ମୁମ୍ବାଇ, ୧୫।୧୦: କଷ୍ଟ୍ୟୁମ ଡିଜାଇନର୍ ତଥା ଭାରତର ପ୍ରଥମ ଓସ୍କାର ବିଜୟିନୀ ଭାନୁ ଅଥେୟାଙ୍କ ଗୁରୁବାର ପରଲୋକ ଘଟିଛି। ୯୧ ବର୍ଷୀୟ ଭାନୁ ଦୀର୍ଘ ଦିନ ଧରି ଅସୁସ୍ଥ ଥିଲେ। ମୁମ୍ବାଇର କୋଲାବାସ୍ଥିତ ବାସଭବନରେ ସେ ଗୁରୁବାର ଶେଷ ନିଶ୍ୱାସ ତ୍ୟାଗ କରିଥିଲେ। ଭାରତର ପ୍ରଥମ ବ୍ୟକ୍ତି ଭାବେ ଭାନୁ ଅନ୍ତର୍ଜାତୀୟସ୍ତରରେ ପ୍ରଦାନ କରାଯାଉଥିବା ସମ୍ମାନଜନକ ଓସ୍କାର ପୁରସ୍କାର ଜିତିଥିଲେ। ‘ଗାନ୍ଧୀ’ ଫିଲ୍ମ ପାଇଁ ପୋଷାକ ଡିଜାଇନ କରି ସେ ଜନ୍ ମୋଲାଙ୍କ ସହ ଶ୍ରେଷ୍ଠ କଷ୍ଟ୍ୟୁମ ଡିଜାଇନର ଭାବେ ଓସ୍କାର ପୁରସ୍କାର ଲାଭ କରିଥିଲେ। ଏହି ଫିଲ୍ମକୁ ମୋଟ୍ ୮ଟି ଓସ୍କାର ପୁରସ୍କାର ମିଳିଥିଲା। ୧୯୮୨ ମସିହାରେ ରିଚାର୍ଡ ଏଣ୍ଟନବୋରାଙ୍କ ବିଶ୍ୱ ପ୍ରସିଦ୍ଧ ଫିଲ୍ମ ‘ଗାନ୍ଧୀ’ ରିଲିଜ କରିଥିଲା।
ଝିଅ ରାଧିକା ଗୁପ୍ତା ଗଣମାଧ୍ୟମକୁ ସୂଚନା ପ୍ରଦାନ କରି କହିଛନ୍ତି, ‘୨୦୧୨ରେ ମା’ଙ୍କୁ ମସ୍ତିଷ୍କ ଟ୍ୟୁମର ହୋଇଥିଲା। କିନ୍ତୁ ସେତେବେଳେ ସେ ଅସୁସ୍ଥତା ପାଇଁ ଅସ୍ତ୍ରୋପଚାର କରିବାକୁ ମନା କରିଦେଇଥିଲେ। ଫଳରେ ୨୦୧୫ରେ ପକ୍ଷାଘାତରେ ପୀଡ଼ିତ ହୋଇଥିଲେ। ଆଜି ସକାଳେ ଶୋଇଥିବା ଅବସ୍ଥାରେ ତାଙ୍କର ବିୟୋଗ ଘଟିଥିଲା।’ ଅପରାହ୍ନରେ ଚନ୍ଦନଓ୍ବାଡି ଶବଦାହ ଗୃହରେ ତାଙ୍କର ଅନ୍ତିମ ସଂସ୍କାର ହୋଇଥିବା ଜଣାପଡ଼ିଛି। ଶେଷଥର ପାଇଁ ଭାନୁ ୨୦୦୧ରେ ରିଲିଜ ହୋଇଥିବା ‘ଲଗାନ’ ଓ ୨୦୦୪ରେ ‘ସ୍ବଦେଶ’ ଫିଲ୍ମ ପାଇଁ ପୋଷାକ ଡିଜାଇନ କରିଥିଲେ। ୧୯୫୬ରେ ମୁକ୍ତିଲାଭ କରିଥିବା ‘ସିଆଇଡି’ ଫିଲ୍ମରୁ ଭାନୁ ତାଙ୍କ ପୋଷାକ ଡିଜାଇନ କ୍ୟାରିୟର ଆରମ୍ଭ କରିଥିଲେ।