ନୂଆଦିଲ୍ଲୀ,୨୯।୫: ଚଳିତ ଆର୍ଥିକ ବର୍ଷର ୨ୟ ତ୍ରୈମାସ ଅର୍ଥାତ୍ ଜୁଲାଇ-ସେପ୍ଟେମ୍ବର ମଧ୍ୟରେ ଭାରତକୁ ବ୍ୟାପକ କୋଇଲା ଅଭାବର ସାମ୍ନା କରିବାକୁ ପଡ଼ିପାରେ। ବିଦ୍ୟୁତ୍ ଚାହିଦା ଅଧିକ ହେବାକୁ ଥିବା କାରଣରୁ ଦେଶକୁ ଏହି ସଙ୍କଟର ସାମ୍ନା କରିବାକୁ ପଡ଼ିପାରେ ବୋଲିି ରଏଟର୍ସ ତଥ୍ୟରୁ ଜଣାଯାଇଛି। ତଥ୍ୟ ଅନୁସାରେ, ବିଦ୍ୟୁତ୍ ମନ୍ତ୍ରଣାଳୟ ଏକ ଅନ୍ତରୀଣ କମିଟିର ରିପୋର୍ଟକୁ ନେଇ ଏହି ସୂଚନା ଦେଇଛନ୍ତି। ଏହାଦ୍ୱାରା ଦେଶରେ ପାଓ୍ବାର କଟ୍ ମଧ୍ୟ ବୃଦ୍ଧି ପାଇବା ନେଇ ଆଶଙ୍କା ଦେଖାଦେଇଛି। ତଥ୍ୟ ଅନୁସାରେ ଆର୍ଥିକ ବର୍ଷ ୨୦୨୨-୨୩ର ଜୁଲାଇ-ସେପ୍ଟେମ୍ବର ମଧ୍ୟରେ କୋଇଲା ଯୋଗାଣରେ ୪୨.୫ ମିଲିୟନ ଟନ୍ର ହ୍ରାସ ଦେଖାଦେଇପାରେ। ଏହା ପୂର୍ବ ବିଦ୍ୟୁତ୍ ସଙ୍କଟଠାରୁ ୧୫% ଅଧିକ ରହିବ ବୋଲି ଆକଳନ କରାଯାଉଛି। ଗତ ୩୮ ବର୍ଷ ମଧ୍ୟରେ ବର୍ତ୍ତମାନ ସମୟରେ ବିଦ୍ୟୁତ୍ ଶକ୍ତିର ସର୍ବାଧିକ ଚାହିଦା ରହିଛି। ଏହାଛଡ଼ା ରୁଷିଆ-ୟୁକ୍ରେନ୍ ଯୁଦ୍ଧ କାରଣରୁ କୋଇଲା ଯୋଗାଣରେ ମଧ୍ୟ ହ୍ରାସ ଦେଖାଦେଇଛି। ଫଳରେ କୋଇଲା ଦର ରେକର୍ଡ ସ୍ତରରେ ରହିଛି। ଏଭଳି ପରିସ୍ଥିତିରେ ସରକାର ବିଦ୍ୟୁତ୍ ଉତ୍ପାଦନ ପ୍ଲାଣ୍ଟଗୁଡ଼ିକ ଉପରେ କୋଇଲା ଆମଦାନୀ ବଢ଼ାଇବା ପାଇଁ ଚାପ ପକାଉଛନ୍ତି। ଏହାଛଡ଼ା ଅଧିକ ପରିମାଣର କୋଇଲା ଆମଦାନୀ କରି ନିଜସ୍ବ କୋଲ୍ ଇନ୍ଭେଣ୍ଟ୍ରିଜ୍ ପ୍ରସ୍ତୁତ ନ କରିଲେ, ସେମାନଙ୍କ ପାଇଁ ଘରୋଇ କୋଇଲା ଯୋଗାଣରେ ହ୍ରାସ କରାଯିବ ବୋଲି ବିଦ୍ୟୁତ୍ ପ୍ଲାଣ୍ଟଗୁଡ଼ିକୁ କେନ୍ଦ୍ର ସରକାରଙ୍କ ପକ୍ଷରୁ ଚେତାବନୀ ଦିଆଯାଇଛି। କେନ୍ଦ୍ର ଶକ୍ତି ମନ୍ତ୍ରଣାଳୟର ସୂଚନା ଅନୁସାରେ, ଅଧିକାଂଶ ରାଜ୍ୟକୁ କୋଇଲା ଆମଦାନୀ ନେଇ ବର୍ତ୍ତମାନ ପର୍ଯ୍ୟନ୍ତ କୌଣସି ଚୁକ୍ତିନାମା ଦିଆଯାଇନାହିଁ। ଏଭଳି ପରିସ୍ଥିତିରେ ଯଦି କୋଇଲା ଆମଦାନୀ ନ କରାଯିବ, ତେବେ ଜୁଲାଇ ସୁଦ୍ଧା ଦେଶର ଅନେକ ବିଦ୍ୟୁତ୍ ପ୍ଲାଣ୍ଟରେ କୋଇଲା ସଙ୍କଟ ଭୀଷଣ ରୂପ ଧାରଣ କରିବ। ଏହାଛଡ଼ା ଏପ୍ରିଲ ଶେଷ ସୁଦ୍ଧା କେବଳ ଗୋଟିଏ ରାଜ୍ୟ କୋଇଲା ଆମଦାନୀ ପାଇଁ ଟେଣ୍ଡର ଦେଇଛି। ମନ୍ତ୍ରଣାଳୟର୨ଜଣ ବରିଷ୍ଠ ଅଧିକାରୀଙ୍କ ସୂଚନା ଅନୁସାରେ, ଶୁକ୍ରବାର ଏକ ଭର୍ଚୁଆଲ୍ ବୈଠକ ଜରିଆରେ ଏ ସମ୍ପର୍କିତ ସୂଚନା ଦିଆଯାଇଛି। ବୈଠକରେ କୋଇଲା ଏବଂ ବିଦ୍ୟୁତ୍ ମନ୍ତ୍ରୀ ମଧ୍ୟ ଉପସ୍ଥିତ ଥିଲେ।