ବିଶାଖାପାଟଣା,୧୯ା୩: ଅଷ୍ଟ୍ରେଲିଆ ବିପକ୍ଷ ୩ ମ୍ୟାଚ ବିଶିଷ୍ଟ ଦିନିକିଆ ସିରିଜର ଦ୍ୱିତୀୟ ମ୍ୟାଚ୍ ରବିବାର ବିଶାଖାପାଟଣାରେ ଖେଳାଯିବ। ଓ୍ବାଙ୍ଖଡେରେ ସଂଘର୍ଷପୂର୍ଣ୍ଣ ବିଜୟ ପରେ ଲୋକେଶ ରାହୁଲ ଏବଂ ରବୀନ୍ଦ୍ର ଜାଡେଜାଙ୍କ ଉପରେ ସମସ୍ତଙ୍କ ନଜର ରହିବ। ପ୍ରଥମ ଦିନିକିଆ ଖେଳି ନ ଥିବା ନିୟମିତ ଅଧିନାୟକ ରୋହିତ ଶର୍ମା ଏହି ମ୍ୟାଚରେ ପ୍ରତ୍ୟାବର୍ତ୍ତନ କରୁଛନ୍ତି। ଓ୍ବାଙ୍ଖଡେର ଲୋ ସ୍କୋରିଂ ମ୍ୟାଚରେ ରାହୁଲଙ୍କ ଧୈର୍ଯ୍ୟପୂର୍ଣ୍ଣ ୭୫ ରନ୍ ବଳରେ ଭାରତ ୫ ଉଇକେଟରେ ମ୍ୟାଚ ଜିତି ନେଇଥିଲା। ଅନ୍ୟପକ୍ଷରେ ଦୀର୍ଘ ୮ ମାସ ବ୍ୟବଧାନ ପରେ ଦିନିକିଆ ମ୍ୟାଚ୍ ଖେଳୁଥିବା ଜାଡେଜା ଉଭୟ ବ୍ୟାଟ୍ ଓ ବଲ୍ରେ ସନ୍ତୁଳିତ ପ୍ରଦର୍ଶନ କରିଥିଲେ। ପ୍ଲେୟର ଅଫ୍ ଦ ମ୍ୟାଚ୍ ହୋଇଥିବା ଜାଡେଜା ବୋଲିଂରେ ୨ ଉଇକେଟ ନେଇଥିବା ବେଳେ ବ୍ୟାଟିଂରେ ଅପରାଜିତ ୪୫ ରନ୍ କରିଥିଲେ। ଭାରତରେ ହେବାକୁ ଥିବା ଦିନିକିଆ ବିଶ୍ୱକପକୁ ଆଉ ୬ ମାସରୁ କମ୍ ସମୟ ରହିଥିବା ବେଳେ ଏହି ଦୁଇ ଖେଳାଳି ଭାରତର ପ୍ରମୁଖ ଅସ୍ତ୍ର ସାବ୍ୟସ୍ତ ହେବେ। ଏହା ବ୍ୟତୀତ ଅଧିନାୟକ ରୋହିତ ଶର୍ମାଙ୍କ ପ୍ରତ୍ୟାବର୍ତ୍ତନ ଭାରତୀୟ ଟପ୍ ଅର୍ଡର ପାଇଁ ଆଉ ଏକ ଶୁଭ ସଙ୍କେତ। ମିଚେଲ ଷ୍ଟାର୍କଙ୍କ ବୋଲିଂରେ ଅସହଜ ମନେ ହୋଇଥିବା ଭାରତୀୟ ବ୍ୟାଟିଂକୁ ଏହା ଶକ୍ତ କରିବ। ତେବେ ରୋହିତଙ୍କ ପ୍ରତ୍ୟାବର୍ତ୍ତନ କାରଣରୁ ଇଶାନ କିଶନଙ୍କୁ ବାହାରେ ବସିବାକୁ ପଡିବ। ଷ୍ଟାର୍କ ଶୁକ୍ରବାର ଘାତକ ବୋଲିଂ କରିବା ସହିତ ବିରାଟ କୋହଲି(୪), ସୂର୍ଯ୍ୟକୁମାର