ମାମଲ୍ଲାପୁରମ୍,୯ା୮: ଚେନ୍ନାଇରେ ଆୟୋଜିତ ୪୪ତମ ଫିଡେ ଚେସ୍ ଅଲିମ୍ପିଆଡରେ ଭାରତୀୟ ଖେଳାଳିଙ୍କ ଦମଦାର ପ୍ରଦର୍ଶନ ଜାରି ରହିଛି। ମହିଳା ବର୍ଗରେ ଟୁର୍ନାମେଣ୍ଟ ଟପସିଡ୍ ଭାରତ ଏ ଚମତ୍କାର ବିଜୟ ହାସଲ କରିଛି। ଆଉ ଗୋଟିଏ ରାଉଣ୍ଡର ମୁକାବିଲା ବାକି ରହିଥିବା ବେଳେ ଟପ୍ ସିଡେଡ୍ ଭାରତ ଏ କାଜାଖସ୍ତାନକୁ ୩.୫-୦.୫ ପଏଣ୍ଟରେ ପରାସ୍ତ କରିଛି। କୋନେରୁ ହମ୍ପି ଟପ ବୋର୍ଡରେ ଝାନସାୟା ଅବଦୁମଲିକଙ୍କୁ ପରାସ୍ତ କରିଥିବା ବେଳେ ଭକ୍ତି କୁଲକର୍ଣ୍ଣୀ ଓ ତାନିଆ ସଚଦେବ ଯଥାକ୍ରମେ ଗୁଲିକ୍ଷାନ ନଖବାୟେଭା ଓ ଜେନିୟା ବାଲାବାୟେଭାଙ୍କୁ ହରାଇଥିଲେ। ଆର. ବୈଶାଳୀଙ୍କ ମୁକାବିଲାଟି ଡ୍ରରେ ଶେଷ ହୋଇଥିଲା। ଓପନ ବର୍ଗରେ ରେଡ୍ ହଟ୍ ଫର୍ମରେ ରହିଥିବା ଇଣ୍ଡିଆ ବି ଉଜବେକିସ୍ତାନ ସହିତ ପଏଣ୍ଟ ବାଣ୍ଟିଛି। କ୍ରମାଗତ ୯ଟି ମ୍ୟାଚ ଧରି ଅପରାଜେୟ ରହିଥିବା ଡି . ଗୁକେଶ ନିଜର ପ୍ରଥମ ପରାଜୟ ହାସଲ କରିଥିଲେ। ଟିନ ଏଜର ଗ୍ରାଣ୍ଡମାଷ୍ଟର ଅଦବୁସାଟୋରଭ୍ଙ୍କ ନିକଟରୁ ୭୨ ଚାଲ ବିଶିଷ୍ଟ ଗେମରେ ସେ ପରାଜିତ ହୋଇଥିଲେ। ନିହାଲ ସରିନ୍ ଓ ବି ଅଧିବନ୍ ଯଥାକ୍ରମେ ନୋଡିର୍ବେକ୍ ୟାକୁବୋଏଭ୍ ଓ ଜାଖୋଙ୍ଗିର ଭାଖିଦୋଭଙ୍କ ସହିତ ପଏଣ୍ଟ ବାଣ୍ଟିଥିଲେ। ତେବେ ଆର. ପ୍ରଜ୍ଞାନନ୍ଦ ବିଜୟୀ ହେବାରୁ ଭାରତ ୨-୨ରେ ମ୍ୟାଚ୍ ଅମୀମାଂସିତ ରଖିଥିଲା।
ଇଣ୍ଡିଆ ସି ଟିମ୍ ସ୍ଲୋଭାକିଆ ସହିତ ୨-୨ରେ ମ୍ୟାଚ୍ ଡ୍ର ରଖିଥିଲା। ସୂର୍ଯ୍ୟ ଶେଖର ଗାଙ୍ଗୁଲି ଓ କାର୍ତ୍ତିକେୟନ ମୁରଲୀ ଡ୍ର ରଖିଥିବା ବେଳେ ଅଭିମନ୍ୟୁ ପୁରାଣିକ ବିଜୟୀ ହୋଇଥିଲେ। ଓପନ ବର୍ଗରେ ଦ୍ୱିତୀୟ ସିଡର ମାନ୍ୟତା ପାଇଥିବା ଭାରତ ଏ ଆଉ ଏକ ବିଜୟ ସହିତ ପୋଡିୟମ ଫିନିଶର ନିକଟତର ହୋଇଛି। ଇରାନକୁ ୨.୫-୧.୫ରେ ହରାଇଥିବା ଏହି ମୁକାବିଲାରେ ଭିଦିତ ସନ୍ତୋଷ ଗୁଜରାଠୀ ଓ ଏସ ଏଲ୍ ନାରାୟଣନ ବିଜୟୀ ହୋଇଥିଲେ। ପି ହରିକ୍ରିଷ୍ଣା ହାରିଥିବା ବେଳେ ଅର୍ଜୁନ ଇରିଗେସୀ ଡ୍ର ରଖିଥିଲେ। ଭାରତ ଏ ୧୬ ପଏଣ୍ଟ ସହିତ ଟେବଲ୍ ଟପରେ ରହିଥିବା ବେଳେ ଆମେରିକା ମଧ୍ୟ ସମାନ ୧୬ ପଏଣ୍ଟ ହାସଲ କରିଛି।
ମହିଳା ବର୍ଗରେ ଉଭୟ ଭାରତ ବି ଓ ସି ବିଜୟ ହାସଲ କରିଛନ୍ତି। ପଦ୍ମିନୀ ରାଉତ, ମେରୀ ଆନ୍ ଗୋମ୍ସ ଓ ଦିବ୍ୟା ଦେଶମୁଖ ବିଜୟୀ ହୋଇଥିବା ବେଳେ ନେଦରଲାଣ୍ଡସକୁ ୩-୧ରେ ପରାସ୍ତ କରିଥିଲା ଭାରତ ବି। ସେହିପରି ପି ଭି ନନ୍ଦିଥା ଓ ପ୍ରତ୍ୟୁଷା ବୋଡାଙ୍କ ବିଜୟ ସହିତ ଭାରତ ସି ସମାନ ୩-୧ ବ୍ୟବଧାନରେ ଉଚ୍ଚ ମାନ୍ୟତାପ୍ରାପ୍ତ ସ୍ବିଡେନକୁ ପରାସ୍ତ କରିଛି।
