ଭୁବନେଶ୍ୱର, ୯।୨(ବ୍ୟୁରୋ): ଆଞ୍ଚଳିକ ବା ମାତୃଭାଷାରେ ବୈଷୟିକ ଶିକ୍ଷା ପ୍ରଚଳନ ପାଇଁ ଭାରତ ସରକାରଙ୍କ ଶିକ୍ଷା ମନ୍ତ୍ରଣାଳୟ ଯେଉଁ ଉଦ୍ୟମ ଆରମ୍ଭ କରିଛି, ତାହା ସଫଳତା ଏବେଠୁ ପ୍ରତିଫଳିତ ହେଲାଣି। ବିଶେଷକରି ଓଡ଼ିଆରେ ଇଞ୍ଜିନିୟରିଂ ପାଠପଢ଼ିବା ପାଇଁ ସର୍ବାଧିକ ଆଗ୍ରହ ପ୍ରକାଶ ପାଇଥିବା ଜଣାପଡିଛି।
ବିଭିନ୍ନ ଭାରତୀୟ ଆଞ୍ଚଳିକ ଭାଷାରେ ଇଞ୍ଜିନିୟରିଂ ଡିଗ୍ରୀ ଓ ଡିପ୍ଲୋମା ବିଦ୍ୟାର୍ଥୀଙ୍କ ପାଇଁ ଅଖିଳ ଭାରତୀୟ ବୈଷୟିକ ଶିକ୍ଷା ପରିଷଦ(ଏଆଇସିଟିଇ) ପ୍ରସ୍ତୁତ କରିଥିବା ପୁସ୍ତକର ସହଜ ଉପଲବ୍ଧ ନିମନ୍ତେ ଗତ ନଭେମ୍ବରରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଦ୍ୱାରା ‘ଇ-କୁମ୍ଭ’ ପୋର୍ଟାଲ ଉନ୍ମୋଚିତ ହୋଇଥିଲା। ଏଥିରେ ୧୨ଟି ଭାରତୀୟ ଭାଷାରେ ଅନୁବାଦ ହୋଇଥିବା ପୁସ୍ତକ ସଂଯୁକ୍ତ କରାଯାଇଥିଲା। ଓଡ଼ିଆ ଅଧ୍ୟୟନ ଓ ଗବେଷଣା ସଂସ୍ଥା ଦ୍ୱାରା ଅନୁବାଦ ହୋଇଥିବା ଡିଗ୍ରୀ ଓ ଡିପ୍ଲୋମା ଶ୍ରେଣୀ ପାଇଁ ଉଦ୍ଦିଷ୍ଟ ଓଡ଼ିଆ ବହି ଅନ୍ୟ ଭାଷାର ବହି ତୁଳନାରେ ସର୍ବାଧିକ ଡାଉନ୍ଲୋଡ୍ ହୋଇଥିବା ଏଆଇସିଟିଇ ସୂତ୍ରରୁ ଜଣାପଡ଼ିଛି। ୩ ମାସ ଭିତରେ ଓଡ଼ିଆ ବହି ୭,୦୬୨, ହିନ୍ଦୀ ବହି ୪,୧୫୫, ମରାଠୀ ବହି ୨,୨୩୯, ତାମିଲ ଭାଷାର ୧,୯୪୦ ଖଣ୍ଡ ବହି ଡାଉନ୍ଲୋଡ ହୋଇଛି। ଓଡ଼ିଆରେ ଇଞ୍ଜିନିୟରିଂ ଶିକ୍ଷା ପାଇଁ ବହି ପ୍ରସ୍ତୁତ ହୋଇ ନ ଥିବାରୁ ଗତ ୨୦୨୨-୨୩ ଶିକ୍ଷାବର୍ଷରେ କୌଣସି ବୈଷୟିକ ଶିକ୍ଷାନୁଷ୍ଠାନ ଓଡ଼ିଆ ମାଧ୍ୟମରେ ଶିକ୍ଷା ପ୍ରଦାନର ଅନୁମତି ପାଇଁ ଏଆଇସିଟିଇକୁ ଆବେଦନ କରି ନ ଥିଲେ। ମାତ୍ର ସର୍ବାଧିକ ଇ-ପୁସ୍ତକ ସଂଗ୍ରହ ପିଲାଙ୍କ ମଧ୍ୟରେ ଓଡ଼ିଆରେ ଇଞ୍ଜିନିୟରିଂ ପାଠ ପଢ଼ିବା ନେଇ ଯଥେଷ୍ଟ ପରିମାଣରେ ଆଗ୍ରହ ଥିବା ପରିଲକ୍ଷିତ ହେଉଛି। ଏହାକୁ ଦୃଷ୍ଟିରେ ରଖି ଓଡ଼ିଶାର ବୈଷୟିକ ଶିକ୍ଷାନୁଷ୍ଠାନଗୁଡ଼ିକ ଓଡ଼ିଆ ମାଧ୍ୟମର ଶିକ୍ଷା ପ୍ରତି ଗୁରୁତ୍ୱ ଦେବାକୁ ଚିନ୍ତା କରୁଛନ୍ତି। ଏହି ଶିକ୍ଷା ବ୍ୟବସ୍ଥା ଅନୁସାରେ ପାଠକୁ ସହଜରେ ବୁଝିବା ପାଇଁ ମାତୃଭାଷାକୁ ମାଧ୍ୟମ ଭାବରେ ଗ୍ରହଣ କରାଯାଇଥିଲେ ମଧ୍ୟ ଆବଶ୍ୟକତା ଦୃଷ୍ଟିରୁ ଦେଶ ବିଦେଶରେ ନିଯୁକ୍ତି ପାଇଁ ଯୋଗାଯୋଗ ନିମନ୍ତେ ଇଂଲିଶ ଭାଷା ଶିକ୍ଷା ପ୍ରଦାନର ବ୍ୟବସ୍ଥା ରହିଛି। ତେଣୁ ଓଡ଼ିଆରେ ପଢ଼ିଲେ ମଧ୍ୟ ନିଯୁକ୍ତି ପାଇଁ ଏହା ବାଧକ ହେବାର ସମ୍ଭାବନା ନ ଥିବାରୁ ପିଲାମାନେ ମାତୃଭାଷାରେ ଇଞ୍ଜିିନିୟରିଂ ପଢ଼ିବାକୁ ଅଧିକ ଆଗ୍ରହୀ ହେଉଥିବା ଜଣାପଡ଼ିଛି।