ମେଲବୋର୍ନ,୩୧।୧୨ (ପି.ଟି.): ଜାନୁୟାରୀ ୪ ତାରିଖ ପୂର୍ବରୁ ଭାରତ ଓ ଅଷ୍ଟ୍ରେଲିଆ କ୍ରିକେଟ ଦଳ ସିଡ୍ନୀ ଗସ୍ତ କରିବେ ନାହିଁ ବୋଲି କ୍ରିକେଟ ଅଷ୍ଟ୍ରେଲିଆ (ସିଏ) ମୁଖ୍ୟ କାର୍ଯ୍ୟନିର୍ବାହୀ ନିକ୍ ହୋକ୍ଲି କହିଛନ୍ତି। ଦୁଇ ଦଳ ଆଉ କିଛିଦିନ ମେଲବୋର୍ନରେ ଟ୍ରେନିଂ ଜାରି ରଖିବେ। ତୃତୀୟ ଟେଷ୍ଟ ମ୍ୟାଚ ସିଡ୍ନୀ କ୍ରିକେଟ ଗ୍ରାଉଣ୍ଡ (ଏସ୍ସିଜି)ରେ ଜାନୁୟାରୀ ୭ ତାରିଖରେ ଆରମ୍ଭ ହେବାର କାର୍ଯ୍ୟକ୍ରମ ରହିଛି। ତୃତୀୟ ଟେଷ୍ଟ ଖେଳିବା ପାଇଁ ଦୁଇ ଦଳ ମ୍ୟାଚ ଆରମ୍ଭ ହେବାର ଠିକ୍ ୩ ଦିନ ପୂର୍ବରୁ ସିଡ୍ନୀ ଯାତ୍ରା କରିବେ।
ନୂଆବର୍ଷ ପୂର୍ବରୁ ଦୁଇଦଳ ସିଡ୍ନୀରେ ପହଞ୍ଚିବାର କାର୍ଯ୍ୟକ୍ରମ ଥିଲା। ତେବେ ସିଡ୍ନୀରେ କରୋନ ଭାଇରସ୍ ସଂକ୍ରମଣକୁ ଦୃଷ୍ଟିରେ ରଖି କାର୍ଯ୍ୟକ୍ରମରେ ପରିବର୍ତ୍ତନ କରାଯାଇଛି। ଫଳରେ ଦୁଇ ଦଳର ଖେଳାଳି, ଅଫିସିଆଲମାନେ ମେଲବୋର୍ନରେ ଆଉ କିଛିଦିନ ରହିବେ ବୋଲି ନିଷ୍ପତ୍ତି ନିଆଯାଇଛି। ଗତ ରାତିରେ ସିଡ୍ନୀ ଯିବାକୁ ଆମେ ଘୋଷଣ କରିଥିଲୁ। କିନ୍ତୁ ନିରପତ୍ତା ବ୍ୟବସ୍ଥାକୁ ଦୃଷ୍ଟିରେ ରଖି କାର୍ଯ୍ୟକ୍ରମରେ ପରିବର୍ତ୍ତନ ଆଣିଥିଲୁ। ମେଲବୋର୍ନରେ ଆଉ କିଛିଦିନ ଖେଳାଳିମାନେ ରହିବା ସହ ଟ୍ରେନିଂ ଜାରି ରଖିବେ ଓ ୩ ଦିନ ପୂର୍ବରୁ ମ୍ୟାଚ ଖେଳିବାକୁ ସିଡ୍ନୀ ଯାତ୍ରା କରିବେ ବୋଲି ହୋକ୍ଲି କହିଛନ୍ତି।
ମଙ୍ଗଳବାର ସିଏ ସିଡ୍ନୀରେ ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ସିଡ୍ନୀରେ ତୃତୀୟ ଟେଷ୍ଟ ଆୟୋଜନ କରିବାକୁ ନିଷ୍ପତ୍ତି ନେଇଥିଲା। ଫଳରେ କୋଭିଡ୍-୧୯ କାରଣରୁ ମେଲବୋର୍ନରେ ତୃତୀୟ ଟେଷ୍ଟ ଆୟୋଜନ ହେବା ନେଇ ଚାଲିଥିବା ଚର୍ଚ୍ଚା ତଥା ଅନୁମାନର ପୂର୍ଣ୍ଣଚ୍ଛେଦ ପଡିଛି। କରୋନା ସଂକ୍ରମଣ କାରଣରୁ ସିଡ୍ନୀ କଟକଣା କଡ଼ା କରାଯାଇଛି। ବ୍ରୋଡକାଷ୍ଟରମାନେ କିପର ସୁରକ୍ଷିତ ଭାବେ ବ୍ରିସ୍ବେନ ଯିବେ ସେ ନେଇ ବ୍ୟବସ୍ଥା କରାଯାଇଛି। ସିଡ୍ନୀରେ ମଧ୍ୟ ଜୈବ ସୁରକ୍ଷିତ ପରିବେଶ ସୃଷ୍ଟି କରଯାଇଛି ବୋଲି ହୋକ୍ଲି କହିଛନ୍ତି। ଉଲ୍ଲେଖଥାଉ କି, ୪ ମ୍ୟାଚବିଶିଷ୍ଟ ଟେଷ୍ଟ ସିରିଜ ୧-୧ ସମାନ ସ୍ତରରେ ରହିଛି। କୋଭିଡ୍-୧୯ କାରଣରୁ ତୃତୀୟ ଟେଷ୍ଟ ଆୟୋଜନ ପାଇଁ ମେଲବୋର୍ନକୁ ବିକଳ୍ପ ଭେନ୍ୟୁ ଭାବେ ମାନ୍ୟତା ଦିଆଯାଇଥିଲା।