ପାରାଦୀପ,୨୮ା୧୧(ସ୍ବ.ପ୍ର.): ପାରାଦୀପର ବିସ୍ତୀର୍ଣ୍ଣ ସମୁଦ୍ର ବେଳାଭୂମି ସବୁବେଳେ ପର୍ଯ୍ୟଟକଙ୍କୁ ଆକର୍ଷିତ କରିଥାଏ। ଏଠାରେ ଥିବା ବେଳାଭୂମି ରାସ୍ତାରେ ସବୁବେଳେ ଲୋକ ଓ ପର୍ଯ୍ୟଟକଙ୍କ ଗହଳି ପରଲିକ୍ଷିତ ହୋଇଥାଏ। ଏହାସତ୍ତ୍ୱେ ରାସ୍ତାରେ ଭାରିଯାନ ରଖାଯାଉଛି। ଫଳରେ ଅଧିକ ସମୟ ଯାନଗୁଡିକ ଷ୍ଟାଟ ଅବସ୍ଥାରେ ରହୁଥିବାରୁ ଏଥିରୁ ବାହାରୁ ଥିବା ଧୂୂଆଁ ଯୋଗୁ ପରିବେଶ ପ୍ରଦୂଷିତ ହେଉଛି। ଏ ନେଇ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ଅଗଷ୍ଟ ୨୧ରେ ଚିଠି କରାଯାଇ ଉକ୍ତ ସ୍ଥାନରୁ ଭାରିଯାନ ପାର୍କିଂ ଓ ଚଳାଚଳ ଉପରେ ଅଙ୍କୁଶ ଲଗାଇବାକୁ ପ୍ରଶାନସିକ ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି। ମାତ୍ର ଚିଠି ଆସିବାର ୨ ମାସରୁ ଊର୍ଦ୍ଧ୍ୱ ସମୟ ବିତିଯାଇଥିଲେ ମଧ୍ୟ ଏ ପର୍ଯ୍ୟନ୍ତ ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆଯାଇନାହିଁ। ବୋର୍ଡର ଆଞ୍ଚଳିକ ଅଧିକାରୀ ଦିଲୀପ ଦାସ ଅଗଷ୍ଟ ୨୧ରେ ଅତିରିକ୍ତ ଜିଲାପାଳ, ବନ୍ଦର କର୍ତ୍ତୃପକ୍ଷ ଓ ପାର୍କିଂ କରୁଥିବା ବନ୍ଦର ବ୍ୟବହାରକାରୀ ସଂସ୍ଥାଗୁଡିକ ନିକଟକୁ ଚିଠି (ନଂ.୭୫୨/୨୦) ପଠାଇଥିଲେ। ସେଥିରେ ସେ ଦର୍ଶାଇଥିଲେ ଯେ, ବେଳାଭୂମି ରାସ୍ତାରେ ପଣ୍ୟବାହୀ ଭାରିଯାନ ରହୁଥିବାରୁ ଏଠାରେ ପ୍ରଦୂଷଣ ମାତ୍ରା ଦିନକୁଦିନ ବଢ଼ି ଚାଲିଛି। ଫଳରେ ସକାଳେ ଓ ସନ୍ଧ୍ୟାରେ ଭ୍ରମଣ କରୁଥିବା ଲୋକଙ୍କ ପାଇଁ ହିତକର ନୁହେଁ। ରାସ୍ତାର ଉଭୟପାଶର୍ବରେ ବିଭିନ୍ନ ସରକାରୀ କାର୍ଯ୍ୟାଳୟ ଓ ପର୍ଯ୍ୟଟନ ସ୍ଥାନ ଆଦି ରହିଛି। ସେଗୁଡିକ ମଧ୍ୟରେ ହନୁମାନ ମନ୍ଦିର, ବିଜୁ ବିଜ୍ଞାନ ପାର୍କ, ପାନ୍ଥନିବାସ, ସର୍କିଟ୍ ହାଉସ, ବୋର୍ଡର ଆଞ୍ଚଳିକ କାର୍ଯ୍ୟାଳୟ, ବତିଘର, ଜଳଜୀବ ସଂଗ୍ରହାଳୟ, ବିଜୁ ମିନାର ଓ କୋଭିଡ୍ ହସ୍ପିଟାଲ ପ୍ରମୁଖ ରହିଛି। ପୌରପାଳିକା ପକ୍ଷରୁ ସୌନ୍ଦର୍ଯ୍ୟକରଣ କାମ କରାଯାଇଛି। ଏ ନେଇ ସରକାରୀସ୍ତରରେ ଅନେକ ଅର୍ଥ ଖର୍ଚ୍ଚ ହୋଇଛି। ଏସବୁର ସୁରକ୍ଷା ଓ ଲୋକଙ୍କ ନିରାପତ୍ତା ଦୃଷ୍ଟିରେ ରଖି ଉକ୍ତ ସ୍ଥାନରୁ ଭାରିଯାନ ପାର୍କିଂ ହଟାଯାଉ। ହେଲେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି।