ଢେଙ୍କାନାଳ ଅଫିସ, ୨୬।୧: ଢେଙ୍କାନାଳ ସଦରରେ ଜିଲାସ୍ତରୀୟ ସାଧାରଣତନ୍ତ୍ର ଦିବସ ପାଳନକୁ ନେଇ ବ୍ୟାପକ ପ୍ରସ୍ତୁତି ଚାଲିଥିବାବେଳେ ତୋରଣ ବ୍ୟାନରର ତ୍ରୁଟି ପାଇଁ ପ୍ରଶାସନକୁ ଟ୍ରୋଲ୍ ହେବାକୁ ପଡ଼ିଛି। କାରଣ ୭୩ତମ ସାଧାରଣତନ୍ତ୍ର ଦିବସ ପରିବର୍ତ୍ତେ ଏଥିରେ ୭୩ତମ ସ୍ବାଧୀନତା ଦିବସ ବୋଲି ଲେଖାଯାଇଥିଲା। ଏହାର ଫଟୋ ସୋସିଆଲ ମିଡିଆରେ ଭାଇରାଲ୍ ହେବା ପରେ ସାମାଜିକ ଗଣମାଧ୍ୟମରେ କ୍ଷୋଭବ୍ୟକ୍ତ କରିଛନ୍ତି ବୁଦ୍ଧିଜୀବୀ। ଜାତୀୟ ଦିବସ ପରିଚାଳନା ଦାୟିତ୍ୱରେ ଥିବା ଅଧିକାରୀଙ୍କ ସାଧାରଣ ଜ୍ଞାନ ଅଭାବରୁ ଏଭଳି ହୋଇଥିବା ସେମାନେ କହିଛନ୍ତି। ଅନ୍ୟପଟେ ପ୍ରଶାସନ ନିଜର ଭୁଲ୍ ସୁଧାରି ସଂଶୋଧିତ ବ୍ୟାନର ଲଗାଇଛି।
ସ୍ଥାନୀୟ ଷ୍ଟାଡିୟମ୍ରେ ଜିଲାସ୍ତରୀୟ ପରେଡ୍ ଲାଗି ମଙ୍ଗଳବାର ପ୍ରଶାସନ ଏବଂ ସୂଚନା ଓ ଲୋକସମ୍ପର୍କ ବିଭାଗ ପକ୍ଷରୁ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚତ୍ଛି। ଜିଲାସ୍ତରୀୟ ଏହି ଜାତୀୟ ଉତ୍ସବକୁ ଆମନ୍ତ୍ରିତ ହୋଇଥିତ୍ବା ମୁଖ୍ୟ ଅତିଥି ଏବଂ ଜନସାଧାରଣଙ୍କୁ ସ୍ବାଗତ ପୂର୍ବକ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖ ରାସ୍ତାରେ ଅପରାହ୍ନ ପ୍ରାୟ ୧ଟା ବେଳେ ବଡ଼ତୋରଣ ଲଗାଯାଇଥିଲା। ତେବେ ଏହି ତୋରଣରେ ୭୩ତମ ସ୍ବାଧୀନତା ଦିବସ ବୋଲି ଉଲ୍ଲେଖ ରହିଥିଲା, ଯାହାର ଫଟୋକୁ କେହି ସୋସିଆଲ୍ ମିଡିଆରେ ଭାଇରାଲ୍ କରିଦେଇଥିଲେ। ଏହା ପରେ ପ୍ରଶାସନ ଟ୍ରୋଲ୍ର ଶିକାର ହୋଇଥିଲା। ସାଧାରଣତନ୍ତ୍ର ଦିବସ ଏବଂ ସ୍ବାଧୀନତା ଦିବସ କେଉଁଦିନ, ତାହା ପ୍ରଶାସନିକ ଅଧିକାରୀ ଏବଂ ସୂଚନା ଲୋକସମ୍ପର୍କ ବିଭାଗ ଅଧିକାରୀଙ୍କୁ ଜଣାନାହିଁ ବୋଲି ଅନେକେ ସମାଲୋଚନା କରିଥିଲେ। ଏ ସମ୍ପର୍କରେ କେତେଜଣ ଜିଲାପାଳଙ୍କୁ ଫୋନ୍ କରି ଜଣାଇଥିଲେ। ଏହାପରେ ଅପରାହ୍ନ ପ୍ରାୟ ସାଢ଼େ ୨ଟାରେ ତ୍ରୁଟିପୂର୍ଣ୍ଣ ବ୍ୟାନର ହଟାଯାଇ ସଂଶୋଧିତ ବ୍ୟାନର ଲଗାଯାଇଥିଲା। ଏ ସଂକ୍ରାନ୍ତରେ ଜିଲା ସୂଚନା ଓ ଲୋକସମ୍ପର୍କ ଅଧିକାରୀ ସାରଦା ପ୍ରସାଦ ମହାନ୍ତି କୁହନ୍ତି, ବ୍ୟାନର ଛପାଯାଇଥିବା ପ୍ରେସ୍ରେ ଏଭଳି ତ୍ରୁଟି ହୋଇଛି। ଜିଲାପାଳଙ୍କ ତାଗିଦ୍ ପରେ ଏହାକୁ ବଦଳାଇ ଦିଆଯାଇଛି।
