ଦୋହା,୮।୬: ଭାରତୀୟ ଫୁଟ୍ବଲ ଷ୍ଟାର ସୁନୀଲ ଛେତ୍ରୀ ବିଶ୍ୱର ଅନ୍ୟତମ ଶ୍ରେଷ୍ଠ ତଥା ଆର୍ଜେଣ୍ଟିନାର ସୁପରଷ୍ଟାର ଲିଓନେଲ ମେସିଙ୍କୁ ପଛରେ ପକାଇଛନ୍ତି। ଅନ୍ତର୍ଜାତୀୟ ଫୁଟବଲରେ ସକ୍ରିୟ ଥିବା ଖେଳାଳିଙ୍କ ମଧ୍ୟରେ ସର୍ବାଧିକ ଗୋଲ ସ୍କୋରରଙ୍କ ତାଲିକାରେ ଦ୍ୱିତୀୟ ସ୍ଥାନକୁ ଉଠିଛନ୍ତି ୩୬ ବର୍ଷୀୟ ଛେତ୍ରୀ।
ସୋମବାର ବାଂଲାଦେଶ ବିପକ୍ଷରେ ଖେଳାଯାଇଥିବା ୨୦୨୨ ଫିଫା ବିଶ୍ୱକପ୍ ଓ ୨୦୨୩ ଏଏଫ୍ସି ଏସିଆନ କପ୍ର ଯୋଗ୍ୟତା ପର୍ଯ୍ୟାୟ ମ୍ୟାଚ୍ରେ ଭାରତ ପାଇଁ ଦୁଇଟି ଗୋଲ କରିଥିଲେ ଛେତ୍ରୀ। ଏହା ସହିତ ୭୪ରେ ପହଞ୍ଚିଛି ତାଙ୍କ ଅନ୍ତର୍ଜାତୀୟ କ୍ୟାରିୟରର ଗୋଲ ସଂଖ୍ୟା। ତାଙ୍କ ଯୋଗୁ ଗତ ୬ ବର୍ଷ ମଧ୍ୟରେ ଭାରତ ବିଶ୍ୱକପ୍ ଯୋଗ୍ୟତା ପର୍ଯ୍ୟାୟରେ ହାସଲ କରିଛି ପ୍ରଥମ ବିଜୟ।
ବର୍ତ୍ତମାନ ଅନ୍ତର୍ଜାତୀୟ ଫୁଟବଲରେ ସକ୍ରିୟ ଥିବା ଖେଳାଳିଙ୍କ ମଧ୍ୟରେ ପର୍ତ୍ତୁଗାଲର କ୍ରିଷ୍ଟିଆନୋ ରୋନାଲ୍ଡୋ (୧୦୩ ଗୋଲ) ଶୀର୍ଷରେ ରହିଛନ୍ତି। କେବଳ ତାଙ୍କ ପଛକୁ ରହିଛନ୍ତି ଛେତ୍ରୀ। ଏହି ତାଲିକାର ୪ର୍ଥ ସ୍ଥାନରେ ଥିବା ମେସିଙ୍କ ନାମରେ ରହିଛି ୭୨ ଗୋଲ।