ଲଣ୍ଡନ,୪।୮: ଉଭୟ ଭାରତ ଏବଂ ଇଂଲଣ୍ଡ ଦଳ ପାଞ୍ଚ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ପାଇଁ ପ୍ରସ୍ତୁତ ହୋଇଛନ୍ତି। ସିରିଜର ପ୍ରଥମ ମ୍ୟାଚ ଅଗଷ୍ଟ ୪ରୁ ଖେଳାଯିବ। ନିଜ ମାଟିରେ ଇଂଲଣ୍ଡ ଦଳର ପ୍ରଦର୍ଶନ ସର୍ବଦା ଭଲ ରହିଆସିଛି। ଏପରି ପରିସ୍ଥିତିରେ, ଜୋ ରୁଟ୍ଙ୍କ ଅଧିନାୟକତ୍ୱରେ ଇଂଲଣ୍ଡ ଦଳ ଏହି କୀର୍ତ୍ତିମାନକୁ ପୁଣି ଥରେ ପୁନରାବୃତ୍ତି କରିବାକୁ ଚାହିଁବ। ଇଂଲଣ୍ଡର ଏହି ୫ ଖେଳାଳି ସିରିଜରେ ଟିମ ଇଣ୍ଡିଆ ବିପକ୍ଷରେ ଏକ ବଡ଼ ମୁଣ୍ଡବିନ୍ଧାର କାରଣ ହୋଇପାରନ୍ତି:
ଜୋ ରୁଟ: ଭାରତୀୟ ଦଳ ବିପକ୍ଷରେ ଅଧିନାୟକ ଜୋ ରୁଟଙ୍କ ପ୍ରଦର୍ଶନ ବହୁତ ଭଲ। ସେ ୨୦ଟି ଟେଷ୍ଟରେ ୫ ଶତକ ଏବଂ ୯ ଅର୍ଦ୍ଧଶତକ ହାସଲ କରିଛନ୍ତି। କେବଳ ଏତିକି ନୁହେଁ, ହାରାହାରି ୫୪ ରେ ୧୭୮୯ ରନ ସ୍କୋର କରିଛନ୍ତି। ଏଭଳି ପରିସ୍ଥିତିରେ ଭାରତୀୟ ଦଳ ପାଇଁ ତାଙ୍କୁ ରୋକିବା ସହଜ ହେବ ନାହିଁ। ଭାରତ ବିପକ୍ଷରେ ଇଂଲଣ୍ଡ ବ୍ୟାଟ୍ସମ୍ୟାନ ଭାବେ ସର୍ବାଧିକ ରନ ସ୍କୋର କରିବାରେ ସେ ଦ୍ୱିତୀୟ ସ୍ଥାନରେ ଅଛନ୍ତି। ଆଲେଷ୍ଟାୟର୍ କୁକ ସର୍ବାଧିକ ୨୪୩୧ ରନ ସ୍କୋର କରିଛନ୍ତି।
ଜୋସ ବଟଲର୍: ଇଂଲଣ୍ଡର ଟେଷ୍ଟ ବିଜୟରେ ଉଇକେଟ କିପର ବ୍ୟାଟ୍ସମ୍ୟାନ ଜୋସ ବଟଲର ସର୍ବଦା ଉଲ୍ଲେଖନୀୟ ଅବଦାନ ରଖିଛନ୍ତି। ସେ ଭାରତ ବିପକ୍ଷରେ ୧୨ଟି ଟେଷ୍ଟରେ ୭୫୭ ରନ କରିଛନ୍ତି। ସେ ଗୋଟିଏ ଶତକ ଏବଂ ପାଞ୍ଚ ଅର୍ଦ୍ଧଶତକ ହାସଲ କରିଛନ୍ତି। ଏହା ବ୍ୟତୀତ ସେ ଉଇକେଟ ପଛରେ ୨୬ଟି ଶିକାର ମଧ୍ୟ କରିଛନ୍ତି।
