାଇଲ ଉତ୍ପାଦନ କମୁଥିବା ବେଳେ ଭାରତୀୟ ପିନ୍ଧିବାଯୋଗ୍ୟ ଇ-ଉପକରଣ ବ୍ରାଣ୍ଡ୍ଗୁଡ଼ିକର ଉତ୍ପାଦନ କିନ୍ତୁ ଦ୍ୱିଗୁଣା ଗତିରେ ବୃଦ୍ଧି ପାଇବାରେ ଲାଗିଛି। ସେହିପରି ବର୍ତ୍ତମାନ ସ୍ଥିତିରେ ଭାରତର ପ୍ରମୁଖ ୫ଟି ପିନ୍ଧିବାଯୋଗ୍ୟ ଇ-ଉପକରଣ ମଧ୍ୟରୁ ଟପ୍-୩ରେ ୩ ଭାରତୀୟ ବ୍ରାଣ୍ଡ୍ ଇମାଜିନ ମାର୍କେଟିଂ କମ୍ପାନୀର ବୋଟ୍ ୩୨% ଚାହିଦା ଥିବାବେଳେ ନେକ୍ସବେସ୍ ନଏଜ୍ର ୧୪% ଓ ଫାୟାର ବୋଲ୍ଟ ୯%ର ଶେୟାର ରହିଥିବା ଜଣାପଡ଼ିଛି। ଅପରପକ୍ଷରେ ଚାଇନାର ୱାନ୍ ପ୍ଲସ୍ ୮% ରୁ ଅଧିକ ଏବଂ ରିୟଲ ମି ୪% ରୁ ଅଧିକ ବଜାର କାରବାର ରହିଛି। ଚାଇନାର ଉକ୍ତ ଦୁଇ ବ୍ରାଣ୍ଡ୍ ସମେତ ଭାରତ ର ୩ ପ୍ରମୁଖ ବ୍ରାଣ୍ଡ୍ ପିନ୍ଧିବାଯୋଗ୍ୟ ଇ-ଉପକରଣରେ ସାମିଲ ଅଛନ୍ତି।
ଉଲ୍ଲେଖଯୋଗ୍ୟ, ସାରା ବିଶ୍ୱରେ ଉଦ୍ୟୋଗ ଜଗତ ପାଇଁ କରୋନା ମହାମାରୀ ଏକ ବଡ଼ ଚ୍ୟାଲେଞ୍ଜ ଆଣିଥିଲା। ଏଭଳି ନିଅଣ୍ଟିଆ ସ୍ଥିତି ଯୋଗୁ ଭାରତୀୟ ସ୍ମାର୍ଟଫୋନ୍ ବଜାରରେ ୬୨% ଶେୟାର ହାସଲ କରିଥିବା ଚାଇନା ସ୍ମାର୍ଟଫୋନ୍ କମ୍ପାନୀଗୁଡ଼ିକ ଫୋନ ମାର୍କେଟରୁ ଧ୍ୟାନ ହଟାଇପାରିଲେ ନାହିଁ। ତାହା ସହିତ ଯୋଗାଣରେ ବାଧା ଉପୁଜିବା ଆଦି ସମସ୍ୟା ଯୋଗୁ ଚାଇନା କମ୍ପାନୀଗୁଡ଼ିକ ପିନ୍ଧିବାଯୋଗ୍ୟ ଇ-ଉପକରଣ ବଜାରକୁ ଦଖଲ କରିପାରିଲେ ନାହିଁ ବୋଲି ବଜାର ବିଶେଷଜ୍ଞମାନେ ଆଶଙ୍କା କରୁଥିବା ଜଣାପଡ଼ିଛି।