ନୂଆଦିଲ୍ଲୀ,୨୭।୯: ୨୦୨୪ ଲୋକ ସଭା ନିର୍ବାଚନରେ ଏକାଠି ପ୍ରତିଦ୍ୱନ୍ଦ୍ୱିତା କରିବାକୁ ବିରୋଧୀ ଇଣ୍ଡିଆ ମେଣ୍ଟ ଗଠନ କରିଛନ୍ତି। ହେଲେ ଇଣ୍ଡିଆ ମେଣ୍ଟରେ ଆସନ ବଣ୍ଟନକୁ ନେଇ କୌଣସି ସହମତି ହୋଇପାରିନାହିଁ। ସୂତ୍ରରୁ ପ୍ରକାଶ ଯେ ୫ ରାଜ୍ୟ ବିଧାନସଭା ନିର୍ବାଚନ ପରେ ସିଟ୍ ବଣ୍ଟନ ଉପରେ ନିଷ୍ପତ୍ତି ନିଆଯିବ। ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆମ ଆଦମୀ ପାର୍ଟିର ସଂଯୋଜକ ଅରବିନ୍ଦ କେଜ୍ରିଓ୍ବାଲ ଦେଇଥିବା ଫର୍ମୁଲା ଉପରେ କୌଣସି ଆଲୋଚନା ହୋଇନାହିଁ। କେଜ୍ରିଓ୍ବାଲ ୩୧ ସେପ୍ଟେମ୍ବର ସୁଦ୍ଧା ସିଟ ବାଣ୍ଟିବାକୁ ଚାହୁଁଥିଲେ।
ଯଦିଓ ବିରୋଧୀ ଦଳ ଏକ ମେଣ୍ଟରେ ଏକାଠି ହୋଇଛନ୍ତି , କିନ୍ତୁ ସେମାନଙ୍କ ପାଇଁ ସବୁଠାରୁ ବଡ ଆହ୍ବାନ ହେଉଛି ସିଟ ବଣ୍ଟନ। ସର୍ବାଧିକ ଆସନ ପାଇବା ପାଇଁ ପ୍ରତ୍ୟେକ ଦଳର କେବଳ ଗୋଟିଏ ଇଚ୍ଛା ଅଛି। ଏହି ମେଣ୍ଟର ନେତୃତ୍ୱ ନେବାକୁ କଂଗ୍ରେସ ଯୋଜନା କରିଛି। ଯେଉଁଠାରେ ତାଙ୍କ ସରକାର କ୍ଷମତାରେ ଅଛନ୍ତି ସେହି ରାଜ୍ୟଗୁଡିକରେ ଅଧିକ ଆସନ ଦେବାକୁ କଂଗ୍ରେସ ଇଚ୍ଛୁକ ମନେ ହେଉନାହିଁ। ୫ଟି ରାଜ୍ୟର ବିଧାନସଭା ନିର୍ବାଚନ ପରେ ହିଁ ଆସନ ବଣ୍ଟନ ବିଷୟରେ ଆଲୋଚନା ହେବ ବୋଲି କଂଗ୍ରେସ ପୂର୍ବରୁ ସୂଚିତ କରିଥିଲା। ସୂଚନାଯୋଗ୍ୟ, ଚଳିତ ବର୍ଷ ଶେଷ ସୁଦ୍ଧା ଦେଶର ୫ଟି ରାଜ୍ୟ ମିଜୋରାମ, ଛତିଶଗଡ, ମଧ୍ୟପ୍ରଦେଶ, ରାଜସ୍ଥାନ ଏବଂ ତେଲଙ୍ଗାନାରେ ବିଧାନସଭା ନିର୍ବାଚନ ଅନୁଷ୍ଠିତ ହେବ।