କାନାଡାକୁ ନେଇ ଆକ୍ସନ ମୋଡରେ ଭାରତ, ଭିଜା ସର୍ଭିସ ସସପେଣ୍ଡ କରି ନାଗରିକଙ୍କ ଏଣ୍ଟ୍ରି ଉପରେ ଲଗାଇଲା ରୋକ

ନୂଆଦିଲ୍ଲୀ,୨୧।୯: ଭାରତ ଓ କାନାଡା ମଧ୍ୟରେ ବିବାଦ ବଢିବାରେ ଲାଗିଛି। ପ୍ରଥମେ ଉଭୟ ଦେଶର କୂଟନୀତିଜ୍ଞଙ୍କୁ ନିଲମ୍ବିତ କରାଯାଇଥିଲା ଏବଂ ବର୍ତ୍ତମାନ ନୂଆଦିଲ୍ଲୀ କାନାଡା ନାଗରିକଙ୍କ ପାଇଁ ଭିଜା ସେବାକୁ ଅର୍ନିଦ୍ଦିଷ୍ଟ କାଳ ପାଇଁ ସ୍ଥଗିତ ରଖିଛି। ଭାରତ ଏପର୍ଯ୍ୟନ୍ତ ନେଇଥିବା ଏହା ହେଉଛି ସବୁଠାରୁ ବଡ ପଦକ୍ଷେପ। ଦୁଇ ଦେଶ ମଧ୍ୟରେ ତିକ୍ତତା ବୃଦ୍ଧି ପାଇଲା ଯେତେବେଳେ କାନାଡାର ପ୍ରଧାନମନ୍ତ୍ରୀ ଭାରତକୁ ଖାଲିସ୍ତାନ ସମର୍ଥକ ହାର୍ଦ୍ଦିକ ସିଂ ନିଜାରଙ୍କ ହତ୍ୟା ଅଭିଯୋଗ କରିଥିଲେ।
ହିନ୍ଦୁସ୍ତାନ ଟାଇମ୍ସ ରିପୋର୍ଟ ଅନୁଯାୟୀ ଭିଜା ସେବାକୁ ସ୍ଥଗିତ ରଖିବା ନେଇ କୌଣସି ଆନୁଷ୍ଠାନିକ ଘୋଷଣା କରାଯାଇ ନାହିଁ। ତେବେ କାନାଡାରେ ଭିଜା ଆବେଦନ କେନ୍ଦ୍ର ଚଳାଉଥିବା ବିଏଲଏସ ଇଣ୍ଟରନ୍ୟାସନାଲ ଏହାର କାନାଡିୟ ୱେବସାଇଟରେ ଏକ ବାର୍ତ୍ତା ପୋଷ୍ଟ କରିଛି। ଏହି ବାର୍ତ୍ତାରେ ଲେଖାଥିଲା, ଭାରତୀୟ ମିଶନର ଗୁରୁତ୍ୱପୂର୍ଣ୍ଣ ସୂଚନା: କାର୍ଯ୍ୟକ୍ଷମ କାରଣରୁ ଭାରତୀୟ ଭିଜା ସେବା ଗୁରୁବାର (୨୧ ସେପ୍ଟେମ୍ବର ୨୦୨୩) ଠାରୁ ଅଧିକ ବିଜ୍ଞପ୍ତି ପର୍ଯ୍ୟନ୍ତ ସ୍ଥଗିତ ରଖାଯାଇଛି।
ଜଣେ ଭାରତୀୟ ଅଧିକାରୀ ଏହି ନିଲମ୍ବନକୁ ନିଶ୍ଚିତ କରିଛନ୍ତି କିନ୍ତୁ ଏ ସମ୍ପର୍କରେ କିଛି କହିବାକୁ ମନା କରି ଦେଇଛନ୍ତି। ସେ କହିଛନ୍ତି, ଭାଷା ସ୍ପଷ୍ଟ ଏବଂ ଏହା କ’ଣ କହିବାକୁ ଚାହୁଁଛି ତାହା କହୁଛି। କୋଭିଡ -୧୯ ମହାମାରୀ ପରେ ଭାରତ ପ୍ରଥମ ଥର ପାଇଁ ଭିଜା ସ୍ଥଗିତ ରଖିଛି। ଏହାପୂର୍ବରୁ ବୈଦେଶିକ ବ୍ୟାପାର ମନ୍ତ୍ରଣାଳୟ ପକ୍ଷରୁ କାନାଡା ଯାଉଥିବା ଭାରତୀୟ ନାଗରିକମାନଙ୍କୁ ସତର୍କ ରହିବାକୁ କୁହାଯାଇଥିଲା। କୌଣସି ଅଞ୍ଚଳକୁ ଯାଆନ୍ତୁ ନାହିଁ ଯେଉଁଠାରେ ଭାରତ ବିରୋଧୀ ଘଟଣା ଘଟିଛି କିମ୍ବା ଏପରି ଘଟଣା ଘଟିବାର ସମ୍ଭାବନା ଅଛି। କାନାଡାରେ ଘୃଣା ଅପରାଧ ବୃଦ୍ଧି ପାଇଛି ଏବଂ ସେଠାକୁ ଯିବାବେଳେ ସତର୍କ ରୁହନ୍ତୁ।