ନୂଆଦିଲ୍ଲୀ: ଆମେରିକା ଭିତ୍ତିକ ଲକ୍ଜ୍ୟୁରି ବାଇକ ନିର୍ମାଣକାରୀ କମ୍ପାନୀ ହାର୍ଲେ ଡାଭିଡ୍ସନ ଭାରତରେ ଥିବା ଏହାର ଫ୍ୟାକ୍ଟ୍ରି ବନ୍ଦ କରିବାକୁ ନିଷ୍ପତ୍ତି ନେଇଛି। ହରିୟାଣାର ବଓ୍ବାଲସ୍ଥିତ ମାନୁଫାକଚରିଂ ଫାସିଲିଟିରେ ବାଇକ ନିର୍ମାଣ କରୁଥିବା ଏହି କମ୍ପାନୀ ଘରୋଇ ବଜାରରେ କାରବାରରେ ମାନ୍ଦାବସ୍ଥା ଏବଂ ବିକ୍ରି କମିବା ଯୋଗୁ ଏଭଳି ନିଷ୍ପତ୍ତି ନେଇଥିବା ଜଣାପଡିଛି। ଏହା ସ୍ଥାନୀୟ ୟୁନିଟ୍କୁ ଏକାକୀ ନ ଚଳାଇ ଏକ ଭାରତୀୟ ସଂସ୍ଥା ସହ ଚୁକ୍ତିରେ ସାମିଲ ହେବା ନେଇ ଶୀଘ୍ର ଘୋଷଣା ହେବ ବୋଲି ଆଲୋଚନା ହେଉଛି। ଦେଶର ପ୍ରମୁଖ ୨ଚକିଆ ଯାନ ନିର୍ମାତା ହିରୋ ମୋଟୋକର୍ପ ସହ ମିଶି କମ୍ପାନୀ ଭାରତରେ ଏହାର ଭବିଷ୍ୟତ ପରଖିବ ବୋଲି ଶୁଣାଯାଉଛି।
ଘରୋଇ ବଜାର ପୂର୍ବରୁ ମାନ୍ଦାବସ୍ଥା ଦେଇ ଗତି କରୁଛନ୍ତି। ଫଳରେ ବିଭିନ୍ନ କମ୍ପାନୀ ବାଣିଜ୍ୟରେ ବିଭିନ୍ନ ଚ୍ୟାଲେଞ୍ଜର ସାମ୍ନା କରୁଛନ୍ତି। କମ୍ପାନୀଗୁଡିକ ଲଗାତର କ୍ଷତିକୁ ସହ୍ୟ କରିବାକୁ ସକ୍ଷମ ହୋଇପାରୁ ନ ଥିବା ଦେଖାଯାଇଛି। ଏହା ପୂର୍ବରୁ ୪ ଚକିଆ ଯାନ ନିର୍ମାତା ମଧ୍ୟ ଅନ୍ୟ କମ୍ପାନୀ ସହ ଚୁକ୍ତିରେ ସାମିଲ ହେଉଥିବା ଦେଖାଯାଇଛି। ପ୍ରକ୍ରିୟା ସହ ଜଡ଼ିତ ଜଣେ ଅଧିକାରୀ କହିଛନ୍ତି, ହାର୍ଲେ ଡାଭିଡସନ ଭାରତରେ ସହୁଥିବା ବାଣିଜ୍ୟ କ୍ଷତିକୁ କମାଇବାକୁ ଯୋଜନା ହାତକୁ ନେଇଛି।
କରୋନା ମହାମାରୀ ଜନିତ ଏହି କ୍ଷତି ଆହୁରି ବଢିଛି। ଏହାର ଭାରତ ବଜାର ଅପରେଶନ୍ସରୁ କର୍ମଚାରୀଙ୍କୁ ଛଟେଇ କରିବା ଦିଗରେ ମଧ୍ୟ ଏହା ଯୋଜନା ରଖିଛି। ହାର୍ଲେ ଡାଭିଡ୍ସନ ଏହାର ବାଣିଜ୍ୟ ପୁନର୍ଗଠନ ଯୋଜନା ଅନ୍ତର୍ଗତ ସାରା ବିଶ୍ୱ ବଜାରରେ ରହିଥିବା ଏହାର ଫାସିଲିଟିଗୁଡିକରେ ଖର୍ଚ୍ଚ କମାଇବାକୁ ଯୋଜନା ହାତକୁ ନେଉଛି ବୋଲି ସିଇଓ ଜେ.ଜେଇଜ ସୂଚନା ଦେଇଛନ୍ତି। ଏହା ସହ ନିଯୁକ୍ତି ହ୍ରାସ କରାଯିବା ସହ ବାଣିଜ୍ୟ ମଡେଲରେ ପରିବର୍ତ୍ତନ ଏବଂ ମାନୁଫାକ୍ଚରିଂ ଫାସିଲିଟି ବନ୍ଦ ନେଇ ସେ ସ୍ପଷ୍ଟ କରିଛନ୍ତି।
