ସିଡନୀ,୩।୧: ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଚାଲିଥିବା ପାଞ୍ଚ ମ୍ୟାଚ ଟେଷ୍ଟ ସିରିଜର ପଞ୍ଚମ ତଥା ଶେଷ ମ୍ୟାଚ ସିଡନୀ କ୍ରିକେଟ ଗ୍ରାଉଣ୍ଡରେ ଖେଳାଯାଉଛି। ଏହି ମ୍ୟାଚ ପାଇଁ ଭାରତୀୟ ଦଳରେ ଦୁଇଟି ପରିବର୍ତ୍ତନ କରାଯାଇଛି। ଟେଷ୍ଟରେ ଶୁଭମାନ ଗିଲଙ୍କୁ ନିୟମିତ ଅଧିନାୟକ ରୋହିତ ଶର୍ମାଙ୍କ ସ୍ଥାନରେ ସୁଯୋଗ ଦିଆଯାଇଛି ଏବଂ ଆକାଶ ଦୀପଙ୍କ ସ୍ଥାନରେ ପ୍ରସିଦ୍ଧ କ୍ରିଷ୍ଣାଙ୍କୁ ସୁଯୋଗ ଦିଆଯାଇଛି।
ଷ୍ଟାଣ୍ଡ-ଇନ ଅଧିନାୟକ ଜସପ୍ରୀତ ବୁମ୍ରା କହିଛନ୍ତି, ରୋହିତ ଏହି ମ୍ୟାଚ ପାଇଁ ବିଶ୍ରାମ ନେବାକୁ ନିଷ୍ପତ୍ତି ନେଇ ଏକ ଉଦାହରଣ ସୃଷ୍ଟି କରିଛନ୍ତି। ତେବେ ହିଟମ୍ୟାନ ଖେଳୁ ନ ଥିବାରୁ ଅନେକ କଳ୍ପନାଜଳ୍ପନା ସୃଷ୍ଟି ହୋଇଛି।
ତେବେ ରୋହିତ ମଧ୍ୟ ଏକ ଅଲୋଡା ରେକର୍ଡ କରିଛନ୍ତି। ସେ ଭାରତର ପ୍ରଥମ ଅଧିନାୟକ, ଯିଏ ଦ୍ୱିପାକ୍ଷିକ ସିରିଜ ମଝିରେ ପ୍ଲେ -୧୧ରୁ ଓହରି ଯାଇଛନ୍ତି। ପୂର୍ବରୁ କୌଣସି ସିରିଜ ମଝିରେ ଜଣେ ଭାରତୀୟ ଅଧିନାୟକ ଦଳରୁ ଓହରି ନାହାଁନ୍ତି। ତେବେ, ମୋଟାମୋଟି ଭାବେ କ୍ରିକେଟ ସାରା ବିଶ୍ୱରେ ଏହା ଚାରିଥର ଘଟିଛି। ରୋହିତଙ୍କ ପୂର୍ବରୁ ପାକିସ୍ତାନର ପୂର୍ବତନ ଅଧିନାୟକ ମିସବାହ-ଉଲ-ହକ, ଶ୍ରୀଲଙ୍କାର ପୂର୍ବତନ ଅଧିନାୟକ ଦୀନେଶ ଚାନ୍ଦିମାଲ ଏବଂ ଇଂଲଣ୍ଡର ପୂର୍ବତନ ଅଧିନାୟକ ମାଇକ ଡେନେସଙ୍କୁ ପ୍ଲେ-୧୧ରୁ ଓହରି ଯାଇଥିଲେ। ୧୯୭୪ ଆଶେସରେ ସର୍ବପ୍ରଥମ ଘଟଣା ଘଟିଥିଲା, ଯେତେବେଳେ ଡେନେସ ସିରିଜର ଚତୁର୍ଥ ଟେଷ୍ଟରୁ ନିଜକୁ ଛାଡିବାକୁ ନିଷ୍ପତ୍ତି ନେଇଥିଲେ। ଜନ ଏଡ୍ରିଚ ତାଙ୍କୁ ଅଧିନାୟକ ଭାବରେ ବଦଳାଇଲେ। ତେବେ ଏହା ପରେ ଡେନିସ ଆଡିଲେଡ ଟେଷ୍ଟରେ ପ୍ରତ୍ୟାବର୍ତ୍ତନ କରି ପ୍ରଥମ ଇନିଂସରେ ଅର୍ଦ୍ଧଶତକ ହାସଲ କରିଥିଲେ। ତା’ପରେ ମେଲବୋର୍ନରେ ଚାଲିଥିବା ସିରିଜର ଷଷ୍ଠ ଟେଷ୍ଟରେ ସେ ୧୮୧ ରନ ଇନିଂସ ଖେଳି ଇଂଲଣ୍ଡ ଏକ ଇନିଂସରେ ଜିତିଥିଲେ।
ଅଷ୍ଟ୍ରେଲିଆ ଗସ୍ତରେ ବ୍ୟକ୍ତିଗତ କାରଣରୁ ପର୍ଥରେ ପ୍ରଥମ ଟେଷ୍ଟରୁ ଦୂରେଇ ରହିବା ପରେ ରୋହିତ ଆଡିଲେଡରେ ଦ୍ୱିତୀୟ ଟେଷ୍ଟରେ ପ୍ରତ୍ୟାବର୍ତ୍ତନ କରିଥିଲେ। ତେବେ ସେ ଫ୍ଲପ୍ ହୋଇଛନ୍ତି। ଅଷ୍ଟ୍ରେଲିଆ ବିପକ୍ଷ ଏହି ସିରିଜର ଦ୍ୱିତୀୟ ଟେଷ୍ଟରୁ ଫେରିବା ପରେ ସେ ତିନୋଟି ମ୍ୟାଚର ପାଞ୍ଚ ଇନିଂସରେ ମାତ୍ର ୩୧ ରନ ସ୍କୋର କରିବାରେ ସକ୍ଷମ ହୋଇଛନ୍ତି। ସେ ଏହି ସିରିଜରେ ୯, ୩, ୧୦, ୬ ଏବଂ ୩ ରନ ଖେଳିଛନ୍ତି। ଏହାପୂର୍ବରୁ ନ୍ୟୁଜିଲାଣ୍ଡ ବିପକ୍ଷ ଶେଷ ଟେଷ୍ଟ ସିରିଜରେ ସେ ତିନୋଟି ଟେଷ୍ଟରେ ମାତ୍ର ୯୩ ରନ ସ୍କୋର କରିବାରେ ସକ୍ଷମ ହୋଇଥିଲେ।
