ମେଲବୋର୍ନ: ଭାରତୀୟ କ୍ରିକେଟ ଦଳ ଗୁରୁବାର ଅଷ୍ଟ୍ରେଲିଆରେ ପହଞ୍ଚିଛି। କ୍ୱାରାଣ୍ଟାଇନ୍ ଅବଧି ଶେଷ ହେବାପରେ ଟିମ୍ ଇଣ୍ଡିଆ ସେଠାରେ ଚଳିତମାସ ୨୭ରୁ ଦିନିକିଆ ସିରିଜ ଖେଳିବ। ଏହା ପରେ ଟି୨୦ ଏବଂ ଶେଷରେ ୪ ମ୍ୟାଚବିଶିଷ୍ଟ ଟେଷ୍ଟ ସିରିଜ ଅନୁଷ୍ଠିତ ହେବ। ଟେଷ୍ଟ ସିରିଜରେ ଡେଭିଡ ଓ୍ବାର୍ନରଙ୍କ ସହ କିଏ ଅଷ୍ଟ୍ରେଲିଆ ପକ୍ଷରୁ ଇନିଂସ ଓପନ କରିବେ ତାହାକୁ ନେଇ ଚର୍ଚ୍ଚା ଜୋର ଧରିଛି। ନିୟମିତ ଓପନର ଜୋ ବନର୍ସ ଏବଂ ଯୁବ ଖେଳାଳି ଓ୍ବିଲ୍ ପୁକୋଭସ୍କି ଏହି ସ୍ଥାନପାଇଁ ଦୌଡ଼ରେ ରହିଛନ୍ତି। ପୂରା ଫର୍ମରେ ଥିବା ପୁକୋଭସ୍କିଙ୍କ ସପକ୍ଷରେ ଅନେକେ ମତ ଦେଉଥିବାବେଳେ ମୁଖ୍ୟ କୋଚ୍ ଜଷ୍ଟିନ ଲାଙ୍ଗର କିନ୍ତୁ ଭିନ୍ନମତ ଦେଇଛନ୍ତି। ଓ୍ବାର୍ନରଙ୍କ ସହିତ ବନର୍ସ ଇନିଂସ ଓପନ କରିବେ ବୋଲି ସେ ଶୁକ୍ରବାର ସ୍ପଷ୍ଟ କରିଛନ୍ତି। ଗତ ଗ୍ରୀଷ୍ମଋତୁରେ ବନର୍ସଙ୍କ ଆଭରେଜ ୩୨ ରହିଥିଲା। ଗତ ଶେଫିଲ୍ଡ ସିଲ୍ଡ ସିଜନରେ ସେ ୧୧.୪୦ ଆଭରେଜରେ ୫୭ ରନ କରିବାକୁ ସକ୍ଷମ ହୋଇଛନ୍ତି। ଅନ୍ୟପକ୍ଷରେ ୨୨ ବର୍ଷୀୟ ପୁକୋଭସ୍କି କ୍ରମାଗତ ୨ଟି ଦ୍ୱିଶତକ ହାସଲ କରି ଚୟନକର୍ତ୍ତାଙ୍କୁ ପ୍ରଭାବିତ କରିଛନ୍ତି। ସେ ଓ୍ବେଷ୍ଟର୍ନ ଅଷ୍ଟ୍ରେଲିଆ ବିପକ୍ଷରେ ୨୦୨ ଏବଂ ସାଉଥ୍ ଅଷ୍ଟ୍ରେଲିଆ ବିପକ୍ଷରେ ଅପରାଜିତ ୨୫୫ ରନର ଇନିଂସ ଖେଳିଛନ୍ତି।