ଯାଦବ(୦) ଓ ଶୁବମାନ ଗିଲ୍(୨୦)ଙ୍କୁ ଆଉଟ କରିଥିଲେ। ଭାରତୀୟ ବ୍ୟାଟର ବାମହାତୀ ପେସ୍ ବୋଲରଙ୍କ ସାମ୍ନାରେ ନିଷ୍ପ୍ରଭ ମନେହେଉଥିବା ବେଳେ ଆଗାମୀ ଦୁଇ ମ୍ୟାଚରେ ଷ୍ଟାର୍କଙ୍କୁ ଖେଳି ଭାରତୀୟ ଖେଳାଳି ଏହି ଅଭିଜ୍ଞତା ହାସଲ କରିବେ। ଅକ୍ଟୋବର-ନଭେମ୍ବରରେ ହେବାକୁ ଥିବା ଦିନିକିଆ ବିଶ୍ୱକପ୍ରେ ଏହା ଭାରତୀୟ ଖେଳାଳିଙ୍କ ପାଇଁ ଲାଭଦାୟକ ହେବ। କୋହଲି ଓ ଗିଲ୍ଙ୍କ ଲୋ ସ୍କୋର ଭାରତ ପାଇଁ ଚିନ୍ତାଜନକ ନ ଥିବା ବେଳେ ଦିନିକିଆ କ୍ରିକେଟରେ ସୂର୍ଯ୍ୟକୁମାର ଯାଦବଙ୍କ ନିୟମିତ ବିଫଳତା ଭାରତ ପାଇଁ ମୁଣ୍ଡବିନ୍ଧାର କାରଣ ପାଲଟିଛି। ଭାରତୀୟ ବୋଲିଂ ଲାଇନଅପ୍ ବେଶ୍ ଚମତ୍କାର ରହିଥିବା ବେଳେ ଏଥିରେ ପରିବର୍ତ୍ତନର କୌଣସି ଆବଶ୍ୟକତା ନାହିଁ। ଓ୍ବାଙ୍ଖଡେରେ ମହମ୍ମଦ ଶାମି ଓ ମହମ୍ମଦ ସିରାଜ ଚମତ୍କାର ବୋଲିଂ କରିଥିବା ବେଳେ ତୃତୀୟ ପେସ୍ ବୋଲର ଭୂମିକାରେ ନଜର ଆସିଥିଲେ ହାର୍ଦ୍ଦିକ ପାଣ୍ଡ୍ୟା। ଜାଡେଜା ଭଲ ବୋଲିଂ କରିଥିବା ବେଳେ କୁଲଦୀପ ଯାଦବ ଓ ଶାର୍ଦ୍ଦୂଳ ଠାକୁର ଆଭରେଜ ବୋଲିଂ କରିଥିଲେ। ତେବେ ସମାନ ବୋଲିଂ ଲାଇନ୍ ଅପ୍ ସହ ଭାରତ ଓହ୍ଲାଇବାକୁ ଚାହିଁବ। ପ୍ରଥମ ଦିନିକିଆରେ ୪ ଜଣ ଅଲରାଉଣ୍ଡରଙ୍କୁ ଖେଳାଇଥିଲେ ମଧ୍ୟ ଭାରତ ଉପରେ ଚାପ ସୃଷ୍ଟି କରିବାରେ ଅଷ୍ଟ୍ରେଲିଆ ବିଫଳ ହୋଇଥିଲା। ଏହା ଅଧିନାୟକ ଷ୍ଟିଭ୍ ସ୍ମିଥଙ୍କ ପାଇଁ ଚିନ୍ତାର କାରଣ ପାଲଟିବ।
ମ୍ୟାଚ୍ ସ୍ଥାନ-ଓ୍ବାଇଏସ୍ଆର ରେଡ୍ଡୀ ଷ୍ଟାଡିୟମ, ବିଶାଖାପାଟଣା, ସମୟ: ଅପରାହ୍ନ ୧.୩୦
ପ୍ରସାରଣ: ଷ୍ଟାର ସ୍ପୋଟର୍ସ