ବେଙ୍ଗାଲୁରୁ, ୧୭।୯(ପି.ଟି.): ନ୍ୟୁଜିଲାଣ୍ଡ ଏ’ ବିପକ୍ଷ ତୃତୀୟ ଅନ୍ ଅଫିସିଆଲ ଟେଷ୍ଟରେ ଭାରତ ଏ’ ପ୍ରଥମ ଇନିଂସରେ ଅଗ୍ରଣୀ ଲାଭ କରି ସୁବିଧାଜନକ ସ୍ଥିତିରେ ରହିଛି। ଶୁକ୍ରବାର ଦ୍ୱିତୀୟ ଦିବସ ଖେଳରେ ସ୍ପିନ ବୋଲର ସୌରଭ କୁମାର (୪/୪୮) ଓ ରାହୁଲ ଚହର (୩/୫୩)ଙ୍କ ଚମତ୍କାର ବୋଲିଂ ଯୋଗୁ ନ୍ୟୁଜିଲାଣ୍ଡ ଏ’ ଏହାର ପ୍ରଥମ ଇନିଂସରେ ୭୧.୨ ଓଭର ଖେଳି ୨୩୭ ରନ କରିପାରିଥିଲା। ଫଳରେ ଏହି ୪ ଦିନିଆ ଗେମ୍ରେ ଭାରତ ଏ’ ୫୬ ରନରେ ପ୍ରଥମ ଇନିଂସ ଅଗ୍ରଣୀ ଲାଭ କରିଛି। ଘରୋଇ ଦଳ ଏହାର ଦ୍ୱିତୀୟ ଇନିଂସ ଖେଳିବାକୁ ଯାଇ ଷ୍ଟମ୍ପ ଅପସାରଣ ବେଳକୁ ୧୧ ଓଭରରେ ୧ ଉଇକେଟ ବିନିମୟରେ ୪୦ ରନ କରିଛି। ଦଳ ମୋଟ ଉପରେ ୯୬ରନ ଅଗ୍ରଣୀ ଲାଭ କରିସାରିଛି। ଦ୍ୱିତୀୟ ଇନିଂସରେ ଭାରତ ଏହାର ଜଣେ ବ୍ୟାଟ୍ସମ୍ୟାନ ଅଭିମନ୍ୟୁ ଇଶ୍ୱରନ (୪)ଙ୍କୁ ହରାଇଛି। ସେ ସିନ୍ ସୋଲିଆଙ୍କ ଦ୍ୱାରା ଏଲ୍ବିଡବ୍ଲ୍ୟୁ ହୋଇଯାଇଥିଲେ। ପ୍ରଥମ ଇନିଂସରେ ଶତକ ହାସଲ କରିଥିବା ଋତୁରାଜ ଗାଏକ୍ୱାଡ ୧୮ ଏବଂ ଅଧିନାୟକ ପ୍ରିୟଙ୍କ ପଞ୍ଚଲ ୧୭ ରନ କରି ଅପରାଜିତ ରହିଛନ୍ତି। ପୂର୍ବରୁ ଭାରତ ଏ’ର ପ୍ରଥମ ଇନିଂସ ସ୍କୋର ୨୯୩ ଜବାବରେ ନ୍ୟୁଜିଲାଣ୍ଡ ଏ’ ୧୦୦ରନ ଭିତରେ ଦଳର ଅଧା ବ୍ୟାଟ୍ସମ୍ୟାନଙ୍କୁ ହରାଇ ବସିଥିଲା। ତେବେ ମାର୍କ ଚାପମ୍ୟାନ (୯୨) ସିନ୍ ସୋଲିଆ (୫୪) ଷଷ୍ଠ ଉଇକେଟରେ ୧୧୪ ରନ ଯୋଗ କରି ଦଳର ସ୍ଥିତିରେ ସୁଧାର ଆଣିଥିଲେ।
ସଂକ୍ଷିପ୍ତ ସ୍କୋର
ଭାରତ ଏ’ ପ୍ରଥମ ଇନିଂସ: ୨୯୩
ନ୍ୟୁଜିଲାଣ୍ଡ ଏ’ ପ୍ରଥମ ଇନିଂସ: ୨୩୭ (ମାର୍କ ଚାପମ୍ୟାନ-୯୨, ସିନ୍ ସୋଲିଆ-୫୪; ସୌରଭ କୁମାର-୪/୪୮, ରାହୁଲ ଚହର ୩/୫୩, ମୁକେଶ କୁମାର ୨/୪୮)। ଭାରତ ଦ୍ୱିତୀୟ ଇନିଂସ (ଅସମାପ୍ତ): ୪୦/୧।
