ନୂଆଦିଲ୍ଲୀ, ୨୮।୬: ଭାରତ ବନ୍ଧୁତାକୁ ସମ୍ମାନ ଦେଇଥାଏ। ସେହିପରି ଆବଶ୍ୟକ ପଡ଼ିଲେ ଆଖିରେ ଆଖି ମିଶାଇ ଜବାବ ଦେବାକୁ ବି ସକ୍ଷମ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ୬୬ତମ ମନ୍ କି ବାତ୍ କାର୍ଯ୍ୟକ୍ରମରେ ଦେଶବାସୀଙ୍କ ଉଦ୍ଦେଶ୍ୟରେ କହିଛନ୍ତି। ଲଦାଖର ଗଲଓ୍ବାନ ଘାଟିରେ ୨୦ ଜଣ ଭାରତୀୟ ଯବାନ ଶହୀଦ ହୋଇଛନ୍ତି। ସେମାନଙ୍କର ବଳିଦାନ କେବେ ବ୍ୟର୍ଥ ଯିବ ନାହିଁ। ଦେଶବାସୀ ଶହୀଦଙ୍କୁ ସର୍ବଦା ମନେ ରଖିବେ। ସୀମାରେ ଅଖଣ୍ଡ ଭାରତର ଅଖଣ୍ଡତା ପ୍ରତି କୌଣସି ପଦକ୍ଷେପକୁ ସହ୍ୟ କରାଯିବ ନାହିଁ ବୋଲି ମୋଦି କହିଛନ୍ତି। ଭାରତ ଅତୀତରେ ବିଭିନ୍ନ ସଙ୍କଟକୁ ଅତିକ୍ରମ କରିବା ଜାରି ରଖିଛି, ଏବଂ ଏହା ଅଗାମୀ ଦିନରେ ମଧ୍ୟ ଅବ୍ୟାହତ ରହିବ। ଦେଶ ବାଧାବିଘ୍ନକୁ ହଟାଇ ଆଗେଇ ଚାଲିଛି। ଦେଶବାସୀ ଏହି ସଂକଳ୍ପକୁ ଗ୍ରହଣ କରିବାର ଆବଶ୍ୟକତା ଥିବା ସେ କହିଛନ୍ତି।
