ସେଞ୍ଚୁରିଅନ୍,୩୦।୧୨: ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଟେଷ୍ଟ ସିରିଜର ଦ୍ୱିତୀୟ ମ୍ୟାଚ କେପଟାଉନରେ ଖେଳାଯିବ। ଏହି ମ୍ୟାଚ ପୂର୍ବରୁ ଦକ୍ଷିଣ ଆଫ୍ରିକାକୁ ବଡ଼ ଝଟକା ଲାଗିଛି। ଦ୍ରୁତ ବୋଲର ଜେରାଲ୍ଡ କୋଏଟଜୀ ଦଳରୁ ବାଦ୍ ପଡିଛନ୍ତି। ଜାନୁୟାରୀ ୨ରୁ ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯିବାକୁ ଥିବା ମ୍ୟାଚ ପାଇଁ ସେ ଉପଲବ୍ଧ ହେବେ ନାହିଁ। ଟେଷ୍ଟ ସିରିଜର ପ୍ରଥମ ମ୍ୟାଚରେ ଜେରାଲ୍ଡ ଅସୁସ୍ଥ ଥିଲେ। ତେଣୁ ସେ ଦ୍ୱିତୀୟ ମ୍ୟାଚ ପର୍ଯ୍ୟନ୍ତ ଫିଟ୍ ହୋଇପାରିବେ ନାହିଁ। ଏନେଇ ଦକ୍ଷିଣ ଆଫ୍ରିକା ସୂଚନା ଦେଇଛି।
ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଟେଷ୍ଟ ସିରିଜର ପ୍ରଥମ ମ୍ୟାଚ ସେଞ୍ଚୁରିଅନ୍ରେ ଖେଳାଯାଇଥିଲା। ଏହି ମ୍ୟାଚରେ ଭାରତକୁ ପରାଜୟର ସାମ୍ନା କରିବାକୁ ପଡିଛି। ମ୍ୟାଚରେ ଦକ୍ଷିଣ ଆଫ୍ରିକାର ଦ୍ରୁତ ବୋଲର ଜେରାଲ୍ଡ ଅସୁସ୍ଥ ଥିଲେ। ତେବେ ମ୍ୟାଚ ପରେ ଏହି ସମସ୍ୟା ଜଣାପଡିଥିଲା। ଦକ୍ଷିଣ ଆଫ୍ରିକା ଜେରାଲ୍ଡିଙ୍କ ସ୍ଥାନରେ ଅନ୍ୟ କୌଣସି ଖେଳାଳିଙ୍କ ନାମ ଘୋଷଣା କରିନାହିଁ।