ନୂଆଦିଲ୍ଲୀ,୧୭।୧୨: ଚଳିତ ଏସିଆନ ଚାମ୍ପିୟନ୍ସ ଟ୍ରଫି ହକି ଟୁର୍ନାମେଣ୍ଟରେ ଭାରତୀୟ ଦଳ ୩-୧ ଗୋଲରେ ଚିରପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ହରାଇ ଦେଇଛି। ଏହି ବିଜୟ ସହ ଚଳିତ ଇଭେଣ୍ଟରେ ଅପରାଜେୟ ଧାରା ଜାରି ରଖିଛି ଟୋକିଓ ଅଲିମ୍ପିକ୍ସ ବ୍ରୋଞ୍ଜ ପଦକଧାରୀ ଟିମ୍ ଇଣ୍ଡିଆ। ଶୁକ୍ରବାର ଖେଳାଯାଉଥିବା ରାଉଣ୍ଡ ରବିନ ମ୍ୟାଚ୍ରେ ହରମନପ୍ରୀତ ସିଂଙ୍କ ଡବଲ ଗୋଲ ସ୍କୋର କରି ଥିବା ବେଳେ ଆକାଶଦୀପ ସିଂ ଗୋଟିଏ ଗୋଲ ଦେଇଥିଲେ। କିନ୍ତୁ ପାକିସ୍ତାନ ପକ୍ଷରୁ ତୃତୀୟ କ୍ୱାର୍ଟରରେ ଗୋଟିଏ ଗୋଲ ପରିଷୋଧ କରିଥିଲେ ଜୁନେଦ ମଞ୍ଜୁର।
ଏଥିପୂର୍ବରୁ ଟୁର୍ନାମେଣ୍ଟରେ କୋରିଆ ବିପକ୍ଷ ପ୍ରଥମ ମ୍ୟାଚ୍ ଡ୍ର’ ରହିବାରୁ ଭାରତକୁ ଏକ ପଏଣ୍ଟରେ ସନ୍ତୁଷ୍ଟ ରହିବାକୁ ପଡ଼ିଥିଲା। କିନ୍ତୁ ଦ୍ୱିତୀୟ ମ୍ୟାଚ୍ରେ ଆୟୋଜକ ବାଂଲାଦେଶକୁ ୯-୦ ଗୋଲରେ ହରାଇଥିଲା ଟିମ୍ ଇଣ୍ଡିଆ। ଫଳରେ ଭାରତ ଏବେ ୩ ମ୍ୟାଚ୍ରୁ ୭ ପଏଣ୍ଟ ସହ ଅଙ୍କ ତାଲିକାର ଶୀର୍ଷରେ ରହିଛି।