ଭାରତ ଆମେରିକାକୁ କରୁନି ବିଶ୍ୱାସ, ସେଥିପାଇଁ ରୁଷିଆ ସହ ହାତ ମିଳାଇଛି: ନିକ୍କି ହେଲିଙ୍କ ଅଭିଯୋଗ…

ଓ୍ବାଶିଂଟନ,୮।୨ : ଆମେରିକାର ରିପବ୍ଲିକାନ ପାର୍ଟିର ରାଷ୍ଟ୍ରପତି ପ୍ରତିଦ୍ୱନ୍ଦ୍ୱୀ ନିକ୍କି ହେଲି ଦାବି କରିଛନ୍ତି ଭାରତ ଆମେରିକାର ସହଯୋଗୀ ହେବାକୁ ଚାହୁଁଛି, କିନ୍ତୁ ଏପର୍ଯ୍ୟନ୍ତ ଭାରତ ଆମେରିକା ଉପରେ ସମ୍ପୂର୍ଣ୍ଣ ଭାବେ ବିଶ୍ୱାସ କରୁନାହିଁ। ନିକ୍କି ଏହା ମଧ୍ୟ କହିଛନ୍ତି ରୁଷିଆ ସହିତ ଭାରତ ଅତି ଚତୁରତାର ସହ ବନ୍ଧୁତା ବଜାୟ ରଖିଛି। ଏକ ମିଡିଆ ଚ୍ୟାନେଲକୁ ଦେଇଥିବା ଏକ ସାକ୍ଷାତକାରରେ ସେ କହିଛନ୍ତି ଭାରତ ବର୍ତ୍ତମାନ ଆମେରିକାକୁ ଜଣେ ବିଶ୍ୱ ନେତା ଭାବରେ ଦୁର୍ବଳ ମନେ କରୁଛି।

ମୁଁ ଭାରତ ସହିତ ଚୁକ୍ତି କରିଛି ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହିତ ମଧ୍ୟ କଥାବାର୍ତ୍ତା କରିଛି । ମୁଁ ଭାବୁଛି ଭାରତ ଆମ ସହ ଭାଗିଦାରୀ କରିବାକୁ ଚାହୁଁଛି ଏବଂ ସେମାନେ ରୁଷିଆ ସହିତ ଯିବାକୁ ଚାହୁଁନାହାନ୍ତି। କିନ୍ତୁ ସମସ୍ୟା ହେଉଛି ଭାରତ ଆମ ଉପରେ ବିଶ୍ୱାସ କରୁନାହିଁ। ସେମାନେ ଆମକୁ ନେତା ଭାବରେ ବିଶ୍ୱାସ କରନ୍ତି ନାହିଁ। ସେମାନେ ଆମକୁ ଦୁର୍ବଳ ବୋଲି ଭାବୁଛନ୍ତି । ଭାରତ ସର୍ବଦା ଚତୁରତାର ସହ କାର୍ଯ୍ୟ କରିଛି ଏବଂ ସେଥିପାଇଁ ସେମାନେ ରୁଷିଆ ସହିତ ଘନିଷ୍ଠତା ବଜାୟ ରଖିଛନ୍ତି କାରଣ ସେମାନେ କେବଳ ରୁଷିଆରୁ ସେମାନଙ୍କ ସାମରିକ ଉପକରଣ କିଣୁଛନ୍ତି।

ଆମକୁ ପୁନର୍ବାର ନେତୃତ୍ୱ ନେବା ଆରମ୍ଭ କରିବା ଏବଂ ଆମର ଦୁର୍ବଳତାକୁ ଦୂର କରିବା ଜରୁରୀ। ଭାରତ, ଅଷ୍ଟ୍ରେଲିଆ, ନ୍ୟୁଜିଲାଣ୍ଡ, ଇସ୍ରାଏଲ, ଜାପାନ ଏବଂ ଦକ୍ଷିଣ କୋରିଆ ଭଳି ଆମର ସହଯୋଗୀମାନେ ମଧ୍ୟ ଏହା ଚାହାନ୍ତି। ଚାଇନା ଦ୍ୱାରା ବଢୁଥିବା ବିପଦକୁ ଦୃଷ୍ଟିରେ ରଖି ଜାପାନ ଚାଇନା ଉପରେ ନିର୍ଭରଶୀଳତା ହ୍ରାସ କରିବାକୁ କୋଟି କୋଟି ଟଙ୍କା ଖର୍ଚ୍ଚ କରିଛି। ସେହିଭଳି ଚାଇନା ଉପରେ ନିର୍ଭରଶୀଳତା ହ୍ରାସ କରିବା ପାଇଁ ଭାରତ ମଧ୍ୟ କୋଟି କୋଟି ଟଙ୍କା ଖର୍ଚ୍ଚ କରିଛି। ଆମେରିକା ଏହାର ସହଯୋଗୀମାନଙ୍କ ସହ ମିଶି କାର୍ଯ୍ୟ କରିବା ଜରୁରୀ ।

ତେବେ ଚାଇନାର ଆର୍ଥିକ ସ୍ଥିତି ଭଲ ନୁହେଁ ଏବଂ ଏହା ଆମେରିକା ସହ ଯୁଦ୍ଧ ପାଇଁ ପ୍ରସ୍ତୁତ ହେଉଛି। ଯଦି ଏଭଳି ହୁଏ ତାହା ଚାଇନାର ବଡ଼ ଭୁଲ ହେବ।