କଲୋମ୍ବୋ/ନୂଆଦିଲ୍ଲୀ, ୧୫।୨ : ଶକ୍ତି ସଙ୍କଟ ସହିତ ସମସ୍ୟାରେ ପଡ଼ିଥିବା ଶ୍ରୀଲଙ୍କାର ସହାୟତା ପାଇଁ ଭାରତ ମଙ୍ଗଳବାର ୪୦ ହଜାର ଟନ୍ ଇନ୍ଧନ ପଠାଇଛି। ଶ୍ରୀଲଙ୍କାରେ ଅବସ୍ଥାପିତ ଥିବା ଭାରତୀୟ ଉଚ୍ଚାୟୁକ୍ତ ଗୋପାଳ ବାଗ୍ଲେ ଏନେଇ ସୂଚନା ଦେଇଛନ୍ତି।
ସେ କହିଛନ୍ତି ଯେ, ଭାରତ ଶ୍ରୀଲଙ୍କାକୁ ସବୁବେଳେ ପ୍ରିୟ ବନ୍ଧୁଭାବେ ବିବେଚନା କରିଥାଏ। ଏହା ସହିତ ସେ ଶ୍ରୀଲଙ୍କା ଅଧିକାରୀଙ୍କୁ ଏ ସମ୍ପର୍କିତ କାଗଜ ପତ୍ର ହସ୍ତାନ୍ତର କରିଛନ୍ତି। ତେଲ ଟ୍ୟାଙ୍କର ସ୍ବର୍ଣ୍ଣ ପୁଷ୍ପ କଲୋମ୍ବୋ ବନ୍ଦରରେ ପହଞ୍ଚିଛି। ଶ୍ରୀଲଙ୍କା ଶକ୍ତିମନ୍ତ୍ରୀ ଉଦୟ ଗମ୍ମନପିଲେ ସ୍ବର୍ଣ୍ଣ ପୁଷ୍ପକୁ ସ୍ବାଗତ କରିଛନ୍ତି।
୨୦୨୨ ଜାନୁୟାରୀରେ ଭାରତ ଶ୍ରୀଲଙ୍କାକୁ ୯୦ କୋଟି ଡଲାରର ଋଣ ଯୋଗାଇ ଦେବାକୁ ଘୋଷଣା କରିଥିଲା। ସେହିପରି ଫେବୃୟାରୀରେ ଇନ୍ଧନ କିଣିବା ପାଇଁ ୫୦ କୋଟି ଡଲାର ଋଣ ସହାୟତା ଲାଗି ସହମତି ପ୍ରକାଶ କରିଛି।
