ନୂଆଦିଲ୍ଲୀ, ୭।୯: ଦେଶରେ କରୋନା ମହାମାରୀ ସଂକ୍ରମଣ ଯୋଗୁ ସ୍ଥିିତି ଅସମ୍ଭାଳ ହେବାରେ ଲାଗିଛି। ଏପରିସ୍ଥଳେ କଂଗ୍ରେସ ପକ୍ଷରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସରକାରକୁ ଘେରିବା ଆରମ୍ଭ ହୋଇଛି। କଂଗ୍ରେସ ପ୍ରବକ୍ତା ରଣଦୀପ୍ ସୁର୍ଜଓ୍ବୋଲା କହିଛନ୍ତି ଯେ, ମୋଦି କରୋନା ରୋକିବା କ୍ଷେତ୍ରରେ ସମ୍ପୂର୍ଣ୍ଣ ବିଫଳ ହୋଇନ୍ତି। ମହାମାରୀକୁ ଯେଉଁଭଳି ଭାବେ ରୋକା ଯାଇପାରିଥାନ୍ତା ତାହାର ଯୋଜନା କରାଯାଇନାହିଁ। ବିନା ଯୋଜନାରେ ସରକାର କରୋନା ଲଢ଼େଇରେ ସାମିଲ ହୋଇ ଦେଶବାସୀଙ୍କୁ ହାଣ ମୁହଁରେ ପକାଇ ଦେଇଛନ୍ତି। ଏହାର ଜବାବ ମୋଦିଙ୍କୁ ଦେବାକୁ ପଡ଼ିବ ବୋଲି ସେ କହିଛନ୍ତି। କରୋନାରୁ ମୁକ୍ତି ଏବଂ ବୁଡ଼ିଯାଉଥିବା ଅର୍ଥ ବ୍ୟବସ୍ଥାରେ ସୁଧାର ଆଣିବାରେ କିଭଳି ଯୋଜନାବଦ୍ଧ ଭୂମିକା ଗ୍ରହଣ କରାଯିବ ସେ ନେଇ ସରକାର ନିଜ ପକ୍ଷ ରଖନ୍ତୁ ବୋଲି ରଣଦୀପ୍ କହିଛନ୍ତି। ମୋଦି କହିଥିଲେ ମହାଭାରତ ଯୁଦ୍ଧ ୧୮ ଦିନରେ ଶେଷ ହୋଇଥିଲା। କରୋନା ସହିତ ଲଢ଼େଇ ୨୧ ଦିନରେ ଶେଷ ହେବ। ତେବେ ଇତିମଧ୍ୟରେ ୧୬୬ ଦିନ ବିତି ଯାଇଥିଲେ ବି ଦେଶରେ କରୋନା ତାଣ୍ଡବ ଜାରି ରହିଛି। ଦେଶରେ ଲୋକେ କରୋନାରେ ଆକ୍ରାନ୍ତ ହୋଇ ମରୁଥିବାବେଳେ ମୋଦି ମୟୂରକୁ ଦାନା ଖାଇବାକୁ ଦେଉଛନ୍ତି। ଦେଶରେ କରୋନା ଯୋଦ୍ଧା ଲଢ଼େଇ ଜାରି ରଖିଛନ୍ତି। ମାତ୍ର ସେନାପତି ଯୁଦ୍ଧର ନେତୃତ୍ୱ ନ ନେଇ ଲୁଚି ଯାଇଛନ୍ତି। ଫଳରେ ଏବେ ଭାରତ କରୋନା ସଂକ୍ରମଣରେ ପୃଥିବୀର କ୍ୟାପିଟାଲ ପାଲଟିଛି। ଏହି ଧାରା ଜାରି ରହିଲେ ସେପ୍ଟେମ୍ବର ୩୦ ବେଳକୁ ଦେଶରେ ଆକ୍ରାନ୍ତଙ୍କ ସଂଖ୍ୟା କୋଟିଏ ୪୦ ଲକ୍ଷରୁ ଅଧିକରେ ପହଞ୍ଚିବାର ଆଶଙ୍କା ରହିଛି। ସେହିପରି ମୃତ୍ୟୁ ସଂଖ୍ୟା ଲକ୍ଷେ ୭୫ ହଜାରରୁ ଅଧିକ ଛୁଇଁବ। ବିନା ବିଚାର ବିମର୍ଷରେ ମାତ୍ର ୩ ଘଣ୍ଟାରେ ଦେଶରେ ଲକ୍ଡାଉନ୍ ଜାରି କରିବା ମୋଦି ସରକାରଙ୍କ ବଡ଼ ଭୁଲ୍ ବୋଲି ସେ କହିଛନ୍ତି।