ପୁଣେ,୨୮।୩ : ଏଥର ଖାଲି ହାତରେ ଫେରିଛି ଇଂଲଣ୍ଡ। କୌଣସି ଫର୍ମାଟରେ ଜିତିପାରିଲା ନାହିଁ ସିରିଜ୍। ବିରାଟ କୋହଲିଙ୍କ ନେତୃତ୍ୱାଧୀନ ଭାରତୀୟ ଦଳର ଫିଲ୍ଡିଂ ବର୍ତ୍ତମାନ କେଉଁ ସ୍ଥରର ତାହା ଦେଖିବାକୁ ମିଳିଲା। ପ୍ରଥମେ ଟେଷ୍ଟ ଓ ଟି୨୦ ଆଉ ଏବେ ଦିନିକିଆ ଫାର୍ମାଟରେ ସିରିଜ୍ ଜିତିଛି ଭାରତ। ଟେଷ୍ଟରେ ଏକତରଫା ହେଲେ ସୀମିତ ଓଭର କ୍ରିକେଟରେ ଜିତିବା ପାଇଁ କଡ଼ା ଚ୍ୟାଲେଞ୍ଜର ସମ୍ମୁଖୀନ ହେବାକୁ ପଡ଼ିଥିଲା। ପୁଣେରେ ରବିବାର ଖେଳାଯାଇଥିବା ଦିନିକିଆ ସିରିଜ୍ର ନିର୍ଣ୍ଣାୟକ ମ୍ୟାଚ୍ରେ ଇଂଲଣ୍ଡକୁ ୭ ରନ୍ରେ ହରାଇ ଭାରତ ସିରିଜ୍କୁ ୨-୧ରେ ହାତେଇ ନେଇଛି।
ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ଭାରତୀୟ ଦଳ ୪୮.୨ ଓଭରରେ ୩୨୯ ରନ୍ରେ ଅଲଆଉଟ୍ ହୋଇଯାଇଥିଲା। ରିଷଭ ପନ୍ତ (୭୮ ରନ୍, ୫ ଚୌକା ଓ ୪ ଛକା), ଶିଖର ଧାଓନ (୬୭ ରନ୍, ୧୦ ଚୌକା) ଓ ହାର୍ଦ୍ଦିକ ପାଣ୍ଡ୍ୟା (୬୪ ରନ୍, ୫ ଚୌକା ଓ ୪ ଛକା)ଙ୍କ ଖେଳିଥିଲେ ଅର୍ଦ୍ଧଶତକ ଇନିଂସ। ଇଂଲଣ୍ଡ ପାଇଁ ମାର୍କ ଉଡ୍ ୩ ସଫଳତା ପାଇଥିବାବେଳେ ଆଦିଲ ରଶିଦ ହାତେଇଥିଲେ ୨ ଉଇକେଟ।
ଜବାବରେ ଇଂଲଣ୍ଡକୁ ମିଳି ନ ଥିଲା ପୂର୍ବ କିଛି ମ୍ୟାଚ୍ ଭଳି ବିସ୍ଫୋରକ ଆରମ୍ଭ। କ୍ରମାଗତ ଉଇକେଟ ପତନ ଘଟାଇଥିଲେ ଭାରତୀୟ ବୋଲର। ମୁଖ୍ୟତ ଶାର୍ଦ୍ଦୁଳ ଠାକୁର (୪) ଓ ଭୁବନେଶ୍ୱର କୁମାର (୩) ଘାତକ ବୋଲିଂ କରିଥିଲେ। କିଛିଟା ଶ୍ରେୟ କୋହଲିଙ୍କ ସେହି ଚମତ୍କାର କ୍ୟାଚ୍କୁ ଦେବାକୁ ପଡ଼ିବ। କିନ୍ତୁ ଦାଓ୍ବିଦ ମଲାନ(୫୦), ଲିଆମ ଲିଭିଙ୍ଗଷ୍ଟୋନ (୩୬) ଓ ସାମ କୁରାନ ଆକର୍ଷଣୀୟ ୯୫*ଙ୍କ ଯୋଗୁ ଇଂଲଣ୍ଡ ଦଳର ବିଜୟ ସମ୍ଭାବନା ଶେଷ ଓଭର ପର୍ଯ୍ୟନ୍ତ ଥିଲା। କିନ୍ତୁ ହିରୋ ହେଇଗଲେ ଟି. ନଟରାଜନ। ତାଙ୍କ ବୋଲିଂ ଯୋଗୁ ଇଂଲଣ୍ଡ ବିଜୟ ଲକ୍ଷ୍ୟଠାରୁ ୮ ରନ୍ ଦୂରରେ ରହି ଯାଇଥିଲା।