ଭୁବନେଶ୍ୱର, ୧୪।୧୨ (ତପନ ସ୍ବାଇଁ): ମୁମ୍ବାଇରେ ଚାଲିଥିବା ଦୃଷ୍ଟିବାଧିତ ମହିଳା ଟି୨୦ କ୍ରିକେଟ ସିରିଜର ବୁଧବାର ଅନୁଷ୍ଠିତ ତୃତୀୟ ମ୍ୟାଚରେ ଭାରତ ୧୦ ଉଇକେଟରେ ନେପାଳଠାରୁ ହାରିଯାଇଛି। ଫଳରେ ଏହି ଦ୍ୱିପାକ୍ଷିକ ସିରିଜରେ ଭାରତ ଏବେ ୨-୧ରେ ଅଗ୍ରଣୀ ରହିଛି। ପୋଲିସ ଜିମ୍ଖାନା କ୍ରିକେଟ ଗ୍ରାଉଣ୍ଡରେ ଅନୁଷ୍ଠିତ ମ୍ୟାଚରେ ଭାରତ ୨୦ ଓଭରରେ ୪ ଉଇକେଟ ହରାଇ ୧୭୪ ରନ କରିଥିଲା। ଦଳ ପକ୍ଷରୁ ସିମୁ ଦାସ ୮୪ ରନକରି ଅପରାଜିତ ରହିଥିଲେ। ଓଡ଼ିଶାର ଫୁଲ ସୋରେନଙ୍କ ସମେତ ଭାରତର ୪ ଜଣ ଯାକ ବ୍ୟାଟର ରନ୍ଆଉଟ ହୋଇଥିଲେ। ଜବାବରେ ନେପାଳ କୌଣସି ଉଇକେଟ ନ ହରାଇ ୧୯.୧ ଓଭରରେ ବିଜୟ ଲକ୍ଷ୍ୟ ହାସଲ କରି ନେଇଥିଲା। ବିନିତା ୭୮ ଓ ମୀନାକ୍ଷୀ ୭୫ ରନକରି ଅପରାଜିତ ରହିଥିଲେ। ଏ ଦୁଇଜଣଙ୍କ ଉପରେ ଭାରତୀୟ ବୋଲର କୌଣସି ପ୍ରଭାବ ପକାଇପାରି ନ ଥିଲେ। ବିନିତା ପ୍ଲେୟର ଅଫ୍ ଦି ମ୍ୟାଚ ବିବେଚିତ ହୋଇଥିଲେ।