ନୂଆଦିଲ୍ଲୀ,୧୩।୧୨: ଅରୁଣାଚଳ ପ୍ରଦେଶରେ ଭାରତ ଓ ଚାଇନା ସୈନ୍ୟଙ୍କ ମଧ୍ୟରେ ହୋଇଥିବା ସଂଘର୍ଷକୁ ନେଇ ମଙ୍ଗଳବାର ସଂସଦର ଉଭୟ ଗୃହରେ ହଟ୍ଟଗୋଳ ଜାରି ରହିଛି। ଇତିମଧ୍ୟରେ ପ୍ରତିରକ୍ଷାମନ୍ତ୍ରୀ ରାଜନାଥ ସିଂହ ଲୋକ ସଭାରେ ଏହି ପ୍ରସଙ୍ଗ ଉପରେ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ତଓ୍ବାଙ୍ଗରେ ଭାରତ ଓ ଚାଇନା ମଧ୍ୟରେ ଘଟିଥିବା ସୈନ୍ୟଙ୍କ ସଂଘର୍ଷରେ ଭାରତର କୌଣସ ସୈନ୍ୟଙ୍କ ମୃତ୍ୟୁ ହୋଇନାହିଁ ଏବଂ କେହି ଗୁରୁତର ଆହତ ହୋଇନାହାନ୍ତି। ଗତ ଡିସେମ୍ବର ୯ତାରିଖ ରାତିରେ ତଓ୍ବାଙ୍ଗର ଏଲ୍ଏସିରେ ଚାଇନାର ପିଏଲ୍ଏ(ପିପୁଲ୍ସ ଲିବରେଶନ୍ ଆର୍ମି) ସୈନ୍ୟ ଅନୁପ୍ରେବଶ କରିବାକୁ ଉଦ୍ୟମ କରିଥିଲେ। ଏହି ସମୟରେ ଭାରତୀୟ ଯବାନ ତାଙ୍କୁ ଦୃଢ଼ତାର ବିରୋଧ କରିବା ସହ ସାହସିକ ଜବାବ ଦେଇଥିଲେ। ଭାରତୀୟ ସୈନ୍ୟ ଚାଇନା ସୈନ୍ୟଙ୍କୁ ତାଙ୍କ ପୋଷ୍ଟରୁ ପଛକୁ ଫେରିବାକୁ ବାଧ୍ୟ କରିଦେଇଥିଲେ। ଏହି ସମୟରେ ଆମର କୌଣସି ଯବାନଙ୍କ ମୃତ୍ୟୁ ହୋଇନାହିଁ କି କେହି ଗୁରୁତର ଆହତ ହୋଇନାହାନ୍ତି ବୋଲି ରାଜନାଥ ଗୃହରେ ଉତ୍ତର ରଖିଛନ୍ତି। ଏହି ଘଟଣା ପରେ ସ୍ଥାନୀୟ କମାଣ୍ଡର ଡିସେମ୍ବର ୧୧ରେ ସ୍ଥାପିତ ବ୍ୟବସ୍ଥା ଅନୁଯାୟୀ ନିଜ ଚାଇନା ପ୍ରତିପକ୍ଷଙ୍କ ସହ ଫ୍ଲାଗ୍ ମିଟିଂ କରି ଏସମ୍ପର୍କରେ ଆଲୋଚନା କରିଥିଲେ। ସୀମାରେ ଶାନ୍ତି ବଜାୟ ରଖିବା ପାଇଁ ଚାଇନା ପକ୍ଷଙ୍କୁ କୁହାଯାଇଥିଲା। କୁଟନୈତିକ ସ୍ତରରେ ମଧ୍ୟ ଚାଇନା ପକ୍ଷ ସହିତ ଏହି ପ୍ରସଙ୍ଗକୁ ଉଠାଯାଇଛି। ଆମର ସାର୍ବଭୌମିକ ଅଖଣ୍ଡତାକୁ ରକ୍ଷା କରିବାକୁ ଆମର ଯବାନ ସବୁବେଳେ ପ୍ରତିବଦ୍ଧ ଏବଂ ଏହା ବିରୋଧରେ କୌଣସି ଉଦ୍ୟମକୁ ରୋକିବାକୁ ସେମାନେ ସର୍ବଦା ତତ୍ପର ବୋଲି ରାଜନାଥ ଗୃହରେ ସମସ୍ତଙ୍କୁ ଆଶ୍ୱସ୍ତ କରିଛନ୍ତି। ଏଥିସହ ସେ ଗୃହରେ ସମସ୍ତଙ୍କଠାରୁ ଆଶା ରଖିଛନ୍ତି ଯେ, ଭାରତୀୟ ସୈନ୍ୟଙ୍କ ବୀରତ୍ୱ ଏବଂ ସାହସକୁ ସମସ୍ତେ ଏକ ସ୍ବରରେ ସମର୍ଥନ ଦେବେ।