ଚେଞ୍ଚୁରିଆନ,୩୧।୧୨: ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଟେଷ୍ଟକୁ ୧୧୩ ରନ୍ରେ ଜିତିଥିବା ଭାରତୀୟ ଦଳକୁ ଏକ ଟେଷ୍ଟ ଚାମ୍ପିୟନଶିପ୍ ପଏଣ୍ଟ ହରାଇବାକୁ ପଡ଼ିଛି। ଧିମା ବୋଲିଂ ହାର ପାଇଁ ଦଳକୁ ଏଭଳି ଦଣ୍ଡରେ ଦଣ୍ଡିତ କରିଛି ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି)। ଦଳର ଟେଷ୍ଟ ଚାମ୍ପିୟନଶିପ୍ ପଏଣ୍ଟ କାଟ କରାଯିବା ସହ ପ୍ରତ୍ୟେକ ସଦସ୍ୟଙ୍କ ମ୍ୟାଚ୍ ଫି’ର ୨୦ ପ୍ରତିଶତ କାଟ କରାଯାଇଥିବା ଆଇସିସି ପକ୍ଷରୁ କୁହାଯାଇଛି।
ଧାର୍ଯ୍ୟ ସମୟ ମଧ୍ୟରେ ନିର୍ଦ୍ଧାରିତ ଓଭର ବୋଲିଂ କରିବାରେ ବିଫଳ ହେବାରୁ ଭାରତୀୟ ଦଳକୁ ଏଭଳି ଦଣ୍ଡାଦେଶ ଦେଇଛନ୍ତି ଆଇସିସି ଏଲିଟ ପାନେଲର ମ୍ୟାଚ୍ ରେଫରି ଆଣ୍ଡ୍ର୍ୟୁ ପିକ୍ରଫ୍ଟ।
ଟିମ୍ ଇଣ୍ଡିଆ ଅଧିନାୟକ ଭୁଲ ସ୍ବୀକାର କରିବା ସହ ଦଣ୍ଡାଦେଶ ଗ୍ରହଣ କରିଥିବାରୁ ଏ ଘଟଣାରେ କୌଣସି ଶୁଣାଣିର ଆବଶ୍ୟକତା ନାହିଁ। ଅମ୍ପାୟର ମାରାଇସ ଇରାସମସ, ଆଡ୍ରିଆନ ହୋଲ୍ଡଷ୍ଟକ, ଆଲାହୁଦିନ ପାଲେକର ଓ ବଙ୍ଗାନି ଜେଲେ ଟିମ୍ ଇଣ୍ଡିଆ ବିରୋଧରେ ଏହି ଅଭିଯୋଗ ଆଣିଥିଲେ। ମାଞ୍ଚେଷ୍ଟରରେ ବିଜୟ ସହ ଭାରତ ୩ ମ୍ୟାଚ୍ ବିଶିଷ୍ଟ ସିରିଜ୍ରେ ୧-୦ର ଅଗ୍ରଣୀ ହାସଲ କରିଛି।
