ଲିଡ୍ସ,୨୯।୮: ଇଂଲଣ୍ଡ ବିପକ୍ଷ ଲିଡ୍ସ ଟେଷ୍ଟରେ ଲଜ୍ଜାଜନକ ପରାଜୟ ପରେ ଅଧିନାୟକ ବିରାଟ କୋହଲି ଏବଂ ଭାରତୀୟ ଦଳର ପ୍ରଦର୍ଶନକୁ ନେଇ ଏବେ ଅନେକ ପ୍ରଶ୍ନ ଉଠିଛି। ଇଂଲଣ୍ଠ ବିପକ୍ଷ ଦ୍ୱିତୀୟ ଟେଷ୍ଟରେ ଭାରତୀୟ ଦଳ ପ୍ରଥମ ଇନିଂସରେ ମାତ୍ର ୭୮ ରନ୍ରେ ଅଲଆଉଟ୍ ହୋଇଥିବାବେଳେ ଦ୍ୱିତୀୟ ଇନିଂସରେ ମାତ୍ର ୬୩ ରନ୍ରେ ଦଳ ୮ ଉଇକେଟ୍ ହରାଇଥିଲା। ଗୋଟିଏ ସମୟରେ ଦଳର ସ୍କୋର ୨୧୫-୨ ଥିଲା, କିନ୍ତୁ ଦଳ ୨୭୮ ରନ୍ ଅଲଆଉଟ୍ ହୋଇ ଗୋଟିଏ ଇନିଂସ ଏବଂ ୭୬ ରନ୍ରେ ମ୍ୟାଚ୍ ହାରିଥିଲା। ପରାଜୟ ପରେ ବିରାଟ କୋହଲିଙ୍କୁ ଅନେକ ପ୍ରଶ୍ନର ସାମ୍ନା କରିବାକୁ ପଡ଼ିଛି। ମ୍ୟାଚ୍ ପରେ ଖବରଦାତା ସମ୍ମିଳନୀରେ ତାଙ୍କ ଭାରତୀୟ ବ୍ୟାଟ୍ସମ୍ୟାନ୍ ଚିନ୍ତାଧାରାକୁ ନେଇ ପ୍ରଶ୍ନ କରାଯାଇଥିଲା। ଜଣେ ରିପୋର୍ଟର କୋହଲିଙ୍କ ପଚାରିଥିଲେ ଯେ, ଇଂଲଣ୍ଡ ବୋଲର୍ ଫୁଲ୍ ଲେନ୍ଥରେ ବଲ୍ ପକାଉଥିବାବେଳେ ଭାରତୀୟ ବ୍ୟାଟ୍ସମ୍ୟାନ୍ମାନେ ବ୍ୟାକ୍ଫୁଟ୍ରେ ଖେଳିପାରି ଥାନ୍ତେ। କିନ୍ତୁ ଭାରତୀୟ ବ୍ୟାଟ୍ସମ୍ୟାନ୍ ଏପରି କରିବାରେ ବିଫଳ ହୋଇଥିଲେ। ଏହି ପ୍ରଶ୍ନ ଉତ୍ତର କୋହଲି କେବଳ ଦୁଇଟି ଶବ୍ଦରେ ଦେଇଥିଲେ ‘ଠିକ୍ ଅଛି ଧନ୍ୟବାଦ’। ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ଭିଡିଓ ଦେଖି ପ୍ରଶଂସକ ବିଭିନ୍ନ ମତ ଦେବା ସହ କୋହଲିଙ୍କୁ ଅହଂକାରୀ ବୋଲି କହିଛନ୍ତି। ଜଣେ ପ୍ରଶଂସକ କହିଚନ୍ତି, ଲଜ୍ଜାଜନକ ପରାଜୟ ପରେ ମଧ୍ୟ କୋହଲି ତାଙ୍କ ଅହଂକାର ଛାଡୁ ନାହାନ୍ତି। ଭାରତର ପୂର୍ବତନ କ୍ରିକେଟର୍ ମନିନ୍ଦର ସିଂ ମଧ୍ୟ କୋହଲିଙ୍କୁ ଅହଂକାରୀ ବୋଲି କହିଛନ୍ତି। ସେ ନିଜ ଅହଂକାର ନିଜ ପାଖରେ ରଖନ୍ତୁ ବୋଲି କହିଛନ୍ତି।