ଜେମ୍ସ ଆଣ୍ଡରସନ: ଇଂଲଣ୍ଡର ଦ୍ରୁତ ବୋଲର ଜେମ୍ସ ଆଣ୍ଡରସନ ଟେଷ୍ଟ କ୍ରିକେଟରେ ସର୍ବାଧିକ ଉଇକେଟ ନେଇଛନ୍ତି। ଭାରତ ବିପକ୍ଷରେ ତାଙ୍କର ପ୍ରଦର୍ଶନ ଅତ୍ୟନ୍ତ ଭଲ। ସେ ଭାରତ ବିପକ୍ଷ ୩୦ଟି ଟେଷ୍ଟ ମ୍ୟାଚରେ ୧୧୮ ଉଇକେଟ ନେଇଛନ୍ତି। ସେ ୪ଥର ୫ଟି ଉଇକେଟ ନେଇ ସଫଳତା ହାସଲ କରିଛନ୍ତି। ସେ ସବୁବେଳେ ଇଂଲଣ୍ଡର ସ୍ବିଙ୍ଗ ପିଚ ଉପରେ ବ୍ୟାଟ୍ସମ୍ୟାନଙ୍କୁ ଅସୁବିଧାରେ ପକାନ୍ତି।
ଷ୍ଟୁଆର୍ଟ ବ୍ରଡ: ଦ୍ରୁତ ବୋଲର ଷ୍ଟୁଆର୍ଟ ବ୍ରଡ ମଧ୍ୟ ଇଂଲଣ୍ଡ ପିଚରେ ପ୍ରଭାବଶାଳୀ। ସେ ଭାରତ ବିପକ୍ଷ ୨୨ଟି ଟେଷ୍ଟରେ ୨୭ଟି ଉଇକେଟ ନେଇଛନ୍ତି। ନୂଆ ବଲରେ ଆଣ୍ଡରସନ ଏବଂ ବ୍ରଡଙ୍କ ଯୋଡି ଅତ୍ୟନ୍ତ ବିପଜ୍ଜନକ ବୋଲି ବିବେଚନା କରାଯାଏ।
ସାମ କରନ: ଟେଷ୍ଟ ସିରିଜରେ ଅଲରାଉଣ୍ଡର ସାମ କରନ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବାର କ୍ଷମତା ରଖିଛନ୍ତି। ବେନ ଷ୍ଟୋକ୍ସଙ୍କ ଅନୁପସ୍ଥିତିରେ ସମସ୍ତଙ୍କ ନଜର ତାଙ୍କ ଉପରେ ରହିବ ଏବଂ ସେ ଭାରତ ବିପକ୍ଷରେ ଭଲ ପ୍ରଦର୍ଶନ କରିଛନ୍ତି। ଭାରତ ବିପକ୍ଷରେ ସେ ହାରାହାରି ୩୯ରେ ୪ଟି ଟେଷ୍ଟରେ ୨୭୨ ରନ ସଂଗ୍ରହ କରିଛନ୍ତି। ବୋଲିଂରେ ସେ ୨୪ଟ ଉଇକେଟ ନେଇଛନ୍ତି।
ଏପର୍ଯ୍ୟନ୍ତ ଇଂଲଣ୍ଡରେ ଭାରତ ଏବଂ ଇଂଲଣ୍ଡ ମଧ୍ୟରେ ୧୮ଟି ଦ୍ୱିପାକ୍ଷିକ ଟେଷ୍ଟ ସିରିଜ ଖେଳାଯାଇଛି । ଭାରତ ମାତ୍ର ୩ଟି ସିରିଜ ଜିତିଥିବାବେଳେ ଆୟୋଜକ ଇଂଲଣ୍ଡ ଦଳ ୧୪ଟି ସିରିଜ ହାସଲ କରିଛି। ଗୋଟିଏ ସିରିଜ ଡ୍ର ହୋଇଥିଲା। ୨୦୦୭ ରେ ଟିମ ଇଣ୍ଡିଆ ଶେଷ ବିଜୟ ହାସଲ କରିଥିଲା। ଭାରତୀୟ ଦଳ ଏପର୍ଯ୍ୟନ୍ତ ଇଂଲଣ୍ଡରେ ୬୨ଟି ଟେଷ୍ଟ ଖେଳିଛି, କେବଳ ୭ଟିରେ ଦଳ ଜିତିଛି। ଇଂଲଣ୍ଡ ୩୪ଟି ମ୍ୟାଚ ଜିତିଛି।