ମୁମ୍ବାଇ, ୨୧ା୧୧ (ପି.ଟି.): ଆଗାମୀ ଭାରତ-ଅଷ୍ଟ୍ରେଲିଆ କ୍ରିକେଟ ସିରିଜରେ ଦୁଇ ଦଳ ମଧ୍ୟରେ କଡ଼ା ମୁକାବିଲା ହେବ। ଉଭୟ ଦଳରେ ବିଶ୍ୱର କେତେଜଣ ଶ୍ରେଷ୍ଠ ବୋଲର ରହିଛନ୍ତି। ସିରିଜରେ ସେମାନେ ନିର୍ଣ୍ଣାୟକ ଭୂମିକା ନେବେ ବୋଲି ପୂର୍ବତନ ବାମହାତୀ ପେସ୍ ବୋଲର ଜାହିର ଖାନ୍ କହିଛନ୍ତି। ଭାରତୀୟ କ୍ରିକେଟ ଦଳ ବର୍ତ୍ତମାନ ଅଷ୍ଟ୍ରେଲିଆରେ ରହିଛି। ସେଠାରେ ଦଳ ଏକ ପୂର୍ଣ୍ଣାଙ୍ଗ ସିରିଜ ଖେଳିବ। ଏଥିରେ ୩ ଅନ୍ତର୍ଜାତୀୟ ଦିନିକିଆ, ସମାନ ସଂଖ୍ୟକ ଟି୨୦ ଏବଂ ୪ ଟେଷ୍ଟ ମ୍ୟାଚ ଖେଳାଯିବ। ନଭେମ୍ବର ୨୭ରେ ଅନ୍ତର୍ଜାତୀୟ ଦିନିକିଆ ସହ ଟୁର୍ ଆରମ୍ଭ ହେବ। ଭାରତ ଓ ଅଷ୍ଟ୍ରେଲିଆ ଦଳରେ ଯଶପ୍ରୀତ ବୁମ୍ରା, ମହମ୍ମଦ ସାମି, ମିଚେଲ ଷ୍ଟାର୍କ ଏବଂ ପ୍ୟାଟ୍ କୁମିନ୍ସଙ୍କ ଭଳି ଉନ୍ନତ ବୋଲର ଅଛନ୍ତି। ଅଷ୍ଟ୍ରେଲିଆ ପିଚ୍ଗୁଡ଼ିକ ସବୁବେଳେ ଭଲ ପେସ୍ ଓ ବାଉନ୍ସ କରିଥାଏ। ଦିନିକିଆ, ଟି୨୦ ଅବା ଟେଷ୍ଟ ମ୍ୟାଚ୍ ହେଉ ବୋଲରମାନେ ଦଳଗତ ପ୍ରଦର୍ଶନ କରି ବିପକ୍ଷ ଦଳର ସ୍କୋରକୁ କିପର ସୀମିତ କରିପାରୁଛନ୍ତି ତାହା ଉପରେ ପଳାଫଳ ନିର୍ଭର କରିବ ବୋଲି ୨୦୧୧ ବିଶ୍ୱକପ୍ ବିଜୟୀ ଭାରତୀୟ ଦଳର ଅନ୍ୟତମ ସଦସ୍ୟ ଜାହିର ପ୍ରକାଶ କରିଛନ୍ତି। ଏହି ସିରିଜରେ ଯେଉଁମାନେ ପ୍ରଭାବୀ ବୋଲିଂ କରିବେ ସେମାନେ ବିଶ୍ୱର ଟପ୍ ଲାଇନ୍ ବୋଲର ଭାବେ ପରିଚିତି ଲାଭ କରିବେ। ଜାହିର ପୁନଶ୍ଚ କହିଛନ୍ତି, ଷ୍ଟିଭ୍ ସ୍ମିଥ୍ ଓ ଡେଭିଡ୍ ଓ୍ବାର୍ନରଙ୍କ ଉପସ୍ଥିତି ଯୋଗୁ ଭାରତକୁ ଅଷ୍ଟ୍ରେଲିଆରେ କଡ଼ା ପରୀକ୍ଷାର ସମ୍ମୁଖୀନ ହେବାକୁ ପଡ଼ିବ। ପୂର୍ବରୁ ୨୦୧୮-୧୯ ଅଷ୍ଟ୍ରେଲିଆ ଟୁର୍ରେ ଓ୍ବାର୍ନର ଓ ସ୍ମିଥ୍ଙ୍କ ଅନୁପସ୍ଥିତିରେ ଭାରତ ୨-୧ରେ ସିରିଜ ବିଜୟୀ ହୋଇଥିଲା। ସେତେବେଳେ ଏହି ଦୁଇ ଖେଳାଳି ବଲ୍ ଟ୍ୟାମ୍ପରିଂ ମାମଲାରେ ଏକ ବର୍ଷ ବାସନ୍ଦ ଦଣ୍ଡ ଭୋଗୁଥିଲେ। ଏହି ସିରିଜରେ ଉଭୟ ଦଳର କ୍ୱାଲିଟି ବ୍ୟାଟିଂ ଓ ବୋଲିଂ ଲାଇନ୍ ଅପ୍ ରହିଥିବାରୁ କାହାରିକୁ ଫେଭରାଇଟ୍ କୁହାଯାଇପାରିବ ନାହିଁ। ତେଣୁ ଆଗାମୀ ଟୁର୍ ରୋମାଞ୍ଚକ ହେବ। ଅଷ୍ଟ୍ରେଲୀୟ ପେସ୍ କିମ୍ବଦନ୍ତୀ ଗ୍ଲେନ୍ ମ୍ୟାକ୍ଗ୍ରା ମଧ୍ୟ ସମାନ କଥା କହିଛନ୍ତି। ସେ କହିଛନ୍ତି, ବର୍ତ୍ତମାନ ଅଷ୍ଟ୍ରେଲିଆ ଟିମ୍କୁ ସ୍ମିଥ୍ ଓ ଓ୍ବାର୍ନର ଫେରିଛନ୍ତି ସତ ମାତ୍ର ଭାରତୀୟ ଦଳ ମଧ୍ୟ ସମ ପରିମାଣରେ ଶକ୍ତିଶାଳୀ। ସିରିଜ ଜିତିବା ଲାଗି ସେମାନେ ମାନସିକ ସ୍ତରରେ ଦୃଢମନା ଓ ଆକ୍ରମଣଶୀଳ। ଅଷ୍ଟ୍ରେଲିଆ କଣ୍ଡିଶନରେ କିପରି ସଫଳ ହେବାକୁ ହୁଏ ତାହାର କୌଶଳ ସେମାନେ ଗତଥର ଜାଣିପାରିଛନ୍ତି।