ନୂଆଦିଲ୍ଲୀ/ନ୍ୟୁୟର୍କ, ୧୯।୫ : ଭାରତ ପୃଥିବୀର ଖାଦ୍ୟ ସୁରକ୍ଷା ନେଇ ଚିନ୍ତା ବ୍ୟକ୍ତ କରିଛି। କେନ୍ଦ୍ରୀୟ ବହିର୍ବ୍ୟାପାର ରାଷ୍ଟ୍ର ମନ୍ତ୍ରୀ ଭି ମୁରଲୀଧରନ ବୁଧବାର ନ୍ୟୁୟର୍କରେ ’ଗ୍ଲୋବାଲ ଫୁଡ ସିକ୍ୟୁରିଟି-କଲ ଟୁ ଆକ୍ସନ’ ଉପରେ ଏକ ଉଚ୍ଚ ସ୍ତରୀୟ ମନ୍ତ୍ରୀସ୍ତରୀୟ ବୈଠକକୁ ସମ୍ବୋଧିତ କରିଛନ୍ତି। ଏହି ସମୟରେ ସେ ପୃଥିବୀର ଖାଦ୍ୟ ନିରାପତ୍ତାକୁ ନେଇ ଉଦ୍ବେଗ ପ୍ରକାଶ କରିଥିଲେ। ନ୍ୟୁୟର୍କରେ ଆମେରିକାର ବୈଦେଶିକ ସଚିବ ଆଣ୍ଟୋନି ବ୍ଲିଙ୍କେନ ଏହି ବୈଠକରେ ସଭାପତିତ୍ୱ କରିଥିଲେ।
ବୈଠକରେ କେନ୍ଦ୍ର ମନ୍ତ୍ରୀ ମୁରଲୀଧରନ କହିଛନ୍ତି ଯେ କରୋନା ମହାମାରୀ ଏବଂ ରୁଷିଆ-ୟୁକ୍ରେନ ମଧ୍ୟରେ ଚାଲିଥିବା ବିବାଦ ବିକାଶଶୀଳ ଦେଶକୁ ପ୍ରଭାବିତ କରିବା ସହିତ ଶକ୍ତି କ୍ଷେତ୍ର ଏବଂ ଅତ୍ୟାବଶ୍ୟକ ଦ୍ରବ୍ୟର ମୂଲ୍ୟ ବୃଦ୍ଧି ଏବଂ ପୃଥିବୀର ସାମଗ୍ରୀ ଯୋଗାଣ ଶୃଙ୍ଖଳାକୁ ବ୍ୟାହତ କରିଛି।
ମୁରଲୀଧରନ ତାଙ୍କ ଅଭିଭାଷଣରେ ଖାଦ୍ୟ ସଙ୍କଟ ଉପରେ ଏକ ବିଶ୍ୱସ୍ତରୀୟ ରିପୋର୍ଟ ସମ୍ପର୍କରେ କହିଛନ୍ତି ଯେ ୨୦୨୨ ରିପୋର୍ଟ ଅନୁଯାୟୀ ପୃଥିବୀର ୧୩୯ ନିୟୁତ ଲୋକଙ୍କ ପାଖରେ ଖାଦ୍ୟ ସୁରକ୍ଷା ନାହିଁ। ସେ କହିଛନ୍ତି ଯେ ଏହି ପରିସ୍ଥିତି ଏକ ଗୁରୁତର ପ୍ରସଙ୍ଗ ଏବଂ ଏହାକୁ ଅଣଦେଖା କରାଯାଇପାରିବ ନାହିଁ। ଅଧିକ ପ୍ରଭାବିତ ଲୋକଙ୍କ ଦୁଃଖକୁ ହ୍ରାସ କରିବା ପାଇଁ ଆମ ସମସ୍ତଙ୍କୁ ମିଳିତ ଭାବେ କାର୍ଯ୍ୟ କରିବାକୁ ପଡିବ ବୋଲି କେନ୍ଦ୍ର ମନ୍ତ୍ରୀ କହିଛନ୍ତି।
ଖାଦ୍ୟ, ଶକ୍ତି ଏବଂ ଅର୍ଥ ଉପରେ ଏକ ଗ୍ଲୋବାଲ କ୍ରାଇସିସ ରେସପନ୍ସ ଗ୍ରୁପ ଗଠନ ପାଇଁ ଆମେ ଜାତିସଂଘ ସେକ୍ରେଟେରୀ ଜେନେରାଲଙ୍କ ପଦକ୍ଷେପ ଉପରେ ଧ୍ୟାନ ଦେଇଛୁ ବୋଲି ସେ କହିଛନ୍ତି।
ମୁରଲୀଧରନ କହିଛନ୍ତି ଯେ କେତେକ ଦେଶର ଲୋକମାନେ ଖାଦ୍ୟ ଶସ୍ୟର ମୂଲ୍ୟକୁ ନେଇ ଅସୁବିଧାର ସମ୍ମୁଖୀନ ହେଉଛନ୍ତି। ବିଶ୍ୱ ଗହମ ମୂଲ୍ୟରେ ହଠାତ୍ ବୃଦ୍ଧି ଖାଦ୍ୟ ସୁରକ୍ଷା ତଥା ପଡୋଶୀ ଦେଶ ତଥା ଅନ୍ୟାନ୍ୟ ଅସୁରକ୍ଷିତ ଦେଶକୁ ବିପଦରେ ପକାଇଛି ବୋଲି କେନ୍ଦ୍ର ମନ୍ତ୍ରୀ କହିଛନ୍ତି।
ମୁରଲୀଧରନ କହିଛନ୍ତି ଯେ ବିଶ୍ୱର ଖାଦ୍ୟ ନିରାପତ୍ତା ପାଇଁ ଭାରତ ପ୍ରତିଶ୍ରୁତିବଦ୍ଧ। ଏଥି ସହିତ ବିଶ୍ୱର ଖାଦ୍ୟ ନିରାପତ୍ତାକୁ ଆଗକୁ ନେବାରେ ଭାରତ ଉଚିତ ଭୂମିକା ଗ୍ରହଣ କରିବ ଏବଂ ସାମାଜିକ ନ୍ୟାୟକୁ ପ୍ରୋତ୍ସାହିତ କରିବ ବୋଲି ସେ କହିଛନ୍ତି।