ବେଙ୍ଗାଲୁରୁ,୧୭ା୧(ପି.ଟି.): ଭାରତ ଓ ଆଫଗାନିସ୍ତାନ ମଧ୍ୟରେ ଖେଳା ଯାଉଥିବା ୩ ମ୍ୟାଚ୍ ବିଶିଷ୍ଟ ଟି୨୦ ସିରିଜ୍ର ଅନ୍ତିମ ମ୍ୟାଚ୍ ବୁଧବାର ବେଙ୍ଗାଲୁରୁର ଏମ୍ ଚିନ୍ନାସ୍ବାମୀ ଷ୍ଟାଡିୟମରେ ଖେଳାଯିବ। ପୂର୍ବରୁ ସିରିଜ୍ ଜିତି ସାରିଥିବା ବେଳେ ଭାରତ ଏହି ମ୍ୟାଚ୍ ଜିତି କ୍ଲିନ୍ ସୁଇପ୍ କରିବାକୁ ପ୍ରୟାସ କରିବ। ଏହାସହିତ ସଞ୍ଜୁ ସାମସନ୍, କୁଲଦୀପ୍ ଯାଦବ ଓ ଆଭେଶ୍ ଖାନ୍ଙ୍କ ପରି ଖେଳାଳିଙ୍କୁ ଏହି ମ୍ୟାଚ୍ରେ ସୁଯୋଗ ମିଳିବାର ସମ୍ଭାବନା ରହିଛି। ଜୁନ୍ରେ ଟି୨୦ ବିଶ୍ୱକପ୍ ପୂର୍ବରୁ ଏହା ଅନ୍ତିମ ଅନ୍ତର୍ଜାତୀୟ ମ୍ୟାଚ୍ ରହିଥିବା ବେଳେ ଭାରତ ନିଜର ବେଞ୍ଚ ଷ୍ଟ୍ରେନ୍ଥ ପରୀକ୍ଷା ନିଶ୍ଚୟ କରିବାକୁ ଚାହିଁବ। ଦୁଇଟି ଯାକ ମ୍ୟାଚ୍ରେ ଖାତା ଖୋଲିବାରେ ବିଫଳ ହୋଇଥିବା ଭାରତୀୟ ଅଧିନାୟକ ରୋହିତ ଶର୍ମାଙ୍କ ବ୍ୟାଟରୁ ଏକ ବଡ ଇନିଂସ ଆଶା କରିବେ ଭାରତୀୟ ସମର୍ଥକ। ସେହିପରି ୧୪ ମାସ ପରେ ପ୍ରତ୍ୟାବର୍ତ୍ତନ କରିଥିବା ବିରାଟ କୋହଲି ଏକ ଚମତ୍କାର ୨୯ ରନ୍ର ଇନିଂସ ଖେଳିଥିଲେ। ଏହି ଇନିଂସରେ କୋହଲିଙ୍କ ଷ୍ଟ୍ରାଇକ ରେଟ୍ ୧୮୧ ରହିଥିଲା। ଏହା ଭାରତୀୟ ମ୍ୟାନେଜ୍ମେଣ୍ଟ ପାଇଁ ଏକ ସବୁଜ ସଙ୍କେତ।
ତେବେ ଭାରତ ପାଇଁ ଏହି ସିରିଜ୍ରେ ସବୁଠାରୁ ଭଲ ପ୍ରଦର୍ଶନ କରିଛନ୍ତି ଅଲରାଉଣ୍ଡର ଶିବମ ଦୁବେ। ଆୟର୍ଲାଣ୍ଡ ଓ ଏସିଆନ୍ ଗେମ୍ସ ପରେ ଅଷ୍ଟ୍ରେଲିଆ ଓ ଦକ୍ଷିଣ ଆଫ୍ରିକା ସିରିଜ୍ ପାଇଁ ଦୁବେଙ୍କୁ ଅଣଦେଖା କରାଯାଇଥିଲା। ତେବେ ସୁଯୋଗ ମିଳିବା ମାତ୍ରକେ ଏହାର ଭରପୂର ଫାଇଦା ଉଠାଇଥିଲେ। ଦୁଇଟି ଯାକ ମ୍ୟାଚ୍ରେ ଅର୍ଦ୍ଧଶତକ ହାସଲ କରିବା ସହିତ ଦୁଇଟି ଉଇକେଟ ମଧ୍ୟ ନେଇଥିଲେ। ଓପନର ଯଶସ୍ବୀ ଜୟସ୍ବାଲ ଦ୍ୱିତୀୟ ଟି୨୦ରେ ଚମତ୍କାର ବ୍ୟାଟିଂ କରିବା ପରେ ସମାନ ଫର୍ମ ଜାରି ରଖିବାକୁ ପ୍ରୟାସ କରିବେ। ବୋଲିଂରେ ଭାରତ ଏହି ମ୍ୟାଚ୍ରେ ଜଣେ ସ୍ପିନରଙ୍କୁ ବିଶ୍ରାମ ଦେଇପାରେ। ଓ୍ବାଶିଂଟନ୍ ସୁନ୍ଦର ବଲ୍ ଜରିଆରେ ପ୍ରଭାବୀ ପ୍ରଦର୍ଶନ ଦେବାରେ ବିଫଳ ହୋଇଥିବା ବେଳେ ତାଙ୍କ ସ୍ଥାନରେ କୁଲଦୀପ୍ ଯାଦବଙ୍କୁ ସାମିଲ କରାଯାଇପାରେ। ସେହିପରି ମୁକେଶ କୁମାରଙ୍କ ସ୍ଥାନରେ ଆଭେଶ ଖାନ୍ଙ୍କୁ ସାମିଲ କରିପାରେ ଭାରତ।