ବାର୍ସିଲୋନା, ୩୧।୭ (ପି.ଟି.): ସ୍ପାନିଶ ହକି ଫେଡେରେଶନର ଶତବାର୍ଷିକୀ ଅବସରରେ ଚାଲିଥିବା ଅନ୍ତର୍ଜାତୀୟ ହକି ଟୁର୍ନାମେଣ୍ଟର ରବିବାର ଅନୁଷ୍ଠିତ ଏକ ମ୍ୟାଚରେ ଭାରତ ୩-୦ ଗୋଲରେ ସ୍ପେନ୍କୁ ପରାସ୍ତ କରିଛି। ମ୍ୟାଚରେ ସମ୍ପୂର୍ଣ୍ଣ ଆଧିପତ୍ୟ ବିସ୍ତାର କରି ଖେଳିଥିବା ଭାରତ ପକ୍ଷରୁ ବନ୍ଦନା କାଟରିଆ ୨୨, ମୋନିକା ୪୮ ଓ ଉଦିତା ୫୮ତମ ମିନିଟରେ ଗୋଟିଏ ଲେଖାଏ ଗୋଲ ସ୍କୋର କରିଥିଲେ। ଏଥିରେ ବିଜୟ ହାସଲ କରିବା ସହ ଭାରତୀୟ ମହିଳା ଦଳ ଏପର୍ଯ୍ୟନ୍ତ ଟୁର୍ନାମେଣ୍ଟରେ ଅପରାଜେୟ ରହିଛି। ଶନିବାର ଅନୁଷ୍ଠିତ ମ୍ୟାଚରେ ଲାଲରେମସିଆମିଙ୍କ ହ୍ୟାଟ୍ରିକ ଗୋଲ ବଳରେ ଭାରତ ୩-୦ ଗୋଲରେ ଇଂଲଣ୍ଡକୁ ହରାଇ ଦେଇଥିଲା। ପୂର୍ବ ୨ଟି ମ୍ୟାଚକୁ ଭାରତ ଇଂଲଣ୍ଡ ବିପକ୍ଷରେ ୧-୧ ଓ ସ୍ପେନ୍ ବିପକ୍ଷରେ ୨-୨ରେ ଡ୍ର ରଖିଥିଲା।
ସ୍ପେନ୍ ବିପକ୍ଷରେ ଭାରତ ପ୍ରଥମ କ୍ୱାର୍ଟରରୁ ହିଁ ଚାପ ପକାଇ ଖେଳିଥିଲା। ପରସ୍ପର ମଧ୍ୟରେ ଉତ୍ତମ ପାସ୍ ଦେଇ ଖେଳାଳିମାନେ କେତେକ ସୁଯୋଗ ସୃଷ୍ଟି କରିଥିଲେ। ମାତ୍ର ପ୍ରଥମ କ୍ୱାର୍ଟରରେ ଗୋଲ ହୋଇପାରି ନ ଥିଲା। ପ୍ରଥମ କ୍ୱାର୍ଟରର ଶେଷ ୫ ମିନିଟ୍ରେ ସ୍ପେନ୍ ପକ୍ଷରୁ ଏକାଧିକ ଗୋଲ ସ୍କୋରିଂ ସୁଯୋଗ ସୃଷ୍ଟି କରାଯାଇଥିଲା। ତେବେ ଭାରତୀୟ ଦଳର ଅଧିନାୟିକା ତଥା ଗୋଲକିପର ସବିତା ସଫଳତାର ସହ ତାହାକୁ ପ୍ରତିହତ କରିଥିଲେ। ଦ୍ୱିତୀୟ କ୍ୱାର୍ଟର ଆରମ୍ଭରୁ ଭାରତ ଆକ୍ରମଣକୁ ଜୋରଦାର କରିଥିଲା।
୨୨ତମ ମିନିଟରେ ସୁଶୀଳାଙ୍କ ପାଖରୁ ପାସ୍ ପାଇ ନେହା ଗୋୟଲ ଗୋଲ ଦେବାକୁ ପ୍ରୟାସ କରିଥିଲେ। ମାତ୍ର ତାଙ୍କ ଶଟ୍କୁ ସ୍ପେନ୍ ଗୋଲକିପର କ୍ଲାରା ପେରେଜ ପ୍ୟାଡ୍ରେ ଠେଲି ଦେଇଥିଲେ। ରିବାଉଣ୍ଡ ହୋଇ ଫେରିଆସୁଥିବା ବଲ୍କୁ ନିୟନ୍ତ୍ରଣକୁ ଆଣି ଲାଲରେମସିଆମି ବନ୍ଦନାଙ୍କ ନିକଟକୁ ପଠାଇ ଦେଇଥିଲେ। ବନ୍ଦନା ତାହାକୁ ଗୋଲରେ ପରିଣତ କରିବାରେ କୌଣସି ଭୁଲ୍ କରି ନ ଥିଲେ। ୪୮ତମ ମିନିଟରେ ମିଳିଥିବା ପେନାଲ୍ଟି କର୍ନରକୁ ଗୋଲରେ ପରିଣତ କରିଥିଲେ ମୋନିକା। ଶେଷ ଭାଗରେ ଗୋଲ ପରିଶୋଧ ପାଇଁ ସ୍ପେନ୍ ଖେଳାଳିମାନେ ଉଦ୍ୟମ କରିଥିଲେ ହେଁ ଭାରତୀୟ ଡିଫେଣ୍ଡର ଦୀପ୍ ଗ୍ରେସ୍ ଏକ୍କା, ନିକ୍କି ପ୍ରଧାନ ଓ ସୁଶୀଳା ଚାନୁ ତାହାକୁ ସଫଳତାର ସହ ପ୍ରତିହତ କରିଥିଲେ। ମ୍ୟାଚ ଶେଷ ହେବାର ୨ ମିନିଟ ପୂର୍ବରୁ ଉଦିତା ଭାରତ ପକ୍ଷରୁ ତୃତୀୟ ଗୋଲଟି ସ୍କୋର କରିଥିଲେ।