ପୁକୋଭସ୍କି ଯେପରି ଖେଳିଛନ୍ତି ପ୍ରଥମ ଟେଷ୍ଟ ପାଇଁ ଉପଯୁକ୍ତ। ଆମେ ଏହାକୁ ବିଚାରକୁ ନେଉଛୁ ଏବଂ ଉଭୟଙ୍କ ମଧ୍ୟରେ ତୁଳନା କରୁଛୁ। ଗତଥର ଓ୍ବାର୍ନର ଓ ବନର୍ସଙ୍କ ଯୋଡ଼ି ଭଲ ଜମିଥିଲା। ସେମାନଙ୍କ ମଧ୍ୟରେ ଉତ୍ତମ ବୁଝାମଣା ରହିଛି। ତେଣୁ ଆମେ ଏହି ଯୋଡ଼ିଙ୍କୁ ଅପରିବର୍ତ୍ତିତ ରଖିବାକୁ ଚାହୁଁଛୁ ବୋଲି ଲାଙ୍ଗର କହିଛନ୍ତି। ଓପନିଂ ଯୋଡ଼ିଭାବେ ବନର୍ସ ଓ ଓ୍ବାର୍ନର ୫୦.୫୬ ଆଭରେଜରେ ୧,୩୬୫ ରନ ସ୍କୋର କରିଛନ୍ତି। ଅଷ୍ଟ୍ରେଲିଆକୁ ଆଇସିସି ଟେଷ୍ଟ ର଼୍ୟାଙ୍କିଙ୍ଗର ଶୀର୍ଷରେ ରଖିବାରେ ଏମାନଙ୍କ ଅନେକ ଅବଦାନ ରହିଛି। ଆମେ କାହାକୁ ଅଣଦେଖା କରିବାକୁ ଚାହୁଁନାହିୁଁ। ଅପରପକ୍ଷରେ ଦୀର୍ଘଦିନଧରି ଅଷ୍ଟ୍ରେଲିଆ କ୍ରିକେଟକୁ ମଜଭୁତ ସ୍ଥିତିରେ ପହଞ୍ଚାଇଥିବା ଖେଳାଳିଙ୍କୁ ମଧ୍ୟ ଦେଖୁଛୁ। ବିଗତ ବର୍ଷଗୁଡ଼ିକରେ ପରୀକ୍ଷା ନିରୀକ୍ଷା ମଧ୍ୟରେ ଅନେକ ଖେଳାଳି ଦଳକୁ ଆସିଛନ୍ତି ଏବଂ ଅନେକେ ବାହାରିଛନ୍ତି। ଆବଶ୍ୟକ ପଡ଼ିଲେ ଆଗକୁ ମଧ୍ୟ ତାହା ଜାରି ରହିବ। ମାତ୍ର ବର୍ତ୍ତମାନ ସ୍ଥିତିରେ କେତେକ କ୍ଷେତ୍ରରେ ସ୍ଥିର ରହିବାର ଯୁକ୍ତିଯୁକ୍ତତା ରହିଛି। ତେବେ ଓ୍ବାର୍ମଅପ୍ ମ୍ୟାଚ ପରେ ସ୍ଥିତି ଅଧିକ ସ୍ପଷ୍ଟ ହୋଇଯିବ ବୋଲି ଲାଙ୍ଗର ପ୍ରକାଶ କରିଛନ୍ତି। ୨ଟି ଟୁର୍ ଗେମ୍ରେ ଭିନ୍ନଭିନ୍ନ ଖେଳାଳିଙ୍କୁ ସୁଯୋଗ ମିଳିବ ବୋଲି ସେ ସ୍ପଷ୍ଟ କରିଛନ୍ତି। ଟେଷ୍ଟ ସିରିଜ ପୂର୍ବରୁ ଭାରତ ଓ ଅଷ୍ଟ୍ରେଲିଆ ମଧ୍ୟ ୩ ମ୍ୟାଚ ବିଶିଷ୍ଟ ଦିନିକିଆ ଓ ଟି୨୦ ସିରିଜ ଖେଳିବେ। ଡିସେମ୍ବର ୧୭ରୁ ପ୍ରଥମ ଟେଷ୍ଟ ଆଡିଲେଡ୍ରେ ଅନୁଷ୍ଠିତ ହେବ।